ପୁରୀ ଅଫିସ,୨୭। ୭: ଗତ ଅକ୍ଷୟତୃତୀୟାଠାରୁ ନୂଆ ସ୍ବର୍ଗଦ୍ୱାରରେ ମୃତଦେହ ଦାହ ଆରମ୍ଭ ହୋଇଛି। ଏହାର କିଛି ମାସ ପରେ ଏବେ ମୃତଦେହ ଦାହ ପିଣ୍ଡି ଉପର ଛାତରୁ ପାଣି ଗଳିଲାଣି। ସ୍ଥିତି ଏଭଳି ଯେ, କିଛି ପିଣ୍ଡିରେ ମୃତଦେହ ଦାହ କରିବା ସମ୍ଭବ ହେଉନାହିଁ। ଶ୍ରାବଣ ଆରମ୍ଭରୁ ଅସରାଏ ବର୍ଷାରେ ଏଭଳି ସ୍ଥିତି ଦେଖି ଜିଲା ପ୍ରଶାସନ, ସ୍ବର୍ଗଦ୍ୱାର ସେବା ସମିତି ଏବଂ ଓଡ଼ିଶା ବ୍ରିଜ୍ କନଷ୍ଟ୍ରକଶନ୍ କର୍ପୋରେଶନ୍ (ଓବିସିସି)ର ଚିନ୍ତା ବଢିଲାଣି। ୫ କୋଟିରୁ ଊର୍ଦ୍ଧ୍ୱ ଟଙ୍କାରେ ନିର୍ମିତ ସ୍ବର୍ଗଦ୍ୱାର କାମକୁ ନେଇ ଜିଲା ପ୍ରଶାସନ ପ୍ରଶଂସା ନେବାର ସୁଯୋଗ ହାତ ଛଡ଼ା କରି ନ ଥିଲା। ତେବେ ଏବେ ମୃତଦେହ ଦାହ ପିଣ୍ଡି ପାଖରୁ ପାଣି ଗଳୁଥିବା ଦେଖି ସାଧାରଣ ଲୋକେ କାମର ମାନକୁ ନେଇ ପ୍ରଶ୍ନ ଉଠାଇଲେଣି। କାମ ନିମ୍ନମାନର ହୋଇଥିବା ଲୋକେ ଅଭିଯୋଗ କରିଛନ୍ତି। କିଛି ମାସ ତଳେ କାଳବୈଶାଖୀ ବର୍ଷାରେ ସ୍ବର୍ଗଦ୍ୱାର ଛାତରୁ ପ୍ରଥମେ ପାଣି ଗଳିବା ଆରମ୍ଭ ହୋଇଥିଲା। ଏନେଇ ସ୍ବର୍ଗଦ୍ୱାର କର୍ମଚାରୀମାନେ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ ଜିଲାପାଳ ସମ୍ପୃକ୍ତ ସ୍ଥାନ ଯାଞ୍ଚ କରି ଓବିସିସିକୁ କାର୍ଯ୍ୟଭାର ଦେଇଛନ୍ତି। ତେବେ ପାଣି ଗଳିବା ସମ୍ପର୍କରେ ଜଣେ ଅଧିକାରୀ କହିଛନ୍ତି, ବ୍ରିଜ୍ ନିର୍ମାଣ କରୁଥିବା ସଂସ୍ଥାକୁ ଘର ନିର୍ମାଣ କରିବାକୁ ଦିଆଗଲା। ସେମାନେ ବଡ଼ ବଡ଼ କ୍ରେନ୍ରେ ପିଲାର ଉପରେ କଂକ୍ରିଟ୍ ଛାତ ଲଦି ରଖିଲେ। ମାତ୍ର ଦୁଇ କଂକ୍ରିଟ୍ ଛାତ ମଧ୍ୟରେ ଥିବା ଫାଙ୍କକୁ ବନ୍ଦ କରିବାକୁ ଗ୍ରୀଡିଂ କଲେନାହିଁ। ଫଳରେ ଏହି ସମସ୍ୟା ଦେଖାଦେଇଛି। ସାଧାରଣତଃ ଏହି ଫାଙ୍କକୁ ଦୂରରୁ ବାରିବା ସମ୍ଭବ ନୁହେଁ। ବର୍ଷାଦିନେ ପାଣି ଗଳିବା ପାଇଁ ଫାଙ୍କ ବହୁତ୍ ବଡ଼। ତେବେ ଓବିସିସି ଭଳି ସୁଦକ୍ଷ ସଂସ୍ଥା ଗ୍ରୀଡିଂ କାର୍ଯ୍ୟ କରି ନ ଥିଲା କାହିଁକି ସେନେଇ ସାଧାରଣରେ ପ୍ରଶ୍ନ ଉଠିଛି। ସୂଚନା ଅଧିକାରୀ କର୍ମୀ ବିଶ୍ୱଜିତ ମହାନ୍ତି କହିଛନ୍ତି, ବର୍ଷା ଦିନ ଆରମ୍ଭ ନ ହେଉଣି ଏଭଳି ଅବସ୍ଥା ହେଲା। ତୁରନ୍ତ ମରାମତି କାମ ନ ସରିଲେ ମୃତଦେହ ଦାହରେ ଅନେକ ସମସ୍ୟା ଉପୁଜିବ। ସେହିପରି ପୂର୍ବତନ ଜିଲାପାଳ ବଲୱନ୍ତ ସିଂଙ୍କ ସମୟରେ ପ୍ରସ୍ତୁତ ହୋଇଥିବା ନକ୍ସାରେ ସାମାନ୍ୟ ପରିବର୍ତ୍ତନ କରାଯାଇ ନୂଆ ସ୍ବର୍ଗଦ୍ୱାର ନିର୍ମାଣ ହୋଇଛି। ନକ୍ସାରେ କ’ଣ ପରିବର୍ତ୍ତନ ହୋଇଛି ଓ କାମ ପଛର କାରଣ କ’ଣ ସେନେଇ ଜିଲା ପ୍ରଶାସନ ସ୍ପଷ୍ଟୀକରଣ ରଖିବା ଆବଶ୍ୟକ। ଅନ୍ୟପକ୍ଷରେ ଏନେଇ ଓବିସିସି ନିର୍ଦ୍ଦେଶକ ପ୍ରଭାତ ପାଣିଗ୍ରାହୀ କହିଛନ୍ତି, ଗ୍ରୀଡିଂ କାର୍ଯ୍ୟ ହୋଇପାରି ନ ଥିଲା। ସମସ୍ୟା ଦେଖିବା ପରେ କାମ ଆରମ୍ଭ ହୋଇଛି। ଖୁବ୍ଶୀଘ୍ର କାମ ସରିବ। ସେହିପରି ଉପଜିଲାପାଳ ଭବତାରଣ ସାହୁ କହିଛନ୍ତି, ବର୍ଷାରେ ପାଣି ଗଳିବା ନେଇ ଅଭିଯୋଗ ଆସିବା ପରେ ଓବିସିସିକୁ ଏସମ୍ପର୍କିତ ସୂଚନା ଦିଆଯାଇଛି। ମରାମତି କାମ ଯଥାଶୀଘ୍ର ସାରିବାକୁ ପ୍ରୟାସ ଚାଲିଛି।
