ତେଲକୋଇ, ୧୨।୬(ଡି.ଏନ.ଏ.)-କେନ୍ଦୁଝର ଜିଲା ତେଲକୋଇ ବ୍ଲକ ମୁଖ୍ୟାଳୟରେ ଥିବା ସ୍ବାସ୍ଥ୍ୟକେନ୍ଦ୍ର ଆଉଟଡୋର ସାମ୍ନାରେ ପାଣି ଜମୁଛି। ଅସରାଏ ବର୍ଷା ହେଲେ ଏହି ପ୍ରକାର ପରିସ୍ଥିତି ସୃଷ୍ଟି ହେଉଛି। ଆଗକୁ ବର୍ଷା ଦିନ ଆସୁଥିବାରୁ ରୋଗୀମାନେ ହଇରାଣ ହେବା ଆଶଙ୍କା ଦେଖାଦେଇଛି। ତେବେ ସ୍ବାସ୍ଥ୍ୟକେନ୍ଦ୍ର ସାମ୍ନାରେ ରାସ୍ତା ନିର୍ମାଣ ଯୋଗୁଁ ଏପରି ଅବସ୍ଥା ସୃଷ୍ଟି ହୋଇଥିବା ବେଳେ ସ୍ବାସ୍ଥ୍ୟକେନ୍ଦ୍ରର ପାଚେରି ଏବଂ ସ୍ବାସ୍ଥ୍ୟ କେନ୍ଦ୍ର ଭିତର ପଟର ରାସ୍ତା ନିର୍ମାଣ ଯୋଗୁ ଏଭଳି ସ୍ଥିତି ସୃଷ୍ଟି ହୋଇଥିବା କୁହାଯାଉଛି । ସ୍ବାସ୍ଥ୍ୟକେନ୍ଦ୍ର ସାମ୍ନାରେ ପାଣି ଜମି ରହୁଥିବା ବେଳେ ଉକ୍ତ ପାଣି ନିଷ୍କାସନ ବ୍ୟବସ୍ଥା କରାଯାଇ ନାହିଁ ।
ସ୍ବାସ୍ଥ୍ୟକେନ୍ଦ୍ର ଆଉଟଡୋର ସଲଗ୍ନ ପ୍ରସୂତି ଗୃହ ରହିଛି। ଦୈନିକ ୨ଶହରୁ ଊର୍ଦ୍ଧ୍ୱ ରୋଗୀ ଆସି ଚିକିତ୍ସିତ ହୁଅନ୍ତି । ଏପରିସ୍ଥଳେ ସାମାନ୍ୟ ବର୍ଷାରେ ପାଣି ସ୍ବାସ୍ଥ୍ୟକେନ୍ଦ୍ର ସମ୍ମୁଖରେ ଜମି ରହି ଦୁର୍ଗନ୍ଧ ହେବା ଓ ରୋଗୀଙ୍କୁ ବୋହି ଆଉଟଡୋରକୁ ନେବା ଏବେ ସମସ୍ୟା ସୃଷ୍ଟି ହୋଇଛି। ଏ ସମ୍ପର୍କରେ ଡା. ଚନ୍ଦନ କୁମାର ସାମଲଙ୍କୁ ପଚାରିବାରୁ ସେ କହିଲେ ଯେ ପାଣି ଜମୁଥିବା ନେଇ ଜିଲା ଚିକିତ୍ସାଧିକାରୀଙ୍କୁ ଜଣାଇ ଦିଆଯାଇଛି । ଏହା ମଧ୍ୟରେ ଉକ୍ତ ଖାଲୁଆ ଅଞ୍ଚଳକୁ ଉଚ୍ଚା କରାଯାଇ ଡ୍ରେନେଜ ବ୍ୟବସ୍ଥା କରାଯିବା ଯୋଜନା କରାଯାଇଥିବା ସେ କହିଛନ୍ତି।
