ନୂଆଦିଲ୍ଲୀ,୧୧।୧୦: ଆଇପିଏଲ ୨୦୨୭କୁ ନେଇ ଏବେଠାରୁ ଆରମ୍ଭ ହୋଇଗଲାଣି ଚର୍ଚ୍ଚା। ଆଗାମୀ ସିଜନ ପାଇଁ ସମସ୍ତ ୧୦ଟି ଫ୍ରାଞ୍ଚାଇଜି ନିଜ ନିଜ ଦଳକୁ ମଜଭୁତ କରିବାର ଯୋଜନା କରୁଛନ୍ତି। ଆସନ୍ତା ବର୍ଷ ଆଇପିଏଲର ୨୦ତମ ସଂସ୍କରଣ ଖେଳାଯିବାକୁ ଥିବାବେଳେ ଚଳିତ ବର୍ଷ ନଭେମ୍ବର କିମ୍ବା ଡିସେମ୍ବରରେ ଖେଳାଳି ନିଲାମ ହେବା ନେଇ ଚର୍ଚ୍ଚା ହେଉଛି। ନିଲାମ ପୂର୍ବରୁ ଫ୍ରାଞ୍ଚାଇଜିଗୁଡ଼ିକୁ ନିଜ ଦଳରୁ ରିଲିଜ ଓ ରିଟେନ କରାଯାଉଥିବା ଖେଳାଳିଙ୍କ ତାଲିକା ଦେବାକୁ ପଡ଼ିବ।
ଏହି ପରିପ୍ରେକ୍ଷୀରେ କିଛି ନାମୀ ବ୍ୟାଟରଙ୍କୁ ସେମାନଙ୍କ ଫ୍ରାଞ୍ଚାଇଜି ରିଲିଜ କରିପାରେ ବୋଲି ଆକଳନ କରାଯାଉଛି। ଏହି ତାଲିକାରେ ରାହୁଲ ତେୱତିଆ, ସୂର୍ଯ୍ୟକୁମାର ଯାଦବ, ପୃଥୱୀ ଶ’ ଓ ଅଜିଙ୍କ୍ୟ ରାହାଣେଙ୍କ ଭଳି ଖେଳାଳିଙ୍କ ନାମ ଚର୍ଚ୍ଚାରେ ରହିଛି।
୧. ରାହୁଲ ତେୱତିଆ
ଗୁଜରାଟ ଟାଇଟନ୍ସର ଅଲରାଉଣ୍ଡର ରାହୁଲ ତେୱତିଆ ଗତ କିଛି ସମୟ ଧରି ଆଶାନୁରୂପ ପ୍ରଦର୍ଶନ କରିପାରିନାହାନ୍ତି। ରାଜସ୍ଥାନ ରୟାଲ୍ସ ପକ୍ଷରୁ ଖେଳିବା ସମୟରେ ଗୋଟିଏ ଓଭରରେ ୫ଟି ଛକା ମାରି ସେ ଚର୍ଚ୍ଚାକୁ ଆସିଥିଲେ। ପରେ ଗୁଜରାଟ ଟାଇଟନ୍ସରେ ସାମିଲ ହୋଇଥିଲେ। ତେବେ ତାଙ୍କ ପ୍ରଦର୍ଶନକୁ ନେଇ ଫ୍ରାଞ୍ଚାଇଜି ଅସନ୍ତୁଷ୍ଟ ଥିଲେ ଆଗାମୀ ସିଜନ ପୂର୍ବରୁ ତାଙ୍କୁ ରିଲିଜ କରାଯାଇପାରେ।
୨. ସୂର୍ଯ୍ୟକୁମାର ଯାଦବ
ମୁମ୍ବାଇ ଇଣ୍ଡିଆନ୍ସର ଷ୍ଟାର ବ୍ୟାଟର ସୂର୍ଯ୍ୟକୁମାର ଯାଦବଙ୍କ ନାମ ମଧ୍ୟ ଏହି ତାଲିକାରେ ରହିଛି। ତାଙ୍କ ପ୍ରଦର୍ଶନକୁ ନେଇ ଫ୍ରାଞ୍ଚାଇଜି ଆଗାମୀ ସିଜନ ପାଇଁ କି ପ୍ରକାର ନିଷ୍ପତ୍ତି ନେବ, ତାହାକୁ ନେଇ ଚର୍ଚ୍ଚା ଚାଲିଛି। ତେବେ ସୂର୍ଯ୍ୟକୁମାରଙ୍କୁ ରିଲିଜ କରାଯିବା ନେଇ ଏପର୍ଯ୍ୟନ୍ତ କୌଣସି ଆଧିକାରିକ ଘୋଷଣା ହୋଇନାହିଁ।
୩. ପୃଥୱୀ ଶ’
ଦିଲ୍ଲୀ କ୍ୟାପିଟାଲ୍ସର ଓପନିଂ ବ୍ୟାଟର ପୃଥୱୀ ଶ’ଙ୍କୁ ମଧ୍ୟ ଆଗାମୀ ସିଜନ ପୂର୍ବରୁ ରିଲିଜ କରାଯାଇପାରେ ବୋଲି ଆକଳନ କରାଯାଉଛି। ପୂର୍ବ ସିଜନରେ ତାଙ୍କୁ ଅଧିକ ସୁଯୋଗ ମିଳିନଥିବାରୁ ଫ୍ରାଞ୍ଚାଇଜି ତାଙ୍କ ଭବିଷ୍ୟତକୁ ନେଇ ନୂଆ ନିଷ୍ପତ୍ତି ନେଇପାରେ।
୪. ଜାକବ ବେଥେଲ
ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ଇଂଲଣ୍ଡ ଖେଳାଳି ଜାକବ ବେଥେଲ ମଧ୍ୟ ରିଲିଜ ହେବା ନେଇ ଚର୍ଚ୍ଚାରେ ଅଛନ୍ତି। ଦଳ ପାଇଁ ଆଶାନୁରୂପ ଯୋଗଦାନ ଦେଇପାରିନଥିବାରୁ ଆରସିବି ତାଙ୍କୁ ନେଇ ନିଷ୍ପତ୍ତି ବଦଳାଇପାରେ। ତେବେ ଏହା ଏକ ସମ୍ଭାବନା ମାତ୍ର।
୫. ସରଫରାଜ ଖାନ
ଚେନ୍ନାଇ ସୁପର କିଙ୍ଗ୍ସ ପକ୍ଷରୁ ଖେଳୁଥିବା ସରଫରାଜ ଖାନ ମଧ୍ୟ ରିଲିଜ ହେବା ନେଇ ଚର୍ଚ୍ଚାରେ ଅଛନ୍ତି। ତାଙ୍କୁ ମିଳିଥିବା ସୁଯୋଗର ସେ ଆଶାନୁରୂପ ଫାଇଦା ଉଠାଇପାରିନଥିବା ଆକଳନ କରାଯାଉଛି। ଏହି କାରଣରୁ ଆଗାମୀ ନିଲାମ ପୂର୍ବରୁ ଚେନ୍ନାଇ ତାଙ୍କୁ ଦଳରୁ ବାଦ ଦେଇପାରେ।
୬. ଏଡେନ ମାର୍କ୍ରମ
ଦକ୍ଷିଣ ଆଫ୍ରିକାର ବ୍ୟାଟର ଏଡେନ ମାର୍କରମ ଲକ୍ଷ୍ନୌ ସୁପର ଜାଏଣ୍ଟସ ସହ ଜଡ଼ିତ। ତାଙ୍କ ପ୍ରଦର୍ଶନ ଓ ଦଳର ଭବିଷ୍ୟତ ଯୋଜନାକୁ ଦୃଷ୍ଟିରେ ରଖି ଫ୍ରାଞ୍ଚାଇଜି ତାଙ୍କୁ ରିଲିଜ କରିବା ନେଇ ବିଚାର କରିପାରେ ବୋଲି ଆକଳନ କରାଯାଉଛି।
ଅଜିଙ୍କ୍ୟ ରାହାଣେ:
କୋଲକାତା ନାଇଟ ରାଇଡର୍ସର ଅଧିନାୟକ ଅଜିଙ୍କ୍ୟ ରାହାଣେଙ୍କ ନାମ ମଧ୍ୟ ସମ୍ଭାବ୍ୟ ରିଲିଜ ତାଲିକାରେ ରହିଛି। ଅଧିନାୟକତ୍ୱ ଓ ବ୍ୟାଟିଂରେ ତାଙ୍କ ପ୍ରଦର୍ଶନକୁ ନେଇ ଫ୍ରାଞ୍ଚାଇଜି ନୂଆ ରଣନୀତି ଆପଣାଇପାରେ। ତେବେ ତାଙ୍କୁ ରିଲିଜ କରାଯିବା ନେଇ ଆଧିକାରିକ ସୂଚନା ଆସିନାହିଁ।
୮. ଶିମରନ ହେଟମାୟର
ରାଜସ୍ଥାନ ରୟାଲ୍ସର ବିସ୍ଫୋରକ ବ୍ୟାଟର ଶିମରନ ହେଟମାୟର୍ ଫିନିସର୍ ଭାବେ ଦଳ ପାଇଁ ଗୁରୁତ୍ୱପୂର୍ଣ୍ଣ। ତେବେ ତାଙ୍କ ପ୍ରଦର୍ଶନକୁ ନେଇ ଫ୍ରାଞ୍ଚାଇଜି ସନ୍ତୁଷ୍ଟ ନଥିଲେ ଆଗାମୀ ସିଜନ ପୂର୍ବରୁ ତାଙ୍କୁ ରିଲିଜ କରିବାର ସମ୍ଭାବନା ରହିଛି।
୯. ଶରଫେନ ରଦରଫୋର୍ଡ
ୱେଷ୍ଟଇଣ୍ଡିଜର ବ୍ୟାଟର ଶରଫେନ ରଦରଫୋର୍ଡ ଟ୍ରେଡ ଡିଲ ମାଧ୍ୟମରେ ମୁମ୍ବାଇ ଇଣ୍ଡିଆନ୍ସରେ ସାମିଲ ହୋଇଥିଲେ। ତାଙ୍କଠାରୁ ଦଳ ଅଧିକ ଆଶା ରଖିଥିବାବେଳେ ଆଶାନୁରୂପ ପ୍ରଦର୍ଶନ ନ କଲେ ତାଙ୍କୁ ରିଲିଜ କରାଯାଇପାରେ।
୧୦. ଅବଦୁଲ ସମଦ
ଲକ୍ଷ୍ନୌ ସୁପର ଜାଏଣ୍ଟସର ବ୍ୟାଟର ଅବଦୁଲ ସମଦଙ୍କୁ ମଧ୍ୟ ଆଗାମୀ ସିଜନ ପୂର୍ବରୁ ରିଲିଜ କରାଯିବା ନେଇ ଚର୍ଚ୍ଚା ହେଉଛି। ଆଇପିଏଲ ୨୦୨୬ରେ ସୁଯୋଗ ମିଳିଥିଲେ ମଧ୍ୟ ସେ ଆଶାନୁରୂପ ପ୍ରଦର୍ଶନ କରିପାରିନଥିବା ଆକଳନ କରାଯାଉଛି।
ତେବେ ଆଇପିଏଲ ୨୦୨୭ ନିଲାମ ପୂର୍ବରୁ କେଉଁ ଖେଳାଳିଙ୍କୁ କେଉଁ ଫ୍ରାଞ୍ଚାଇଜି ରିଲିଜ କରିବ, ତାହା ଆଧିକାରିକ ତାଲିକା ପ୍ରକାଶ ପାଇବା ପରେ ହିଁ ସ୍ପଷ୍ଟ ହେବ। ତେଣୁ ବର୍ତ୍ତମାନ ଏହି ନାମଗୁଡ଼ିକୁ ସମ୍ଭାବ୍ୟ ରିଲିଜ ଭାବେ ଦେଖିବା ଉଚିତ।
