ନୂଆଦିଲ୍ଲୀ,୧୭।୮: ନୀତିନ ନବୀନ ତାଙ୍କ ନୂଆ ଟିମ୍ ଘୋଷଣା କରିଛନ୍ତି । ଏଥିରେ ସବୁଠାରୁ ବଡ଼ ଚର୍ଚ୍ଚାର ବିଷୟ ହୋଇଛି ଦଳର ଆଇଟି ସେଲ୍ ମୁଖ୍ୟ ପଦରେ ପରିବର୍ତ୍ତନ । ପ୍ରାୟ ୧୧ ବର୍ଷ ଧରି ଭାଜପା ଆଇଟି ସେଲ୍ର ଦାୟିତ୍ୱରେ ଥିବା ଅମିତ ମାଲବୀୟଙ୍କୁ ଏହି ପଦରୁ ହଟାଇ ତାଙ୍କ ସ୍ଥାନରେ ଦୀପକ ମହସ୍କେଙ୍କୁ ଦାୟିତ୍ୱ ଦିଆଯାଇଛି । ସେହିପରି ପ୍ରୀତି ଗାନ୍ଧୀଙ୍କୁ ଆଇଟି ସେଲ୍ର ସହ-ସଂଯୋଜକ ଭାବେ ନିଯୁକ୍ତ କରାଯାଇଛି । ଅମିତ ମାଲବୀୟ ୨୦୧୫ ମସିହାରୁ ଭାଜପା ଆଇଟି ସେଲ୍ର ଜାତୀୟ ସଂଯୋଜକ ଭାବେ କାର୍ଯ୍ୟ କରୁଥିଲେ ।
ଦୀପକ ମହସ୍କେ ଛତିଶଗଡ଼ ସହ ଜଡ଼ିତ ଭାଜପା ନେତା। ସେ ପୂର୍ବରୁ ଦଳର ଜାତୀୟ ମୁଖପାତ୍ର ଭାବେ ମଧ୍ୟ କାମ କରିଛନ୍ତି । ସାଙ୍ଗଠନିକ କାର୍ଯ୍ୟକ୍ରମ ଓ ମିଡିଆ କାର୍ଯ୍ୟକଳାପରେ ସେ ସକ୍ରିୟ ରହିଛନ୍ତି । ନିକଟ ଅତୀତରେ ତାଙ୍କୁ ଛତିଶଗଡ଼ ମେଡିକାଲ ସର୍ଭିସେସ୍ କର୍ପୋରେସନ୍ (CGMSC)ର ଅଧ୍ୟକ୍ଷ ମଧ୍ୟ କରାଯାଇଥିଲା। ସ୍ମୃତି ଇରାନୀଙ୍କୁ ସାଧାରଣ ସମ୍ପାଦକ ଏବଂ ବସୁନ୍ଧରା ରାଜେଙ୍କୁ ଉପାଧ୍ୟକ୍ଷ ଭାବେ ନିଯୁକ୍ତ କରାଯାଇଛି। ଯଦି ଦେଖିବା ନୂଆ ଟିମ୍ରେ ମହିଳା ପ୍ରତିନିଧିତ୍ୱ ପ୍ରାୟ ୫୦ ପ୍ରତିଶତରେ ପହଞ୍ଚିଛି ।
ନୂଆ ଟିମ୍ର ମହାସଚିବ ତାଲିକାରେ ସ୍ମୃତି ଇରାନୀ, ବିପ୍ଲବ କୁମାର ଦେବ, ହରିଶ ଦ୍ୱିବେଦୀ, ବିନୋଦ ତାୱଡେ, ସୁନୀଲ ବଂସଲ, ସତୀଶ ପୁନିଆ, ଗଜେନ୍ଦ୍ର ପଟେଲ ଓ ସଞ୍ଜୟ ଭାଟିଆଙ୍କୁ ସାଙ୍ଗଠନିକ ଦାୟିତ୍ୱ ଦିଆଯାଇଛି । ବିଶେଷ କଥା ହେଉଛି, ୮ ଜଣ ମହାସଚିବଙ୍କ ମଧ୍ୟରୁ ୨ ଜଣ ଉତ୍ତରପ୍ରଦେଶର ନେତା ଅଛନ୍ତି । ଆଗାମୀ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ଏହି ନିଯୁକ୍ତିକୁ ଗୁରୁତ୍ୱ ଦିଆଯାଉଛି ।
