କୋଲକାତା,୩।୬: ପଶ୍ଚିମବଙ୍ଗ ବିଧାନସଭା ନିର୍ୱାଚନରେ ଶୋଚନୀୟ ପରାଜୟ ପରେ ମମତା ବାନାର୍ଜୀଙ୍କୁ ସବୁଠାରୁ ବଡ଼ ଝଟକା ଲାଗିଛି। ତାଙ୍କ ଦଳ ତୃଣମୂଳ କଂଗ୍ରେସ (TMC) ଏବେ ଦୁଇ ଭାଗରେ ବିଭକ୍ତ ହେବାକୁ ଯାଉଥିବା ସ୍ପଷ୍ଟ ଦେଖାଯାଉଛି। ବର୍ତ୍ତମାନ ପରିସ୍ଥିତି ଏପରି ହୋଇଛି ଯେ, ମମତା ବାନାର୍ଜୀଙ୍କ ହାତରେ ଦଳର କେବଳ ଦୁର୍ୱଳ ଅଂଶଟି ହିଁ ବାକି ରହିଥିବା ଜଣାପଡ଼ୁଛି।
ପଶ୍ଚିମବଙ୍ଗ ରାଜନୀତିରେ ପ୍ରଥମ ଥର ପାଇଁ କ୍ଷମତାକୁ ଆସିଥିବା ଭାରତୀୟ ଜନତା ପାର୍ଟି (BJP) ଅପେକ୍ଷା କ୍ଷମତାରୁ ବେଦଖଲ ହୋଇଥିବା ଟିଏମସିକୁ ନେଇ ଅଧିକ ଚର୍ଚ୍ଚା ଚାଲିଛି। ଏପର୍ଯ୍ୟନ୍ତ ଟିଏମସିର ଏକମାତ୍ର ସୁପ୍ରିମୋ ଭାବେ ମମତା ବାନାର୍ଜୀଙ୍କୁ ଗଣାଯାଉଥିଲା, କିନ୍ତୁ ଏବେ ଦଳରେ ଦୁଇଟି ଗୋଷ୍ଠୀ ସୃଷ୍ଟି ହୋଇଛି। ଆଶ୍ଚର୍ଯ୍ୟର କଥା ହେଉଛି, ଦଳର ସବୁଠାରୁ ଶକ୍ତିଶାଳୀ ଗୋଷ୍ଠୀଟି ଏବେ ମମତାଙ୍କ ବିରୋଧରେ ଠିଆ ହୋଇଛି।
ଟିଏମସିର ଏହି ବିଦ୍ରୋହୀ ଗୋଷ୍ଠୀର ମୁଖ୍ୟ ଚେହେରା ସାଜିଛନ୍ତି ଋତବ୍ରତ ବାନାର୍ଜୀ। ଚଳିତ ନିର୍ୱାଚନରେ କ୍ଷମତାରୁ ହଟିଥିବା ଟିଏମସି ୨୯୪ ଆସନ ବିଶିଷ୍ଟ ବିଧାନସଭାରେ ୮୦ଟି ଆସନ ଜିତି ମୁଖ୍ୟ ବିରୋଧୀ ଦଳ ଭାବେ ଉଭା ହୋଇଥିଲା। ଦଳର ଶୀର୍ଷ ନେତୃତ୍ୱ ଅନ୍ୟ ଜଣଙ୍କୁ ବିଧାନସଭାରେ ବିରୋଧୀ ଦଳ ନେତା ପଦର କ୍ଷମତା ଦେବାକୁ ଚାହୁଁଥିଲେ, କିନ୍ତୁ ଏହାକୁ ନେଇ ଅନେକ ବିଧାୟକ ଦଳର ସୁପ୍ରିମୋ ମମତା ବାନାର୍ଜୀଙ୍କୁ ବିରୋଧ କରିଥିଲେ।
ବାସ୍ତବରେ, ଟିଏମସି ପକ୍ଷରୁ ପଶ୍ଚିମବଙ୍ଗ ବିଧାନସଭାରେ ବିରୋଧୀ ଦଳ ନେତା ପଦ ପାଇଁ ବରିଷ୍ଠ ବିଧାୟକ ଶୋଭନଦେବ ଚଟ୍ଟୋପାଧ୍ୟାୟଙ୍କୁ ଚୟନ କରାଯାଇଥିଲା। ଏହି ସମ୍ୱନ୍ଧରେ ଦଳର ବିଧାୟକମାନଙ୍କ ଦସ୍ତଖତ ନିଆଯାଇଥିଲା। କିନ୍ତୁ କିଛି ବିଧାୟକ ଏହାକୁ ‘ଜାଲ ଦସ୍ତଖତ’ ବୋଲି ଦର୍ଶାଇ ବିରୋଧ କରିବା ଆରମ୍ଭ କରିଥିଲେ। ଋତବ୍ରତ ବାନାର୍ଜୀ ଏବେ ସନ୍ଦୀପନ ସାହା ଏହା ବିରୋଧରେ ବାଚସ୍ପତି (Speaker) ଙ୍କୁ ଲିଖିତ ଅଭିଯୋଗ କରିଥିଲେ।
ଏହା ପରେ ମମତା ବାନାର୍ଜୀ ଦୁଇ ବିଧାୟକଙ୍କ ଉପରେ ଦଳ ବିରୋଧୀ କାର୍ଯ୍ୟକଳାପରେ ସାମିଲ ଥିବା ଅଭିଯୋଗ ଆଣି ଦଳରୁ ବହିଷ୍କାର କରିଥିଲେ। ବର୍ତ୍ତମାନ ରାଜ୍ୟ CID ଏହି ମାମଲାର ତଦନ୍ତ କରୁଛି। ତେବେ ମମତା ବାନାର୍ଜୀଙ୍କ ଅସଲ ଅସୁବିଧା ଏହି ନିଷ୍ପତ୍ତି ପରେ ହିଁ ଆରମ୍ଭ ହୋଇଥିଲା। ବହିଷ୍କୃତ ଦୁଇ ନେତା ଦଳର ଅନ୍ୟ ବିଧାୟକମାନଙ୍କ ସହ ଯୋଗାଯୋଗ କରି ସେମାନଙ୍କୁ ନିଜ ଆଡ଼କୁ ଆଣିବାରେ ସଫଳ ହୋଇଥିଲେ।
ଏହି ଦୁଇ ନେତା ଟିଏମସିର ମୋଟ ୮୦ ଜଣ ବିଧାୟକଙ୍କ ମଧ୍ୟରୁ ୫୮ ଜଣଙ୍କ ସମର୍ଥନ ହାସଲ କରି ବିଧାନସଭାରେ ଋତବ୍ରତ ବାନାର୍ଜୀଙ୍କ ନେତୃତ୍ୱରେ ବିରୋଧୀ ଦଳ ନେତା ପଦ ପାଇଁ ଦାବି କରିଛନ୍ତି। ଏହି କ୍ରମରେ ସେମାନେ ବିଧାନସଭାରେ ଶକ୍ତି ପ୍ରଦର୍ଶନ କରିବା ସହ ନିଜ ଗୋଷ୍ଠୀକୁ ହିଁ ଅସଲ ଟିଏମସି (TMC) ବୋଲି ଦାବି କରିଛନ୍ତି।
ଏହାଦ୍ୱାରା ଟିଏମସି ଉପରେ ଏବେ ମହାରାଷ୍ଟ୍ରର ଶିବସେନା ଭଳି ସଂକଟ ମାଡ଼ି ଆସୁଛି, ଯେଉଁଠାରେ କିଛି ବର୍ଷ ପୂର୍ୱେ ଉଦ୍ଧବ ଠାକରେଙ୍କ ହାତରୁ ଦଳର ସନ୍ତକ (Symbol) ଖସିଯାଇଥିଲା। ତୃଣମୂଳ କଂଗ୍ରେସ ମଧ୍ୟ ସେହି ଦିଗରେ ଗତି କରୁଥିବା ଜଣାପଡ଼ୁଛି, ଯେଉଁଠି ଦଳ ଗଢ଼ିଥିବା ମମତା ବାନାର୍ଜୀଙ୍କ ହାତରୁ ଦଳର ନାଁ ଓ ସନ୍ତକ ଛଡ଼ାଇ ନିଆଯାଇପାରେ।
ଋତବ୍ରତ ବାନାର୍ଜୀ ଉଲୁବେରିଆ ପୂର୍ୱ ବିଧାନସଭା ଆସନରୁ ଟିଏମସି ଟିକେଟରେ ବିଧାୟକ ନିର୍ୱାଚିତ ହୋଇଛନ୍ତି। ସେ ସେଠାରେ ଭାଜପାର ରୁଦ୍ର ପ୍ରସାଦ ବାନାର୍ଜୀଙ୍କୁ ୧୧,୮୩୮ ଭୋଟରେ ପରାସ୍ତ କରିଥିଲେ। ଏହା ପୂର୍ୱରୁ ସେ ଦୁଇ ଥର ରାଜ୍ୟ ସଭା ଏମପି ରହିସାରିଛନ୍ତି। ପ୍ରଥମେ ସେ ୨୦୧୭ରେ CPI(M) ପକ୍ଷରୁ ରାଜ୍ୟ ସଭାକୁ ଯାଇଥିଲେ। ପରେ ଟିଏମସିରେ ସାମିଲ ହେବା ପରେ ୨୦୨୪ରେ ସେ ୧୫ ମାସ ପାଇଁ ଦଳ ତରଫରୁ ରାଜ୍ୟସଭା ସାଂସଦ ହୋଇଥିଲେ।
ଋତବ୍ରତ ବାନାର୍ଜୀ ଦଳରୁ ବହିଷ୍କାର ହେବା ଏହା ପ୍ରଥମ ଘଟଣା ନୁହେଁ। ଏହା ପୂର୍ୱରୁ ଦଳ ବିରୋଧୀ କାର୍ଯ୍ୟକଳାପ ପାଇଁ ତାଙ୍କୁ ସିପିଆଇ(ଏମ) ମଧ୍ୟ ଦଳରୁ ବାହାର କରିଦେଇଥିଲା। ଏହା ପରେ ସେ ଟିଏମସିରେ ଯୋଗ ଦେଇଥିଲେ।
