ଉଜ୍ଜ୍ୱଳ ଆଲୋକ ପ୍ରଦାନ କରୁଥିବା ସୂର୍ଯ୍ୟଙ୍କ ରଙ୍ଗ ସୂର୍ଯ୍ୟୋଦୟ ଏବଂ ସୂର୍ଯ୍ୟାସ୍ତ ସମୟରେ ବଦଳି ଯାଇଥାଏ। ଏହି ସମୟରେ ଆକାଶ କମଳା, ଗାଢ୍ ଲାଲ କିମ୍ବା ବାଇଗଣୀ ରଙ୍ଗରେ ପରିଣତ ହୋଇଥାଏ। ଏହା ବହୁତ ସୁନ୍ଦର ଏବଂ ମନଲୋଭା ଦିଶିଥାଏ। ତେବେ ଏପରି କାହିଁକି ହୋଇଥାଏ ଜାଣନ୍ତି କି? ଯଦି ନା ତେବେ ଜାଣନ୍ତୁ ଏ ସମ୍ପର୍କରେ…
ଊନବିଂଶ ଶତାବ୍ଦୀରେ ବ୍ରିଟିଶ ପଦାର୍ଥ ବିଜ୍ଞାନୀ ଲର୍ଡ ରେଲି କହିଥିଲେ, ଆଲୋକ ବିସ୍ତାର ହେଉଛି ଏକ ପ୍ରକ୍ରିୟା, ଯେଉଁଥିରେ ସୂର୍ଯ୍ୟକିରଣ ବାୟୁମଣ୍ଡଳରେ ପ୍ରବେଶ କରେ। ଏହା ଧୂଳି ଏବଂ ମୃତ୍ତିକା କଣିକା ସହ ଧକ୍କା ହୋଇ ଚାରିଆଡ଼କୁ ବ୍ୟାପିଥାଏ।
ଏହି ସୁନ୍ଦର ଦୃଶ୍ୟ ସମୟରେ ସୂର୍ଯ୍ୟଙ୍କୁ ସିଧାସଳଖ ଖାଲି ଆଖିରେ ଦେଖନ୍ତୁ ନାହିଁ। ଏଥିପାଇଁ ଟେଲିସ୍କୋପର ବ୍ୟବହାର କରନ୍ତୁ। ନଚେତ୍ ଏହା ଆପଣଙ୍କ ଆଖିକୁ ନଷ୍ଟ କରିପାରେ। ରୟାଲ ମ୍ୟୁଜିୟମ ଗ୍ରୀନଓ୍ବିଚ୍ର ଜ୍ୟୋତିର୍ବିଜ୍ଞାନୀ ଏଡଓ୍ବାର୍ଡ ବ୍ଲୁମର କୁହନ୍ତି, ସୂର୍ଯ୍ୟକିରଣର ଅପ୍ଟିକାଲ ଗୁଣ ପୃଥିବୀର ବାୟୁମଣ୍ଡଳ ଦେଇ ଯାଇଥାଏ। ସର୍ବପ୍ରଥମେ ଆମକୁ ଆଲୋକକୁ ଜାଣିବା ଦରକାର। ଯାହା ଦୃଶ୍ୟମାନ ଆଲୋକ ସ୍ପେକ୍ଟ୍ରମର ସମସ୍ତ ରଙ୍ଗ ଯଥା ଲାଲ, କମଳା, ହଳଦିଆ, ସବୁଜ, ନୀଳ, ଗାଢ଼ ନୀଳ ଏବଂ ବାଇଗଣୀ।
ବ୍ଲୁମର କୁହନ୍ତି, ଏହା ସୂର୍ଯ୍ୟକିରଣ ବିଛାଡ଼ି ହୋଇ ପଡ଼ିବା ସହିତ ଜଡିତ। କିନ୍ତୁ ଏହା ସମାନ ଭାବରେ ବିଛୁରିତ ଭାବେ ପଡ଼େ ନାହିଁ। ପ୍ରତ୍ୟେକ ରଙ୍ଗର ନିଜସ୍ବ ତରଙ୍ଗ ଦୈର୍ଘ୍ୟ ଥାଏ, ଯେଉଁ ରଙ୍ଗକୁ ଯେପରି ଦେଖାଏ। ଉଦାହରଣ ସ୍ବରୂପ, ବାଇଗଣୀରେ ସବୁଠାରୁ କମ୍ ତରଙ୍ଗ ଦୈର୍ଘ୍ୟ ଥିବାବେଳେ ଲାଲ ଲମ୍ବା ତରଙ୍ଗର ଦୈର୍ଘ୍ୟ ଥାଏ।
