ନୂଆପଡ଼ା ଅଫିସ୍, ୨।୧: ନୂଆପଡ଼ା ଜିଲା ଖଡ଼ିଆଳ ଥାନା ଘରଧରା ଗ୍ରାମରେ ପିଇବା ପାଣି ସମସ୍ୟା ଦେଖାଦେଇଥିବାରୁ ଜଣେ ଯୁବକ ରବିବାର ମୋବାଇଲ ଟାୱାର ଉପରେ ଚଢ଼ି ପ୍ରତିବାଦ କରିଛନ୍ତି।
ଗ୍ରାମରେ ୩ଟି ନଳକୂପ ରହିଛି। ୨ଟିରୁ ଫ୍ଲୋରାଇଡ୍ ଯୁକ୍ତ ପାଣି ବାହାରୁଥିବାରୁ ବ୍ୟବହାର ଅନୁପଯୋଗୀ। ଅନ୍ୟଟି ଅଙ୍ଗନୱାଡ଼ି କେନ୍ଦ୍ର ପରିସରରେ ରହିଛି। ସେହି ନଳକୂପ ଉପରେ ଗାଁ ଲୋକେ ନିର୍ଭର କରନ୍ତି। ସମୟ ସମୟରେ ଅଙ୍ଗନୱାଡ଼ି କର୍ମୀ ଗେଟ୍ ବନ୍ଦ କରିଦେଉଥିବାରୁ ଗାଁ ଲୋକଙ୍କୁ ପାଣି ନେବାରେ ଅସୁବିଧା ହେଉଛି। ତେଣୁ ଗାଁର ହେମନ୍ତ ରଣା ନିକଟରେ ଥିବା ମୋବାଇଲ ଟାୱାର ଉପରେ ଚଢ଼ି ଏହାର ପ୍ରତିବାଦ କରିଥିଲେ। ଅଙ୍ଗନୱାଡ଼ି ଗେଟ୍ ଖୋଲା ରଖିବା ପାଇଁ ଚିତ୍କାର କରିଥିଲେ। ଯୁବକଙ୍କ ଚିତ୍କାର ଶୁଣି ଗ୍ରାମବାସୀ ଘଟଣାସ୍ଥଳରେ ପହଞ୍ଚି ତାଙ୍କୁ ଓହ୍ଲାଇ ଆସିବାକୁ କହିଥିଲେ। ମାତ୍ର ସେ ଶୁଣି ନ ଥିଲେ। ଖବରପାଇ ଖଡ଼ିଆଳ ଥାନା ପୋଲିସ ଓ ଅଗ୍ନିଶମ କର୍ମଚାରୀ ପହଞ୍ଚତ୍ ତାଙ୍କୁ ବୁଝାଶୁଝା କରିଥିଲେ। ଏକ ଘଣ୍ଟାରୁ ଊର୍ଦ୍ଧ୍ୱ ସମୟ ଟାୱାର ଉପରେ ରହିବା ପରେ ହେମନ୍ତ ତଳକୁ ଓହ୍ଲାଇ ଆସିଥିଲେ।
