ଭଞ୍ଜନଗର,୨୯ା୮(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡ ଅନ୍ତର୍ଗତ ପିଏମ ସରକାରୀ ଉଚ୍ଚ ବିଦ୍ୟାଳୟ, ମୁଜାଗଡ଼ ଏବଂ କବିସମ୍ରାଟ ଉଚ୍ଚ ମାଧ୍ୟମିକ ବିଦ୍ୟାଳୟ, କୁଲାଡ଼ରେ ନିର୍ବାଚନ ସାକ୍ଷରତା କ୍ଲବ ପକ୍ଷରୁ ନିର୍ବାଚନୀ ସଚେତନତାମୂଳକ ଶନିବାର ଅନୁଷ୍ଠିତ ହୋଇଯାଇଛି।
ଭଞ୍ଜନଗର ଉପଜିଲାପାଳ ଉମାଶଙ୍କର ବେହେରାଙ୍କ ଅଧ୍ୟକ୍ଷତାରେ ମୁଜାଗଡ଼ ଓ କୁଲାଡ଼ଠାରେ ଆୟୋଜିତ ଏହି କାର୍ଯ୍ୟକ୍ରମରେ, ଡେପୁଟୀ କଲେକ୍ଟର ରଚିତା ମହାପାତ୍ର, ବିଡିଓ ଭାରତୀ ଦେବୀ, ଅନ୍ୟାନ୍ୟ ପଦାଧିକାରୀ, ଉଭୟ ବିଦ୍ୟାଳୟର ପ୍ରଧାନଶିକ୍ଷକ, ଅଧ୍ୟାପକ-ଅଧ୍ୟାପିକା, ଶିକ୍ଷୟିତ୍ରୀ-ଶିକ୍ଷକ, ନିର୍ବାଚନ ସାକ୍ଷରତା କ୍ଲବ୍ ସଦସ୍ୟ ଏବଂ ବହୁ ସଂଖ୍ୟକ ଛାତ୍ରୀଛାତ୍ର ଯୋଗଦେଇଥିଲେ। ଏହି ଅବସରରେ ଉପଜିଲାପାଳ ବେହେରା ଛାତ୍ରୀଛାତ୍ରଙ୍କୁ ଗଣତନ୍ତ୍ରରେ ମତଦାନର ଗୁରୁତ୍ୱ, ନିର୍ବାଚନ ପ୍ରକ୍ରିୟା ଏବଂ ଜଣେ ଦାୟିତ୍ୱଶୀଳ ନାଗରିକ ଭାବେ ସେମାନଙ୍କର ଭୂମିକା ସମ୍ପର୍କରେ ସଚେତନ କରାଇଥିଲେ। ଯୁବପିଢ଼ି ମଧ୍ୟରେ ନିର୍ବାଚନୀ ସାକ୍ଷରତା ବୃଦ୍ଧି କରିବା ସହ ଭବିଷ୍ୟତରେ ସଚେତନ, ସକ୍ରିୟ ଓ ଦାୟିତ୍ୱବାନ ଭୋଟର ଭାବେ ନିଜର ଭୂମିକା ନିର୍ବାହ କରିବାକୁ ସେ ଆହ୍ବାନ ଦେଇଥିଲେ।
କାର୍ଯ୍ୟକ୍ରମରେ ମତଦାତା ପଞ୍ଜୀକରଣ, ଭୋଟର ତାଲିକାରେ ନାମ ସଂଯୋଜନ ଓ ସଂଶୋଧନ, ନିର୍ଭୀକ ଓ ନିରପେକ୍ଷ ମତଦାନ, ନୈତିକ ମତଦାନ ଆଦି ବିଷୟରେ ଛାତ୍ରୀଛାତ୍ରଙ୍କୁ ବିସ୍ତୃତ ଭାବେ ଅବଗତ କରାଯାଇଥିଲା। ନିର୍ବାଚନ ସାକ୍ଷରତା କ୍ଲବ ମାଧ୍ୟମରେ ଛାତ୍ରୀଛାତ୍ରଙ୍କ ମଧ୍ୟରେ ଗଣତାନ୍ତ୍ରିକ ମୂଲ୍ୟବୋଧ, ନିର୍ବାଚନୀ ସଚେତନତା ଏବଂ ଭୋଟର ଭାବେ ନିଜର ଅଧିକାର ଓ କର୍ତ୍ତବ୍ୟ ସମ୍ପର୍କରେ ଜ୍ଞାନ ବୃଦ୍ଧି ଉପରେ ଗୁରୁତ୍ୱ ଦିଆଯାଇଥିଲା।ଏହାସହ ଛାତ୍ରୀଛାତ୍ରଙ୍କୁ ନିର୍ବାଚନରେ ଟଙ୍କା, ଉପହାର କିମ୍ବା କୌଣସି ପ୍ରଲୋଭନର ପ୍ରଭାବରୁ ମୁକ୍ତ ରହି ସଚେତନ ଓ ନୈତିକ ଭାବେ ମତଦାନ କରିବାର ଗୁରୁତ୍ୱ ବୁଝାଇ ଦିଆଯାଇଥିଲା।
ଛାତ୍ରୀଛାତ୍ର ମଧ୍ୟ ନିର୍ବାଚନ ସଚେତନତା ସମ୍ପର୍କିତ ବିଭିନ୍ନ ଆଲୋଚନାରେ ସକ୍ରିୟ ଭାବେ ଅଂଶଗ୍ରହଣ କରିଥିଲେ।
ଶେଷରେ ଛାତ୍ରୀଛାତ୍ର ସଚେତନ ଓ ଦାୟିତ୍ୱବାନ ନାଗରିକ ହେବା, ଗଣତାନ୍ତ୍ରିକ ପ୍ରକ୍ରିୟାକୁ ସମ୍ମାନ କରିବା ଏବଂ ନିର୍ବାଚନୀ ସଚେତନତା ବୃଦ୍ଧିରେ ନିଜର ଅବଦାନ ରଖିବା ପାଇଁ ମତଦାତା ସଚେତନତା ଶପଥ ଗ୍ରହଣ କରିଥିଲେ। ମୁଜାଗଡ଼ ଓ କୁଲାଡ଼ରେ ଆୟୋଜିତ ଏହି କାର୍ଯ୍ୟକ୍ରମ ଛାତ୍ରୀଛାତ୍ରଙ୍କ ମଧ୍ୟରେ ନିର୍ବାଚନୀ ସାକ୍ଷରତା, ଗଣତାନ୍ତ୍ରିକ ଚେତନା ଓ ଦାୟିତ୍ୱବୋଧ ବୃଦ୍ଧି କରିବା ଦିଗରେ ଏକ ସାର୍ଥକ ପଦକ୍ଷେପ ଭାବେ ପରିଗଣିତ ହୋଇଥିଲା।
