ନୂଆଦିଲ୍ଲୀ,୧୧।୧୦: କକ୍ରୋଚ ଜନତା ପାର୍ଟି (ସିଜେପି) ପକ୍ଷରୁ ରବିବାର ସକାଳ ୧୦ଟାରେ ଜନ୍ତରମନ୍ତରଠାରେ ପ୍ରତିବାଦ ପ୍ରଦର୍ଶନ କରିବାକୁ ଆହୱାନ ଦିଆଯାଇଛି। ଏହାକୁ ଦୃଷ୍ଟିରେ ରଖି ଦିଲ୍ଲୀ ପୋଲିସ ଟ୍ରାଫିକ ଆଡଭାଇଜରି ଜାରି କରିଛି। ପୁଣିଥରେ ପ୍ରଦର୍ଶନ ହେବାର ସମ୍ଭାବନା ଥିବାରୁ ଜନ୍ତରମନ୍ତର ଓ ଏହାର ଆଖପାଖ ଅଞ୍ଚଳରେ ପୋଲିସ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।
ସିଜେପି ନେତା ଅଜିଙ୍କ୍ୟ ସିନ୍ଦେ କହିଛନ୍ତି ଯେ, ରବିବାର ଦଳର କର୍ମୀ ଓ ପ୍ରଦର୍ଶନକାରୀମାନେ ପୁଣିଥରେ ଜନ୍ତରମନ୍ତର ଅଭିମୁଖେ ଯାତ୍ରା କରିବେ। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଆନ୍ଦୋଳନ ଜାରି ରହିବ ବୋଲି ସେ ଘୋଷଣା କରିଛନ୍ତି। ଶନିବାର ଏକ ଖବରଦାତା ସମ୍ମିଳନୀରେ ସେ ଏହି ସୂଚନା ଦେଇଥିଲେ।
ପୋଲିସ ସୂତ୍ର ଅନୁଯାୟୀ, ପ୍ରଦର୍ଶନକୁ ଦୃଷ୍ଟିରେ ରଖି ଜନ୍ତରମନ୍ତର ଏବଂ ଏହାର ଆଖପାଖ ଅଞ୍ଚଳରେ ପୋଲିସ ମୁତୟନ ରହିବେ। ଆନ୍ଦୋଳନରେ ସାମିଲ ହେଉଥିବା ସଂଗଠନ ଓ ସେମାନଙ୍କ ଗତିବିଧି ଉପରେ ମଧ୍ୟ ପୁଲିସ ନଜର ରଖିବ। ଅନ୍ୟପକ୍ଷରେ, ଦିଲ୍ଲୀ ମେଟ୍ରୋ ରେଳ ନିଗମ (ଡିଏମଆରସି) ପକ୍ଷରୁ ସୂଚନା ଦିଆଯାଇଛି ଯେ, ଦିଲ୍ଲୀ ମେଟ୍ରୋ ନେଟୱର୍କର ସମସ୍ତ ଷ୍ଟେଶନର ପ୍ରବେଶ ଓ ପ୍ରସ୍ଥାନ ଦ୍ୱାର ଖୋଲାଯାଇଛି। ସମସ୍ତ ଷ୍ଟେଶନରେ ଯାତ୍ରୀଙ୍କ ପାଇଁ ଇଣ୍ଟରଚେଞ୍ଜ ସୁବିଧା ମଧ୍ୟ ଉପଲବ୍ଧ ରହିଛି।
ସୂତ୍ର ଅନୁଯାୟୀ, ସିଜେପି ନେତାଙ୍କୁ ଛାଡ଼ି ଅଟକ କେନ୍ଦ୍ରରେ ରଖାଯାଇଥିବା ଅନ୍ୟ ସମସ୍ତଙ୍କୁ ଦିଲ୍ଲୀ ପୋଲିସ ମୁକ୍ତ କରିଛି। ସିଜେପି ନେତାଙ୍କ ମାମଲାରେ ଆଇନଗତ ପ୍ରକ୍ରିୟା ଅନୁସରଣ କରାଯିବ ବୋଲି କୁହାଯାଇଛି।
ପ୍ରଦର୍ଶନ ସମୟରେ ଅଟକ ରଖାଯାଇଥିବା ଅରବିନ୍ଦ କେଜ୍ରିୱାଲ ଓ ମମତା ବାନାର୍ଜୀଙ୍କୁ ମଧ୍ୟ ମୁକ୍ତ କରାଯାଇଛି। ଅରବିନ୍ଦ କେଜ୍ରିୱାଲଙ୍କୁ ଜାଫରାବାଦ ଥାନାରୁ ଏବଂ ମମତା ବାନାର୍ଜୀଙ୍କୁ ଦ୍ୱାରକା ଥାନାରୁ ଛାଡ଼ି ଦିଆଯାଇଥିବା ଖବରରେ ଉଲ୍ଲେଖ ରହିଛି। ସିଜେପି ନେତା ଅଜିଙ୍କ୍ୟ ସିନ୍ଦେଙ୍କ କହିବା ଅନୁଯାୟୀ, ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ଇସ୍ତଫା ନଦେବା ପର୍ଯ୍ୟନ୍ତ ଦଳର ପ୍ରତିବାଦ ଜାରି ରହିବ। ଏହି ଦାବିକୁ ନେଇ ରବିବାର ପୁଣିଥରେ ଜନ୍ତରମନ୍ତରରେ ପ୍ରଦର୍ଶନ କରିବାକୁ ଦଳ ପ୍ରସ୍ତୁତି କରିଛି।
