ନୂଆଦିଲ୍ଲୀ,୮।୭: ଭାରତର ପୂର୍ବତନ ଅଧିନାୟକ, ଲୋକପ୍ରିୟ ବ୍ୟାଟ୍ସମ୍ୟାନ୍ ତଥା ବର୍ତ୍ତମାନ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କ ଆଜି ୪୯ତମ ଜନ୍ମଦିନ। ପ୍ରଶଂସକଙ୍କ ମଧ୍ୟରେ ସେ ‘ଦାଦା’, ‘କୋଲକାତାର ପ୍ରିନ୍ସ’ ଭାବେ ଜଣାଶୁଣା। ସେ ଏପରି ଜଣେ ଅଧିନାୟକ ଥିଲେ ଯିଏ ପଡ଼ିଆରେ ଅନେକ କୀର୍ତ୍ତିମାନ ସ୍ଥାପନ କରିଥିଲେ। ବିଶେଷକରି ଜଣେ ଡାହାଣହାତି ଖେଳାଳି ହୋଇଥିଲେ ହେଁ ବାମ ହାତରେ ବ୍ୟାଟିଂ କରୁଥିଲେ। ଏହା ପଛର କାହାଣୀ ନିଆରା ଥିଲା।
ଗାଙ୍ଗୁଲି ଯେତେବେଳେ ଫିଲ୍ଡିଂ କରୁଥିଲେ ସେ ଡାହାଣହାତରେ କରୁଥିଲେ। ବୋଲିଂ ସେହିଭଳି ଡାହାଣ ହାତରେ କରୁଥିଲେ। ଲେଖିବା ବେଳେ ମଧ୍ୟ ଡାହାଣ ହାତରେ ଲେଖୁଥିଲେ। ହେଲେ ବ୍ୟାଟିଂ ସବୁବେଳେ ସେ ବାମହାତରେ କରୁଥିଲେ। ଆପଣ କହିପାରନ୍ତି ଯେ ଏଭଳି ଅନେକ ଖେଳାଳି କରନ୍ତି। ମାତ୍ର ଦାଦାଙ୍କ ବାମହାତୀ ବ୍ୟାଟ୍ସମ୍ୟାନ୍ ହେବା ପଛର କାହାଣୀ ଭିନ୍ନ ଥିଲା।
ଗାଙ୍ଗୁଲିଙ୍କ ଭାଇ ସ୍ନେହାଶିଷ ପଶ୍ଚିମବଙ୍ଗର ଜଣେ ଜଣାଶୁଣା କ୍ରିକେଟର ଥିଲେ। ଯେତେବେଳେ ସୌରଭ ଦଶମ ଶ୍ରେଣୀରେ ପଢ଼ୁଥିଲେ ତାଙ୍କୁ କ୍ରିକେଟ ଏକାଡେମୀରେ ଭର୍ତ୍ତି କରାଯାଇଥିଲା। ସେ ଡାହାଣହାତୀ ଖେଳାଳି ଥିଲେ କିନ୍ତୁ ଭାଇଙ୍କ କ୍ରିକେଟ ଉପକରଣ ବ୍ୟବହାର କରିବା ଲାଗି ବାମହାତରେ ବ୍ୟାଟିଂ କରିବା ଶିଖିଥିଲେ। ସ୍ନେହାଶିଷ ବାମହାତୀ ବ୍ୟାଟ୍ସମ୍ୟାନ୍ ଥିବା ବେଳେ ଧିରେ ଧିରେ ତାଙ୍କ ସାମଗ୍ରୀ ବ୍ୟବହାର କରି ସୌରଭ ମଧ୍ୟ ବାମହାତୀ ବ୍ୟାଟ୍ସମ୍ୟାନ୍ ହୋଇଥିଲେ।
