ପାଟନା,୨୪।୭: କରୋନା ଭାଇରସ୍ ସଂକ୍ରମଣ ସଙ୍କଟ ମଧ୍ୟରେ ବିଧାନସଭା ନିର୍ବାଚନ ଠିକ୍ ସମୟରେ କରିବାକୁ ନେଇ ନିର୍ବାଚନ ଆୟୋଗର ମନ୍ଥନ ଜାରି ରହିଛି। ଏଭଳି ସ୍ଥିତିରେ ବ୍ୟାପକ ବିଚାର ବିମର୍ଷ କରି ନିର୍ବାଚନ ଆୟୋଗ କରୋନା ସଙ୍କଟକୁ ଦୃଷ୍ଟିରେ ରଖି ବିହାରରେ ପ୍ରଚାର ପଦ୍ଧତି ସମ୍ବନ୍ଧରେ ଏକ ନିର୍ଦ୍ଦେଶାବଳୀ ପ୍ରସ୍ତୁତ କରିଛନ୍ତି। ଏନେଇ ଏକ ଚିଠିକୁ ନିର୍ବାଚନ ଆୟୋଗ ବିହାରର ପ୍ରମୁଖ ରାଜନୈତିକ ଦଳକୁ ପଠାଇଛନ୍ତି ଓ ସେମାନଙ୍କଠାରୁ ପରାମର୍ଶ ମଧ୍ୟ ଲୋଡିଛନ୍ତି। ଶକୁବ୍ରାର ନିର୍ବାଚନ ଆୟୋଗର ସଚିବ ଏନ୍.ଟି. ଭୁଟିଆ ଏକ ଚିଠି ଜାରି କରିଛନ୍ତି। ଯେଉଁଥିରେ ଜୁଲାଇ ୩୧ ପର୍ଯ୍ୟନ୍ତ ସମସ୍ତ ରାଜନୈତିକ ଦଳକୁ ଏନେଇ ପରାମର୍ଶ ଦେବାକୁ ସେ ନିର୍ଦ୍ଦେଶ ଦେଇଛନ୍ତି। ଯାହା ଦ୍ୱରା ନିର୍ବାଚନ ଆୟୋଗ ଏହା ଉପରେ ନିର୍ଦ୍ଦେଶାବଳୀ ଜାରି କରିପାରିବେ। ତେବେ ଜାରି କରାଯାଇଥିବା ନିର୍ଦ୍ଦେଶାବଳୀଗୁଡ଼ିକ ଅନୁସାରେ ନିର୍ବାଚନରେ ପ୍ରଚାର କିମ୍ବା ବୈଠକ ସମୟରେ ସମସ୍ତ ବ୍ୟକ୍ତି ମାସ୍କ ପିନ୍ଧିବା ଜରୁରୀ। ଏଥିସହ ସାମାଜିକ ଦୂରତ୍ୱ ରକ୍ଷା କରିବା ସହ ରାଲି ଉପରେ ପ୍ରତିବନ୍ଧକ ଲଗାଯାଇଛି। ସେହିପରି ନିର୍ବାଚନର ସାଧାରଣ ସଭା ଓ ସଭାଗୁଡ଼ିକରେ ଥର୍ମାଲ ସ୍କ୍ରିନିଂ ଏବଂ ସାନିଟାଇଜେଶନର ବ୍ୟବସ୍ଥା ରହିିବ। ମତଦାନ ବୁଥରେ ଭୋଟରଙ୍କ ସଂଖ୍ୟା ହ୍ରାସ କରିବାକୁ ପଡ଼ିବ। ଯାହାଦ୍ୱାରା ଭୋଟ ସମୟରେ ଅଧିକ ଭିଡ଼ ଏକାଠି ହୋଇପାରିବ ନାହିଁ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ପ୍ରତ୍ୟେକ ବୁଥରେ ନିର୍ବାଚନ ଅଧିକାରୀଙ୍କୁ ପିପିଇ କିଟ ପ୍ରଦାନ କରାଯିବା ସହ ଇଭିଏମ ମେସିନରେ ବଟନ କ୍ଲିକ୍ କରିବା ପାଇଁ ଟୁଥ୍ପିକ ଓ ଗ୍ଲୋଭସ ବ୍ୟବହାର କରାଯିବ। ସେହଭଳି ଥର୍ମାଲ ସ୍କ୍ରିନିଂ ଉପରେ ମଧ୍ୟ ନିର୍ବାଚନ ଆୟୋଗ ବିଚାର କରୁଥିବା ଜଣାପଡ଼ିଛି। ସୂଚନା ମୁତାବକ ବର୍ତ୍ତମାନ ବିହାର ଦ୍ୱିଗୁଣ ସମସ୍ୟାର ସମ୍ମୁଖୀନ ହୋଇଛି। ଗୋଟିଏ ପଟେ କରୋନା ସଂକ୍ରମଣର ବୃଦ୍ଧି ହେତୁ ବିହାର ଏକ ନୂତନ ହଟସ୍ପଟରେ ପରିଣତ ହୋଇଥିବା ବେଳେ ଅନ୍ୟପଟେ ବନ୍ୟା ପରିସ୍ଥିତି ଲକ୍ଷ ଲକ୍ଷ ଲୋକଙ୍କ ଜୀବନକୁ ନଷ୍ଟ କରିଦେଇଛି। ଏଭଳି ପରିସ୍ଥିତିରେ ନିର୍ବାଚନ ଆୟୋଗଙ୍କ ସମ୍ମୁଖରେ ବିହାର ନିର୍ବାଚନ କରିବା ଏକ ବଡ଼ ଚ୍ୟାଲେଞ୍ଜ ପାଲଟିଛି।
