ମୁମ୍ବାଇ, ୧୧।୭- ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଓ ବଲିଉଡ୍ର ଚର୍ଚ୍ଚିତ ଅଭିନେତ୍ରୀ ଅନୁଷ୍କା ଶର୍ମା ୨୦୧୭ ଡିସେମ୍ବରରେ ପରସ୍ପର ବିବାହ ବନ୍ଧନରେ ଆବଦ୍ଧ ହୋଇଥିଲେ। କ୍ରିକେଟ୍ ଓ ବଲିଉଡ୍ ଜଗତରେ ଏ ଯୋଡ଼ିଙ୍କୁ ସବୁଠାରୁ ଆକର୍ଷଣୀୟ ଦମ୍ପତି କୁହାଯାଏ। ଉଭୟ କୋହଲି ଓ ଅନୁଷ୍କା ସର୍ବସାଧାରଣ ସ୍ଥାନରେ ପରସ୍ପର ପ୍ରତି ନିଜର ପ୍ରେମ ଓ ପ୍ରଶଂସା ପ୍ରକାଶ କରିବାକୁ କେବେବି ପଛଘୁଞ୍ଚା ଦେଇ ନ ଥାନ୍ତି। ସେମାନେ ନିଜର ଫଟୋକୁ ସୁନ୍ଦର ସୁନ୍ଦର ହୃଦୟସ୍ପର୍ଶୀ କ୍ୟାପସନ ସହ ସୋସିଆଲ ମିଡିଆ ଇନ୍ଷ୍ଟାଗ୍ରାମରେ ପୋଷ୍ଟ କରିଥାନ୍ତି। ନିକଟରେ ଭୋଗ୍ସ ମାଗାଜିନ ପାଇଁ ଅନୁଷ୍କା ଫଟୋ ଶୁଟ୍ କରିଥିଲେ। ଅନୁଷ୍କା ଏହି ଫଟୋ ନିଜ ଇନ୍ଷ୍ଟାଗ୍ରାମରେ ପୋଷ୍ଟ କରି କ୍ୟାପସନରେ ସେ ଲେଖିଛନ୍ତି, ‘ଶୀତଳ ପବନ, ସ୍ଥିର ତରଙ୍ଗ, ମୋ ଚର୍ମରେ କିଛି ବାଲି, ପିଠିରେ ସୂର୍ଯ୍ୟ କିରଣ ଏବଂ ଲୁଣିଆ କେଶ। ଏହା ଏକ ଭଲ ଦିନ ଥିଲା।’ ଏହି ଫଟୋ ପୋଷ୍ଟ କରିବାର କିଛି ସମୟ ମଧ୍ୟରେ ଅନୁଷ୍କାର ଲକ୍ଷ ଲକ୍ଷ ପ୍ରଶଂସକ ଓ ଫଲୋଅର୍ସ ଏହାକୁ ଲାଇକ୍ କରିଥିଲେ। ସେହିଭଳି ବି-ଟାଉନରୁ ମଧ୍ୟ ତାଙ୍କୁ ବହୁତ ପ୍ରଶଂସା ମିଳିଥିଲା। କୋହଲି ମଧ୍ୟ ସ୍ତ୍ରୀଙ୍କ ଏହି ଆକର୍ଷଣୀୟ ଫଟୋରେ ମନ୍ତବ୍ୟ ଦେବାକୁ ଭୁଲି ନ ଥିଲେ। କୋହଲି କିଛି କହି ନ ଥିଲେ ମଧ୍ୟ ନିଜ ଭାବନାକୁ ବ୍ୟକ୍ତ କରିଛନ୍ତି। ବିରାଟ ଫାୟାର ଇମୋଜି ସହ ହାର୍ଟ ଇମୋଜି ଦେଇ ନିଜ ଭାବନାରେ ବହୁତ କିଛି କହିଦେଇଛନ୍ତି।
