ଦିଗପହଣ୍ଡି,୮।୭(ଅଶେଷ ନାଥ ମିଶ୍ର): ଦିଗପହଣ୍ଡି ସ୍ଥିତ ଘୋଡ଼ାହାଡ଼ ପାଣି ପଞ୍ଚାୟତ ଶୀର୍ଷ କମିଟି ପକ୍ଷରୁ ବୁଧବାର ପରିବର୍ଦ୍ଧିତ ଆଲୋଚନା ସଭା ଅନୁଷ୍ଠିତ ହୋଇଯାଇଛି । ପାଣି ପଞ୍ଚାୟତ ଶୀର୍ଷ କମିଟି କାର୍ଯ୍ୟାଳୟ ସଭାଗୃହ ଠାରେ ସଭାପତି ରମେଶ ଚନ୍ଦ୍ର ପାତ୍ର ସଭାରେ ଅଧ୍ୟକ୍ଷତା କରିଥିଲେ। ଆସନ୍ତା ୧୭ ତାରିଖରେ ଜଳ ଶୀର୍ଷ କମିଟି ପକ୍ଷରୁ ଦିଗପହଣ୍ଡି ବ୍ଳକ ଖମାରିଗାଁ ନିକଟରେ ଥିବା ଘୋଡାହାଡ଼ ଡ଼୍ୟାମର ଗେଟ୍ ପୂଜା କରାଯିବା ପରେ ଚଳିତ ଖରିଫ ଧାନ ଚାଷ ନିମନ୍ତେ ୨୪ ତାରିଖରେ ଡ଼୍ୟାମର ଉଭୟ ବାମ ଓ ଡାହାଣ କେନାଲରେ ପାଣି ଛଡାଯିବ ବୋଲି ସଭାରେ ବିସ୍ତୃତ ଆଲୋଚନା କରାଯାଇ ବିଧିବଦ୍ଧ ପ୍ରସ୍ତାବ ଗୃହୀତ କରାଯାଇଛି ।
ସଭାରେ ଚିକିଟି ଜଳସେଚନ ବିଭାଜନ ଅଧିକ୍ଷଣ ଯନ୍ତ୍ରୀ ଇଂ.ସୁବ୍ରତ କୁମାର ପଟ୍ଟନାୟକ, ଘୋଡ଼ାହାଡ଼ ଜଳସେଚନ କାର୍ଯ୍ୟାଳୟ ସହକାରୀ ନିର୍ବାହୀ ଯନ୍ତ୍ରୀ ଇଂ. ଗଙ୍ଗାଧର ଦାସ, ପୂର୍ବତନ ସରପଞ୍ଚ ତଥା ଶୀର୍ଷ କମିଟିର ପୂର୍ବତନ ସଭାପତି ବିଦ୍ୟାଧର ମହାପାତ୍ର, କୋଷାଧ୍ୟକ୍ଷ ରାମନାଥ ବିଷୋୟୀ, ସହକାରୀ ଯନ୍ତ୍ରୀ ଇଂ.କ୍ଷୀରୋଦ ବେହେରା , ଇଂ. ରାଜ କୁମାର ପ୍ରଧାନ ପ୍ରମୁଖ ମଞ୍ଚାସିନ ଥିଲେ । ସୂଚନା ଯୋଗ୍ୟ, ଗତ ୧୯୭୪ରେ ଘୋଡ଼ାହାଡ଼ ଡ଼୍ୟାମ ପ୍ରତିଷ୍ଠା କରାଯାଇଥିଲା। ତେଣୁ ଚଳିତବର୍ଷ ଡ଼୍ୟାମ ପ୍ରତିଷ୍ଠାର ସୁବର୍ଣ୍ଣ ଜୟନ୍ତୀ ପାଳନ କରାଯିବା ନିମନ୍ତେ ସଭାରେ ସର୍ବସମ୍ମତ ନିଷ୍ପତ୍ତି ନିଆଯାଇଥିଲା।
ଗଞ୍ଜାମ ଜିଲା ଦିଗପହଣ୍ଡି ଓ ସାନଖେମୁଣ୍ଡି ବ୍ଳକର ବହୁ ସଂଖ୍ୟକ ଗ୍ରାମର ଚାଷୀମାନେ ଚାଷକାର୍ଯ୍ୟ ନିମନ୍ତେ ଘୋଡାହାଡ଼ ଡ଼୍ୟାମ ଉପରେ ନିର୍ଭର କରି ଆସୁଛନ୍ତି । ଡ଼୍ୟାମର ଜଳଧାରଣ କ୍ଷମତା ୧୧୭.୮୦ ମିଟର ରହିଥିବା ବେଳେ ବୁଧବାର ସୁଦ୍ଧା ଜଳସ୍ତର ୧୧୭.୪୦ ମିଟର ଜଳ ମହଜୁଦ ରହିଛି । ଚଳିତ ବର୍ଷ ଜୁନ୍ ୧ ରୁ ଜୁଲାଇ ୧ ସୁଦ୍ଧା ବର୍ଷାର ପରିମାଣ ପାଖାପାଖି ୧ ହଜାର ମି.ମି ହେବା କଥା କିନ୍ତୁ ଚଳିତ ବର୍ଷ ସ୍ବଳ୍ପ ବର୍ଷା ଯୋଗୁଁ ଘୋଡାହାଡ଼ ଡ୍ୟାମରେ ଖରିଫ ଋତୁ ଜୁନ ୧ ରୁ ଜୁଲାଇ ୮ ସୁଦ୍ଧା ୧୯୫ ମି.ମି ବର୍ଷା ହୋଇଥିବା ରେକର୍ଡ କରାଯାଇଛି ।
ସେହିପରି ଦିଗପହଣ୍ଡି ଅଞ୍ଚଳରେ ଚଳିତ ବର୍ଷ ଜୁନ୧ରୁ ଜୁଲାଇ ୮ ତାରିଖ ସୁଦ୍ଧା ୨୦୫ ମି .ମି ବର୍ଷା ହୋଇଥିବା ଜଳସମ୍ପଦ ବିଭାଗ ପକ୍ଷରୁ ରେକର୍ଡ କରାଯାଇଛି। ବର୍ଷା ପରିମାଣ କମ୍ ଯୋଗୁଁ ଦିଗପହଣ୍ଡି ଓ ସାନଖେମୁଣ୍ଡି ବ୍ଲକ ଅଞ୍ଚଳର ଅର୍ଦ୍ଧାଧିକ ଚାଷ ଜମିରେ ଚାଷକାର୍ଯ୍ୟ ହୋଇ ପାରିନାହିଁ । ଯାହାକୁ ଦୃଷ୍ଟିରେ ରଖି ଡ୍ୟାମର ଉଭୟ ବାମ ଓ ଡାହାଣ କେନାଲ ଯୋଗେ ପାଣି ଛଡାଯିବା ପାଇଁ ସଭାରେ ସର୍ବସମ୍ମତ ନିଷ୍ପତ୍ତି ନିଆଯାଇଥିଲା । ସଭାରେ ପାଣି ପଞ୍ଚାୟତ ଶୀର୍ଷ କମିଟି ଉପସଭାପତି କିର୍ତ୍ତୀଚନ୍ଦ୍ର ଗୈାଡ, କାର୍ଯ୍ୟକର୍ତ୍ତା ତଥା ଜିଲା ପରିଷଦ ସଦସ୍ୟ ରାଧାକାନ୍ତ ମହାଙ୍କୁଡ଼, ସରପଞ୍ଚ ପ୍ରତିନିଧି ଚିତ୍ରସେନ ଗୌଡ଼ଙ୍କ ସମେତ ୨୧ ଟି ପାଣି ପଞ୍ଚାୟତ କର୍ମକର୍ତ୍ତା ଓ ସଭ୍ୟବୃନ୍ଦ ଉପସ୍ଥିତ ରହି ବିଭିନ୍ନ ଆଲୋଚନାରେ ଅଂଶଗ୍ରହଣ କରିଥିଲେ। ଜଳସେଚନ କାର୍ଯ୍ୟାଳୟ କର୍ମଚାରୀ ପ୍ରଦୀପ କୁମାର ମହାନ୍ତି, ସୁରେନ୍ଦ୍ର ନାଥ ସେଠୀ ଙ୍କ ସମେତ ଅନ୍ୟାନ୍ୟ କର୍ମଚାରୀ ବୃନ୍ଦ ସଭାକାର୍ଯ୍ୟ ପରିଚାଳନା ରେ ସହାୟତା କରିଥିଲେ।
&nbs
