ମୁମ୍ବାଇ: ବଲିଉଡ୍ର ଲୋକପ୍ରିୟ ସସ୍ପେନ୍ସ-ଥ୍ରିଲର୍ ଫ୍ରାଞ୍ଚାଇଜ ‘ଦୃଶ୍ୟମ’ର ତୃତୀୟ ଭାଗକୁ ନେଇ ଦର୍ଶକଙ୍କ ଉତ୍ସାହ ବଢ଼ିବାରେ ଲାଗିଛି। ଅଜୟ ଦେବଗନଙ୍କ ଅଭିନୀତ ‘ଦୃଶ୍ୟମ ୩’ ୨ ଅକ୍ଟୋବର ଅର୍ଥାତ୍ ଗାନ୍ଧୀ ଜୟନ୍ତୀ ଅବସରରେ ସାରା ବିଶ୍ୱର ସିନେମା ହଲ୍ରେ ରିଲିଜ ହେବାକୁ ଯାଉଛି।
ଫିଲ୍ମକୁ ନେଇ ଏବେଠାରୁ ବକ୍ସ ଅଫିସ୍ରେ ବଡ଼ ଆଶା ରହିଛି। ‘ଦୃଶ୍ୟମ ୩’ ପ୍ରଥମ ଦିନରେ ଭାରତରେ ୫୩ କୋଟି ଟଙ୍କାର ନେଟ କଲେକ୍ସନ କରିବାକୁ ଟାର୍ଗେଟ ରଖିଛି। ଏପରି ହେଲେ ଏହା ଅଜୟ ଦେବଗନଙ୍କ ସବୁଠାରୁ ବଡ଼ ଓପନିଂ ଦେଇଥିବା ଫିଲ୍ମଗୁଡ଼ିକ ମଧ୍ୟରେ ସାମିଲ ହୋଇପାରେ।
୨ ଅକ୍ଟୋବର ଛୁଟି ଦିନରେ ଫିଲ୍ମ ରିଲିଜ ହେଉଥିବାରୁ ଏହାର ଓପନିଂ କଲେକ୍ସନକଚ ଫାଇଦା ମିଳିବାର ଆଶା ରହିଛି। ‘ଦୃଶ୍ୟମ’ ଫ୍ରାଞ୍ଚାଇଜ୍ର ନିଜସ୍ବ ଫ୍ୟାନ ବେସ ଥିବାରୁ ଫିଲ୍ମର ପ୍ରଥମ ଦିନର କଲେକ୍ସନକୁ ନେଇ ମଧ୍ୟ ଆଶା ବଢ଼ିଛି। ତେବେ ଏପର୍ଯ୍ୟନ୍ତ ଫିଲ୍ମର ଆଡଭାନ୍ସ ବୁକିଂ ଆରମ୍ଭ ହୋଇନାହିଁ। ରିଲିଜକୁ ଆହୁରି କିଛି ଦିନ ବାକି ଥିବାରୁ ଆଗାମୀ ଦିନରେ ଆଡଭାନ୍ସ ବୁକିଂର ଟ୍ରେଣ୍ଡ ଉପରେ ନଜର ରହିବ।
‘ଦୃଶ୍ୟମ ୩’ରେ ଅଜୟ ଦେବଗନଙ୍କ ସହ ତବୁ ଓ ଶ୍ରିୟା ସରନ ନିଜ ନିଜ ପୁରୁଣା ଚରିତ୍ରରେ ନଜର ଆସିବେ। ଅନ୍ୟପକ୍ଷରେ ‘ଦୃଶ୍ୟମ ୨’ରେ ଆଇଜି ତରୁଣ ଅହଲାୱତଙ୍କ ଭୂମିକାରେ ନଜର ଆସିଥିବା ଅକ୍ଷୟ ଖାନ୍ନା ଏଥର ଫିଲ୍ମରେ ନାହାନ୍ତି।ଅକ୍ଷୟଙ୍କ ସ୍ଥାନରେ ଏଥର ଜୟଦୀପ ଅହଲାୱତଙ୍କ ଏଣ୍ଟ୍ରି ହୋଇଛି। ସେ ଜଣେ ଦକ୍ଷ ଓ କଠୋର ତଦନ୍ତକାରୀ ଅଧିକାରୀଙ୍କ ଭୂମିକାରେ ଅଜୟ ଦେବଗନଙ୍କ ଚରିତ୍ରକୁ ଚ୍ୟାଲେଞ୍ଜ କରୁଥିବା ଦେଖାଯିବେ।
‘ଦୃଶ୍ୟମ’ ଫ୍ରାଞ୍ଚାଇଜ୍ର ପୂର୍ବ ଦୁଇଟି ଭାଗ ଦର୍ଶକଙ୍କ ମଧ୍ୟରେ ବେଶ ଲୋକପ୍ରିୟ ହୋଇଥିଲା। ୨୦୧୫ରେ ରିଲିଜ ହୋଇଥିବା ‘ଦୃଶ୍ୟମ’ ଏବଂ ୨୦୨୨ରେ ଆସିଥିବା ‘ଦୃଶ୍ୟମ ୨’କୁ ଦର୍ଶକଙ୍କ ଭଲ ପ୍ରତିକ୍ରିୟା ମିଳିଥିଲା।
ବିଶେଷକରି ‘ଦୃଶ୍ୟମ ୨’ ବକ୍ସ ଅଫିସରେ ୨୪୦ କୋଟି ଟଙ୍କାରୁ ଅଧିକ ନେଟ ବ୍ୟବସାୟ କରିଥିଲା। ଏବେ ତୃତୀୟ ଭାଗକୁ ନେଇ ଦର୍ଶକଙ୍କ ମଧ୍ୟରେ ଉତ୍ସାହ ରହିଥିବାବେଳେ ଅଜୟ ଦେବଗନଙ୍କ ‘ଦୃଶ୍ୟମ ୩’ ବକ୍ସ ଅଫିସ୍ରେ କିପରି ପ୍ରଦର୍ଶନ କରୁଛି, ତାହା ଉପରେ ସମସ୍ତଙ୍କ ନଜର ରହିବ।
Dharitri – Odisha’s No.1 Odia Daily
