ଲକ୍ଷ୍ନୌ, ୧୬।୦୭: ଶିକ୍ଷକମାନଙ୍କ ଉପସ୍ଥାନକୁ ନେଇ ସରକାର ଦେଇଥିବା ଆଦେଶ ଉପରେ ଏବେ ସ୍ଥଗିତାଦେଶ ଲାଗିଛି । ଉତ୍ତର ପ୍ରଦେଶ ସରକାର ତାଙ୍କ ଆଦେଶରେ ରୋକ ଲଗାଇଛନ୍ତି । ବର୍ତ୍ତମାନ ଏକ କମିଟି ଗଠନ କରିବାକୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥ ନିର୍ଦ୍ଦେଶ ଦେଇଛନ୍ତି । ଏହି କମିଟି ଦୁଇ ମାସ ମଧ୍ୟରେ ଶିକ୍ଷକଙ୍କ ସମସ୍ୟାର ସମାଧାନ ଉପରେ ବିଚାର କରିବେ ।
ମଙ୍ଗଳବାର ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ମୁଖ୍ୟ ଶାସନ ସଚିବ ମନୋଜ କୁମାର ସିଂଙ୍କ ସହ ସାକ୍ଷାତ ପରେ ଏହି ନିଷ୍ପତ୍ତି ନେଇଛନ୍ତି । ପୂର୍ବରୁ ଶିକ୍ଷା ବିଭାଗ ପକ୍ଷରୁ ଡିଜିଟାଲ ଉପସ୍ଥାନ ନେଇ ନୋଟିସ୍ ଜାରି କରାଯାଇଥିଲା । ଶିକ୍ଷକ ସଂଗଠନ ପକ୍ଷରୁ ଏହାକୁ ନେଇ ଲଗାତାର ବିରୋଧ ପ୍ରଦର୍ଶନ କରାଯାଇଥିଲା । ସରକାରଙ୍କ ପକ୍ଷରୁ ଡିଜିଟାଲ ଉପସ୍ଥାନକୁ ଶୀକ୍ଷଣୀୟ ଗୁଣବତ୍ତା ସହ ଯୋଡ଼ି ଦିଆଯାଇଥିଲା । କିନ୍ତୁ ଏବେ ସରକାର ଏଥିରେ ରୋକ ଲଗାଇଛନ୍ତି । ଦୁଇ ମାସ ପର୍ଯ୍ୟନ୍ତ ଏହି ନିୟମ କାର୍ଯ୍ୟକାରୀ ହେବ ନାହିଁ ବୋଲି ସରକାର କହିଛନ୍ତି ।
