ବରଗଡ଼,୯।୭(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଜଳସମ୍ପଦ ବିଭାଗର ବିବାଦ ପିଛା ଛାଡୁନାହିଁ। ଏହି ବିଭାଗ ଅଧୀନରେ ଜିଲାର ଅନେକ ସ୍ଥାନରେ ବିଭିନ୍ନ ପ୍ରକଳ୍ପ, କେନାଲ ଉନ୍ନତୀକରଣ ଓ ମରାମତି କାମ ହୋଇଛି। ମାତ୍ର ଗୋଟିଏ ପରେ ଗୋଟିଏ ଅନିୟମିତତା ପଦାକୁ ଆସିବାରେ ଲାଗିଛି। ବରଗଡ଼-ଭେଡେନ କେନାଲ ପାର୍ଶ୍ୱରେ ରହିଥିବା ବରଗଡ଼ ସହର ଘରୋଇ ବସ୍ଷ୍ଟାଣ୍ଡ ନିକଟରେ କେନାଲ ସୌନ୍ଦର୍ଯ୍ୟକରଣ ତଥା ବକ୍ସ କଣ୍ଡୁଇଟ୍ ନିର୍ମାଣ ଅନିୟମିତତାରେ ତତ୍କାଳୀନ ଅଧୀକ୍ଷଣ ଯନ୍ତ୍ରୀ, ନିର୍ବାହୀ ଯନ୍ତ୍ରୀ ଏବଂ ସହକାରୀ ନିର୍ବାହୀ ଯନ୍ତ୍ରୀ ନିଲମ୍ବନ ହୋଇଥିଲେ। ତେବେ ଏହି ଘଟଣାକୁ ନେଇ ଚର୍ଚ୍ଚା ଥମି ନ ଥିବାବେଳେ ବରଗଡ଼-ଭେଡେନ କେନାଲର ପୁରୁଣା ରିଜର୍ଭ ପାଖରେ ପୋଲ ନିର୍ମାଣ, ସ୍ଥାନ ନିରୂପଣରେ ତ୍ରୁଟି ଅଭିଯୋଗ ଆସିଥିଲା। ଏହାପରେ ଏବେ ବରଗଡ଼ ମୁଖ୍ୟ କେନାଲରୁ ବାହାରିଥିବା ରେଶମ ଡିଷ୍ଟ୍ରିବ୍ୟୁଟାରୀ ଅଧୀନ ଦୁର୍ଗା ମାଇନର୍ରେ ହୋଇଥିବା କେନାଲ ଉନ୍ନତୀକରଣ କାର୍ଯ୍ୟ ଚର୍ଚ୍ଚାର ବିଷୟ ହୋଇଛି। ବରପାଲି କେନାଲ ଡିଭିଜନ ଅଧୀନରେ ରହିଥିବା ଏହି ଦୁର୍ଗା ମାଇନର କେନାଲର ପାର୍ଶ୍ୱକାନ୍ଥ ନିର୍ମାଣ କରାଯାଇଛି, ମାତ୍ର ତାକୁ ବେଶିଦିନ ବିତି ନ ଥିବାବେଳେ ବିଭିନ୍ନ ସ୍ଥାନରେ ତାହା ଧସି ପଶିଛି। ବର୍ତ୍ତମାନ ଖରିଫ ଚାଷକାର୍ଯ୍ୟ ଆରମ୍ଭ ହୋଇଥିବାବେଳେ ନିର୍ମାଣର ଅଳ୍ପଦିନ ମଧ୍ୟରେ ତାହା ଧସିଯିବା ଏବଂ କେନାଲ ପାଣି ଯୋଗାଣ ବାଧାପ୍ରାପ୍ତ ହେବା ଅଞ୍ଚଳର ଚାଷୀମାନଙ୍କୁ ଚିନ୍ତାରେ ପକାଇ ଦେଇଛି।
ସୂଚନା ଅନୁଯାୟୀ, ରେଶମ ଡିଷ୍ଟ୍ରିବ୍ୟୁଟାରୀରୁ ବାହାରିଥିବା ଦୁର୍ଗା ମାଇନର କେନାଲ ଉପରେ ଭେଡେନ ବ୍ଲକ ଅନ୍ତର୍ଗତ ଲୁହାଖଣ୍ଡି, ଅଛାଣ୍ଡପାଲି, ବରପଦର ଆଦି ଗ୍ରାମର ଚାଷୀମାନେ ନିର୍ଭର କରିଥାନ୍ତି। ତଳମୁଣ୍ଡରେ ଉକ୍ତ ଅଞ୍ଚଳ ଥିବାରୁ କେନାଲ ପାଣି ମଧ୍ୟ ସେଠାକୁ ସହଜରେ ପହଞ୍ଚତ୍ ନଥାଏ। ତେବେ ଉକ୍ତ ମାଇନର କେନାଲର ଉନ୍ନତୀକରଣ ତଥା ପାର୍ଶ୍ୱକାନ୍ଥ ନିର୍ମାଣ ପାଇଁ ଜଳସମ୍ପଦ ବିଭାଗ ପକ୍ଷରୁ ଆବଶ୍ୟକ ଅନୁଦାନ ମଞ୍ଜୁର ହୋଇଥିଲା। ପାର୍ଶ୍ୱକାନ୍ଥ ନିର୍ମାଣ କାର୍ଯ୍ୟ ମଧ୍ୟ ସରିଥିଲା। ମାତ୍ର ଠିକ୍ ଖରିଫ ଚାଷକାର୍ଯ୍ୟ ସମୟରେ ତାହା ଧସିଯାଇ କେନାଲ ଭିତରେ ପଡ଼ିରହିଛି। ଫଳରେ କେନାଲରେ ସ୍ବାଭାବିକ ପାଣି ଯିବା ତ ଦୂରର କଥା, କେନାଲର ସେହି ଅଂଶ ଏକ ପ୍ରକାର ପୋତି ହୋଇ ପୂର୍ବାପେକ୍ଷା ଆହୁରି ସମସ୍ୟାବହୁଳ ହୋଇପଡ଼ିଛି। କାର୍ଯ୍ୟ ନିମ୍ନମାନର ହୋଇଥିବା ଯୋଗୁ ନିର୍ମାଣର ଅଳ୍ପଦିନ ମଧ୍ୟରେ ସେଭଳି ସ୍ଥିତି ଉପୁଜିଥିବା ଅଞ୍ଚଳର ଚାଷୀମାନେ କହିଛନ୍ତି।
ବରପଦର ଗ୍ରାମର ଜଣେ ଚାଷୀ ଭୀମ ଦୁବସାଗର କହିଛନ୍ତି, କେନାଲ ପାର୍ଶ୍ୱକାନ୍ଥ ନିର୍ମାଣକୁ ପ୍ରାୟ ୨ ମାସ ହୋଇଛି। ମାତ୍ର ତାହା ଅଳ୍ପଦିନରେ ଧସି ପଡ଼ିଗଲା। ସରକାର ଚାଷୀଙ୍କ ଜମିକୁ ଠିକ୍ଭାବେ ପାଣି ଯୋଗାଣ ପାଇଁ କୋଟି କୋଟି ଟଙ୍କା ଖର୍ଚ୍ଚ କରି କେନାଲ କାମ କରୁଛନ୍ତି। ମାତ୍ର କାମ ଏଭଳି ନିମ୍ନମାନର ହେବାରୁ ଚାଷୀମାନେ ସେଥିରୁ ଉପକୃତ ହୋଇ ପାରୁନାହାନ୍ତି। ନିମ୍ନମାନର କାମରେ ଯେଉଁମାନେ ସମ୍ପୃକ୍ତ ଅଛନ୍ତି, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ। ଅନ୍ୟଜଣେ ଚାଷୀ ଦତ୍ୟାନନ୍ଦ ପ୍ରଧାନ କହିଛନ୍ତି, ଚାଷୀମାନେ ଲାଭବାନ୍ ହେବେ ବୋଲି ଭାବି ସରକାର କେନାଲ ତିଆରି କରୁଛନ୍ତି। ସେଥିରେ ଅନେକ ଅର୍ଥ ବିନିଯୋଗ କରାଯାଉଛି। ମାତ୍ର ନିର୍ମାଣ କାମ ଠିକ୍ ହେଉ ନ ଥିବାରୁ ଚାଷୀଙ୍କୁ କିଛି ସୁଫଳ ମିଳୁନାହିଁ। ଏଇଠି ତ କେନାଲ ପାର୍ଶ୍ୱକାନ୍ଥ ଧସିପଡ଼ିଛି, କିଛି ଆଗକୁ ଏକ ବ୍ରିଜ୍ ନିର୍ମାଣ ଅଧାପନ୍ତରିଆ ଭାବେ ପଡ଼ିରହିଥିବାରୁ ସେଠାରେ ମଧ୍ୟ ବହୁ ସମସ୍ୟା ସୃଷ୍ଟି ହୋଇଛି। ସେହିପରି ପାଣି ପଞ୍ଚାୟତ ଚେୟାରମ୍ୟାନ ସନ୍ତୋଷ କୁମାର ବାଗ କହିଛନ୍ତି, ଏଭଳି ନିମ୍ନମାନର କାମ ହେଲେ ଚାଷୀଙ୍କ କ୍ଷେତକୁ କିଭଳି ଠିକ୍ଭାବେ ପାଣି ଯିବ। ପାଣି ଅଭାବରୁ ଚାଷୀଙ୍କ ଫସଲ ଉଜୁଡ଼ି ଯିବ। କେତେଟଙ୍କାରେ ଏହି ଦୁର୍ଗା ମାଇନର୍ର ପାର୍ଶ୍ୱକାନ୍ଥ ନିର୍ମାଣ ହୋଇଛି, ତାର ସୂଚନା ଫଳକ ମଧ୍ୟ କେଉଁଠି ନାହିଁ। ଏହାର ତଦନ୍ତ କରି ବିହିତ କାର୍ଯ୍ୟାନୁଷ୍ଠାନ ନେବା ସହିତ ତୁରନ୍ତ କେନାଲ ମରାମତି କରି ସ୍ବାଭାବିକ ଭାବେ ପାଣି ଛଡ଼ାଯାଉ। ନଚେତ୍ ଅଞ୍ଚଳର ଚାଷୀମାନଙ୍କୁ ବହୁତ କ୍ଷତି ସହିବାକୁ ପଡ଼ିବ।
Dharitri – Odisha’s No.1 Odia Daily
