ପ୍ରତିବର୍ଷ ଅଗଷ୍ଟ ୧୦ରେ ପାଳନ କରାଯାଇଆସୁଛି ‘ବିଶ୍ୱ ସିଂହ ଦିବସ’। ଜଙ୍ଗଲର ରାଜା କୁହାଯାଉଥିବା ସିଂହର ସୁରକ୍ଷା, ବଂଶ ବୃଦ୍ଧି ଏବଂ ସେମାନଙ୍କର ହ୍ରାସ ପାଉଥିବା ବାସସ୍ଥଳୀ ପ୍ରତି ଜନସଚେତନତା ସୃଷ୍ଟି କରିବା ଏହି ଦିବସର ମୂଳ ଉଦ୍ଦେଶ୍ୟ। ୨୦୧୩ ମସିହାରୁ ଏହି ବିଶେଷ ଦିବସ ପାଳନ କରାଯାଇ ଆସୁଛି। ବର୍ତ୍ତମାନ ସମୟରେ ଜଳବାୟୁ ପରିବର୍ତ୍ତନ, ବେଆଇନ ଶିକାର, ଜଙ୍ଗଲ କ୍ଷୟ ଏବଂ ମଣିଷ-ବନ୍ୟଜନ୍ତୁ ସଂଘର୍ଷ ଯୋଗୁ ଆଫ୍ରିକୀୟ ଏବଂ ଏସୀୟ ସିଂହଙ୍କ ସଂଖ୍ୟା ହ୍ରାସ ପାଇବାରେ ଲାଗିଛି। ସାରା ବିଶ୍ୱରେ ଏବେ ମାତ୍ର ୨୫,୦୦୦ରୁ କମ୍ ସିଂହ ବଞ୍ଚି ରହିଛନ୍ତି। ଭାରତରେ କେବଳ ଗୁଜରାଟର ଗିର୍ ଅଭୟାରଣ୍ୟରେ ଏସୀୟ ସିଂହ ଦେଖାଯାଉଥିବାରୁ, ଚଳିତ ବର୍ଷ ଗୁଜରାଟ ବନ ବିଭାଗ ପକ୍ଷରୁ ସିଂହ ସଂରକ୍ଷଣ ପାଇଁ ସ୍ବତନ୍ତ୍ର ପ୍ରକଳ୍ପମାନ ଆରମ୍ଭ କରାଯାଇଛି। ଜୈବ ବିବିଧତା ଏବଂ ପ୍ରାକୃତିକ ପରିବେଶର ସନ୍ତୁଳନ ରକ୍ଷା କରିବା ପାଇଁ ସିଂହମାନଙ୍କର ଅସ୍ତିତ୍ୱ ଅତ୍ୟନ୍ତ ଜରୁରୀ। ଏହି ଦିବସରେ ଆମେ ସମସ୍ତେ ସିଂହ ଏବଂ ବନ୍ୟଜନ୍ତୁ ସୁରକ୍ଷା ପାଇଁ ଏକଜୁଟ ହେବା। ଜଙ୍ଗଲ ଓ ବନ୍ୟପ୍ରାଣୀ ସୁରକ୍ଷିତ ରହିଲେ ହିଁ ମାନବ ସମାଜର କଲ୍ୟାଣ ସମ୍ଭବ। ସିଂହଙ୍କ ବଂଶ ରକ୍ଷା କରିବା ଆମ ସମସ୍ତଙ୍କର ଦାୟିତ୍ୱ।
