ପୁଣେ,୨।୭: ମହାରାଷ୍ଟ୍ର ରାଜନୀତି ସମ୍ପର୍କରେ ଏକ ବଡ଼ ଖବର ଆସିଛି। ଶରଦ ପାୱାର କଂଗ୍ରେସ ସହିତ NCP-SP ର ମିଶ୍ରଣ ସମ୍ପର୍କରେ ଚାଲିଥିବା କଳ୍ପନାଜଳ୍ପନାର ଅନ୍ତ ଘଟାଇଛନ୍ତି। NCP ର ମୁଖ୍ୟ ଶରଦ ତାଙ୍କ ଦଳ କଂଗ୍ରେସ ସହିତ ମିଶ୍ରଣ ହେବାକୁ ଯାଉଥିବା ଦାବିକୁ ଖାରଜ କରିଛନ୍ତି। ସେ ସ୍ପଷ୍ଟ ଭାବରେ କହିଛନ୍ତି ,ତାଙ୍କ ଦଳରେ କୌଣସି ବିଭାଜନ ହେବ ନାହିଁ କିମ୍ବା ଏହା କଂଗ୍ରେସ ସହିତ ମିଶ୍ରଣ ହେବ ନାହିଁ।
ବରିଷ୍ଠ କଂଗ୍ରେସ ନେତା ବିଜୟ ୱାଡେଟିୱାର ପୂର୍ବରୁ ଦାବି କରିଥିଲେ ଯେ, NCP ର ଶରଦ ପାୱାରଙ୍କ ନେତୃତ୍ୱାଧୀନ ଗୋଷ୍ଠୀ ଖୁବ ଶୀଘ୍ର ତାଙ୍କ ଦଳରେ ମିଶ୍ରଣ ହେବ। ଦିଲ୍ଲୀରେ ଦଳର ହାଇକମାଣ୍ଡଙ୍କ ସହିତ ଏ ସମ୍ପର୍କରେ ଆଲୋଚନା ଚାଲିଛି। କିନ୍ତୁ ଶରଦ ପାୱାର ଏବେ ଏପରି ସମସ୍ତ କଳ୍ପନାଜଳ୍ପନାକୁ ଖାରଜ କରିଛନ୍ତି।
ସୂଚନାଯୋଗ୍ୟ, ଶରଦ ପାୱାର ୧୯୯୯ରେ କଂଗ୍ରେସ ଛାଡି ଏକ ପୃଥକ ଦଳ ନ୍ୟାଶନାଲିଷ୍ଟ କଂଗ୍ରେସ ପାର୍ଟି (NCP) ଗଢିଥିଲେ। ୨୦୨୩ରେ NCP ବିଭାଜନ ହୋଇଥିଲା। ଶରଦ ପାୱାରଙ୍କ ଭଣଜା ଅଜିତ ପାୱାର ବିଦ୍ରୋହ କଲେ ଏବଂ ଏନସିପିର ନିୟନ୍ତ୍ରଣ ତାଙ୍କ ହାତରୁ ଚାଲିଗଲା। ପରବର୍ତ୍ତୀ ସମୟରେ ଶରଦ ପାୱାର ଏନସିପି (ଶରଦଚନ୍ଦ୍ର ପାୱାର) ପ୍ରତିଷ୍ଠା କଲେ। ଅଜିତ ପାୱାରଙ୍କ ଏନସିପି ଭାଜପା ନେତୃତ୍ୱାଧୀନ ମହାୟୁତି ମେଣ୍ଟର ଅଂଶ ହୋଇଗଲା। ଶରଦ ପାୱାରଙ୍କ ଏନସିପି ବିରୋଧୀ ଦଳ ମହା ବିକାଶ ଆଗାଡି ସହିତ ମେଣ୍ଟ କଲା।
Dharitri – Odisha’s No.1 Odia Daily
