ଗଞ୍ଜାମ,୧୩।୧୨(ଡି.ଏନ.ଏ.): ବିହାରରୁ ବାଙ୍ଗାଲୋର ଦ୍ରୁତଗାମୀ ଟ୍ରେନ୍ରେ ଯାଉଥିବା ବୃଦ୍ଧ ବାଲୁଗାଁ ଷ୍ଟେଶନରୁ ଗତ ନଭେମ୍ବର ୨୬ ତାରିଖରେ ନିରୁଦ୍ଧିଷ୍ଟ ହୋଇଯାଇଥିବା ବେଳେ ତାଙ୍କୁ ମଙ୍ଗଳବାର ଗଞ୍ଜାମ ବ୍ଲକର ପୁରୁଣାବନ୍ଧ ଗ୍ରାମରୁ ଉଦ୍ଧାର କରାଯାଇ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଥିବା ଜଣାପଡ଼ିଛି l ନିରୁଦ୍ଧିଷ୍ଟ ବୃଦ୍ଧ ଜଣଙ୍କ ହେଲେ ବିହାର ରାଜ୍ୟର ଔରଙ୍ଗାବାଦ ଜିଲାର ବୁଧିବନ୍ତ ଗ୍ରାମର କାମେଶର ପାଲ (୬୫) l
ପ୍ରାପ୍ତ ସୂଚନାନୁଯାୟୀ, ବାଲୁଗାଁ ଷ୍ଟେସନରେ ଟ୍ରେନଟି ରହିବା ପରେ ବୃଦ୍ଧ ଜଣଙ୍କ ଓହ୍ଲାଇ ଥିବା ବେଳେ ଟ୍ରେନ୍ ଛାଡ଼ିଦେଇଥିଲା l ଫଳରେ ସେ ଷ୍ଟେଶନରେ ରହିଯାଇଥିଲେ l ପରେ ସେ ଜାତୀୟ ରାଜପଥ ଦେଇ ଚାଲିଚାଲି ଗତ ଶୁକ୍ରବାର ପୁରୁଣାବନ୍ଧ ଗ୍ରାମରେ ପହଞ୍ଚିଥିଲେ l ଗ୍ରାମର ଯୁବ ସ୍ବେଚ୍ଛାସେବୀ ପ୍ରସାଦ କୁମାର ବେହେରା, କେ. ଜଗଦୀଶ ରାଓ, ପି. ଦୀନବନ୍ଧୁ ରାଓ, ରମେଶ ବେହେରା ପ୍ରମୁଖ ତାଙ୍କୁ ପଚରାଉଚରା କରିବା ସହ ତାଙ୍କର ଖାଇବା ପିଇବା ବ୍ୟବସ୍ଥା କରିଥିଲେ l ପରେ ପୂର୍ବତନ ସମିତିସଭ୍ୟ ଛାୟାକାନ୍ତ ପ୍ରଧାନ ଓ ଗଞ୍ଜାମ ଥାନା ଅଧିକାରୀଙ୍କୁ ଅବଗତ କରାଇଥିଲେ l ଥାନା ଅଧିକାରୀ ବୃଦ୍ଧଙ୍କ ଠିକଣା ଖୋଜି ସେଠାକାର ପୋଲିସ ସହଯୋଗରେ
ବୃଦ୍ଧଙ୍କ ପରିବାର ବର୍ଗଙ୍କୁ ଜଣାଇଥିଲେ l ମଙ୍ଗଳବାର ଗଞ୍ଜାମ ଥାନାରେ ତାଙ୍କ ପରିବାରବର୍ଗ ପହଞ୍ଚିବା ପରେ ନିରୁଦ୍ଧିଷ୍ଟ ବୃଦ୍ଧଙ୍କୁ ତାଙ୍କ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଥିଲା l
