ଉଦଳା,୨୪।୮(ସନ୍ତୋଷ ବାଛିନୀ): ଘର ଭିତରୁ ଯୁବତୀଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ଉଦଳା ଥାନା ଏନଏସି ୧୦ ନମ୍ବର ୱାର୍ଡରେ ଏଭଳି ଅଭାବନୀୟ ଘଟଣା ଘଟିଛି । ସଂଜିତ କୁମାର ସାହୁ ତାଙ୍କ ପୁଅ ଏବଂ ସ୍ତ୍ରୀଙ୍କ ସହିତ ମନ୍ଦିର ଯାଇଥିଲେ । ଘରେ ଏକୁଟିଆ ତାଙ୍କ ଝିଅ ଅମ୍ବିକା ସାହୁ ରହିଥିଲେ । ହେଲେ ମନ୍ଦିରରୁ ଘରକୁ ଫେରିବା ପରେ ଝିଅ ଘର ଭିତରେ କବାଟ କିଳି ରହିଥିବା ଦେଖିବାକୁ ପାଇଥିଲେ ସଂଜିତ।
ଝିଅକୁ ଅନେକ ଥର ଡାକିବା ସହିତ ଘରର କବାଟ ବାଡେଇଥିଲେ। ହେଲେ ଝିଅ କବାଟ ଖୋଲି ନ ଥିଲା। ଯାହା ପରେ ଉକ୍ତ ଘର ସ୍କାଏ ଲାଇଟ ଆଡୁ ଦେଖିବା ପରେ ଝିଅକୁ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲେ। ତାପରେ ଘରର କବାଟ ଭାଙ୍ଗି ଘର ଭିତରୁ ଝିଅକୁ ଝୁଲନ୍ତା ଅବସ୍ଥାରେ ଉଦ୍ଧାର କରି ଚିକିତ୍ସା ନିମନ୍ତେ ଉଦଳା ମେଡିକାଲରେ ଭର୍ତ୍ତି କରିଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ତେବେ ଏକ ମାସ ପୂର୍ବରୁ ଅମ୍ବିକାଙ୍କ ଲଗ୍ନଧରା ସରିଥିବା ବେଳେ ସବୁ କିଛି ଠିକ ଥିଲା। ତେବେ କଣ ପାଇଁ ଅମ୍ବିକା ଏଭଳି ଚରମ ନିଷ୍ପତ୍ତି ନେଲେ ତାହା ଏବେ ବି ସନ୍ଦେହରେ। ଖବର ପାଇ ଉଦଳା ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
