ହାଟଡିହୀ, ୧୦।୧୨(ଡି.ଏନ.ଏ.)- ସମାଜସେବା କରିବା ସକାଶେ ଯୁବଗୋଷ୍ଠୀଙ୍କୁ ଉତ୍ସାହିତ କରି ବେଶ୍ ଚର୍ଚ୍ଚାକୁ ଆସିଛନ୍ତି ଉମାକାନ୍ତ। ସେ ନିଜ ଅଞ୍ଚଳର ୧୫୦ରୁ ଊର୍ଦ୍ଧ୍ୱ ଯୁବକଙ୍କୁ ଏକାଠି ନିଜ ଗ୍ରାମ କେନ୍ଦୁଝର ଜିଲା ହାଟଡିହୀ ବ୍ଲକ ସୁଲଣରେ ମା’ ତାରିଣୀ ସେବା ସଂସ୍ଥାନ ନାମରେ ଏକ ସଂଗଠନ ଗଢିଛନ୍ତି। ଏହି ସଂସ୍ଥା ଜରିଆରେ ସେ ଗରିବ ଓ ଅସହାୟଙ୍କ ପ୍ରତି ସହାୟତାର ହାତ ବଢାଇବା ସହ ପରିବେଶ ସୁରକ୍ଷା ଲାଗି ବୃକ୍ଷରୋପଣ ଭଳି ବିଭିନ୍ନ କାର୍ଯ୍ୟ କରୁଛନ୍ତି। ନିଜ ଗାଁ ସମେତ ଆଖପାଖ ଅଞ୍ଚଳକୁ ସବୁଜିମା ମଣ୍ଡିତ କରିବା ଲକ୍ଷ୍ୟରେ ଆଗକୁ ଆଗକୁ ପାଦ ବଢାଇ ଚାଲିଛନ୍ତି ଏହି ଯୁବ ଗୋଷ୍ଠୀ । ସେମାନେ ଗରିବ ରୋଗୀଙ୍କୁ ବିଭିନ୍ନ ଡାକ୍ତରଖାନା ନେଇ ଜରୁରିକାଳୀନ ଚିକତ୍ସାସେବା ଯୋଗାଇବା ସହ ନିୟମିତ ରକ୍ତଦାନ ଶିବିର ଆୟୋଜନ କରି ଆସୁଛନ୍ତି। ଆଗାମୀ ଦିନରେ ବୃକ୍ଷରୋପଣ କାର୍ଯ୍ୟକ୍ରମକୁ ବ୍ୟାପକ କରିବା ସହ ସେବାମୂଳକ କାର୍ଯ୍ୟ ଜାରି ରଖିବା ସକାଶେ ଏହି ଯୁବଗୋଷ୍ଠୀ ସଙ୍କଳ୍ପ ନେଇ ଆଖପାଖ ଗାଁର ଯୁବଗୋଷ୍ଠୀ ଲାଗି ପ୍ରେରଣା ସାଜିଛନ୍ତି।
ସେବା କାର୍ଯ୍ୟ କଲେ ଯେଉଁ ଆତ୍ମସନ୍ତୋଷ ମିଳେ, ସେଭଳି ଆନନ୍ଦ ଆଉ କେଉଁଥିରୁ ମିଳେନି । ବର୍ତ୍ତମାନର ଯୁବଗୋଷ୍ଠୀ ଚାକିରି ପଛରେ ଗୋଡାଇ ସେବାମୂଳକ କାର୍ଯ୍ୟରୁ ଦୂରେଇ ରହୁଛନ୍ତି, ଯାହାକି ଏକ ବିଡମ୍ବନା। ସେ ଛାତ୍ର ଜୀବନରୁ ସେବାକାର୍ଯ୍ୟ କରିବା ଲାଗି ସଙ୍କଳ୍ପ ନେଇ ପରେ ଅନ୍ୟମାନଙ୍କୁ ପ୍ରଭାବିତ କରି ସେମାନଙ୍କ ଦୁଃଖସୁଖରେ ସାଥୀ ହେବା ସହ ଗରିବ ଲୋକଙ୍କୁ ସହାୟତା କରି ଆସୁଛନ୍ତି। ସରକାରୀ ସହାୟତାକୁ ଅପେକ୍ଷା ନ କରି ସେମାନେ ନିଜ ଚେଷ୍ଟାରେ ଏହି କାର୍ଯ୍ୟ କରୁଛନ୍ତି। ଛାତ୍ର ଜୀବନରୁ ସାଂଗଠନିକ ଦକ୍ଷତାର ପରିଚୟ ଦେଇଥିବା ଉମାକାନ୍ତ ଏହି ସୂଚନା ଦେଇ କହିଛନ୍ତି, ଜଣେ ଅସହାୟ ବୃଦ୍ଧ ରାସ୍ତାରେ ଗୁରୁଣ୍ଡି ଗୁରୁଣ୍ଡି ଯାଉଥିବା ସେ ଦେଖି ବ୍ୟଥିତ ହୋଇଥିଲେ। ଏହା ତାଙ୍କ ମାନସିକ ସ୍ଥିତିକୁ ପ୍ରଭାବିତ କରିଥିଲା। ସେବେ ଠାରୁ ସେବା, ବୃକ୍ଷରୋପଣ ଓ ରକ୍ତଦାନକୁ ସେ ନିଜ ଜୀବନର ଲକ୍ଷ୍ୟ ବୋଲି ବାଛି ନେଇଛନ୍ତି।
କେନ୍ଦୁଝର ଜିଲା ହାଟଡିହୀ ବ୍ଲକ ସୁଲଣ ଗ୍ରାମର କୃଷ୍ଣଚନ୍ଦ୍ର ରାଉତଙ୍କ ପୁଅ ଉମାକାନ୍ତ। ବୟସ ୨୬ ବର୍ଷ ହେବ। ଭଦ୍ରକ ବିଏନଏମଏ ମହାବିଦ୍ୟାଳୟରୁ ଯୁକ୍ତ ୩ ବାଣିଜ୍ୟ ପାସ୍ କରି ୨୦୧୪ରୁ ଡାକ ବିଭାଗ ଅଧୀନରେ କାର୍ଯ୍ୟ କରୁଛନ୍ତି। ଚାକିରି ତାଙ୍କ ବୃତ୍ତି ହେଲେ ବି ସେ ଅବସର ସମୟକୁ ସମାଜସେବା କାର୍ଯ୍ୟରେ ଲଗାଇଆସୁଛନ୍ତି। ନିଜ ଗାଁ ଅନୁଷ୍ଠାନ ବ୍ୟତୀତ ସେ ପ୍ରାୟ ୩୦ଟି ବିଭିନ୍ନ ଅନୁଷ୍ଠାନ ସହିତ ଜଡିତ ରହିଛନ୍ତି। ନିଜ ଗ୍ରାମ ସଂଗଠନ ଜରିଆରେ ଅଦ୍ୟାବଧି ସେ ଦୁଇ ଶହରୁ ଅଧିକ ଅସହାୟ ଗରିବଙ୍କୁ ଆନନ୍ଦପୁର, କେନ୍ଦୁଝର, କଟକ, ଭୁବନେଶ୍ୱର ପ୍ରଭୃତି ସ୍ଥାନର ଡାକ୍ତରଖାନାକୁ ନେଇ ଚିକିତ୍ସା କରାଇଛନ୍ତି। ପରିବେଶରେ ସନ୍ତୁଳନ ରକ୍ଷା ସହ ପ୍ଲାଷ୍ଟିକ୍ ମୁକ୍ତ ସମାଜ ଗଠନ ଲାଗି ତାଙ୍କ ସଙ୍ଗଠନ ସଚେତନତା ସୃଷ୍ଟି କରୁଛି। ଭିନ୍ନ ଶିକ୍ଷାନୁଷ୍ଠାନର ଛାତ୍ରୀଛାତ୍ରଙ୍କୁ ବୃକ୍ଷରୋପଣ ଲାଗି ଉତ୍ସାହିତ କରିବା ସହିତ ବିଭିନ୍ନ ଗ୍ରାମକୁ ଯାଇ ଯୁବପିଢିଙ୍କୁ ଏଥିଲାଗି ଉତ୍ସାହିତ କରୁଛନ୍ତି। ଅଦ୍ୟାବଧି ସେମାନେ ବିଭିନ୍ନ ସ୍ଥାନରେ ୨ ଶହରୁ ଅଧିକ ବୃକ୍ଷରୋପଣ କରି ସେଗୁଡିକର ଯତ୍ନ ନେଉଛନ୍ତି। ମା’ ତାରିଣୀ ସେବା ସଂସ୍ଥାନର ସମସ୍ତ ସଦସ୍ୟ ଏଭଳି ସମାଜସେବା କାର୍ଯ୍ୟ ଲାଗି ଅଞ୍ଚଳବାସୀଙ୍କ ପ୍ରଶଂସାର ପାତ୍ର ହୋଇପାରିଛନ୍ତି। ଜିଲା ବ୍ୟତୀତ ବାହାର ଜିଲାର ବିଭିନ୍ନ ଅନୁଷ୍ଠାନ ତରଫରୁ ଏଥିଲାଗି ଉମାକାନ୍ତଙ୍କୁ ମଳିଛି ବହୁ ସମ୍ବର୍ଦ୍ଧନା ଓ ସମ୍ମାନ।
