ରମ୍ଭା, ୮।୧୦ (ବିଦ୍ୟାଧର ସାହୁ): ବିଭିନ୍ନ ଦାବି ନେଇ ଇଣ୍ଡିଆ ବ୍ଲକ ପକ୍ଷରୁ ଦିଆଯାଇଥିବା ଓଡ଼ିଶା ବନ୍ଦ ଡାକରାର ପ୍ରଭାବ ଗଞ୍ଜାମ ଜିଲାର ରମ୍ଭା ଅଞ୍ଚଳରେ ଦେଖିବାକୁ ମିଳିଛି। କଂଗ୍ରେସ, ସିପିଆଇ ଓ ସିପିଆଇ(ଏମ) ପକ୍ଷରୁ ବନ୍ଦକୁ ସମର୍ଥନ କରାଯାଇଥିବା ବେଳେ ରମ୍ଭା ସହରରେ ଦୋକାନବଜାର ସମେତ ବିଭିନ୍ନ ସରକାରୀ ଓ ବେସରକାରୀ ପ୍ରତିଷ୍ଠାନ ବନ୍ଦ ରହିଥିଲା। ଇଣ୍ଡିଆ ବ୍ଲକ ପକ୍ଷରୁ ଖଣି ଓ ଖଣିଜ ସଂଶୋଧନ ଆଇନ ବାତିଲ, ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ବହିଷ୍କାର ଏବଂ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଦାବି କରାଯାଇଛି।
ବନ୍ଦ ଯୋଗୁ ରମ୍ଭା ସହରର ସମସ୍ତ ବ୍ୟାଙ୍କ, ସ୍କୁଲ, କଲେଜ, ଡାକଘର ଓ ଏନଏସି କାର୍ଯ୍ୟାଳୟ ବନ୍ଦ ରହିଥିଲା। ସେହିପରି ସହରର ପ୍ରାୟ ସମସ୍ତ ଦୋକାନବଜାର ମଧ୍ୟ ବନ୍ଦ ରହିବାରୁ ସାଧାରଣ ଜନଜୀବନ ପ୍ରଭାବିତ ହୋଇଥିଲା। ବନ୍ଦକୁ ସଫଳ କରିବା ପାଇଁ ଇଣ୍ଡିଆ ବ୍ଲକର ବିଭିନ୍ନ ଦଳର ନେତା ଓ କର୍ମୀମାନେ ଅଞ୍ଚଳରେ ସକ୍ରିୟ ରହିଥିଲେ। ପ୍ରାକ୍ତନ ଜିଲ୍ଲା ପରିଷଦ ସଭ୍ୟ ତଥା ସିପିଆଇ(ଏମ) ଜିଲା ସମ୍ପାଦକମଣ୍ଡଳୀ ସଦସ୍ୟ ପି. ହରିକୃଷ୍ଣ ରେଡ୍ଡୀ, ସିପିଆଇ ଜୋନାଲ ସମ୍ପାଦକ ଭାସ୍କର ପାତ୍ର, କଂଗ୍ରେସ ନେତା ଚକ୍ରଧର ବେହେରା, ସୁଜ୍ଞାନୀ ପଟ୍ଟନାୟକ, ସିପିଆଇ ନେତା ନାରାୟଣ ନାୟକ, କାଉନସିଲର କ୍ଷେତ୍ରମୋହନ ବେହେରା, ରଜନୀକାନ୍ତ ବେହେରା, ଏନ. ମାଧବ ରାଓ ପ୍ରମୁଖ ବନ୍ଦ ପାଳନରେ ସାମିଲ ହୋଇଥିଲେ।
ସେହିପରି ସିପିଆଇ(ଏମ) ନେତା ଯୋଗେଶ ଚନ୍ଦ୍ର ସାହୁ, ଗୋବର୍ଧନ ପାହାନ, ପଦ୍ମନାଭ ପ୍ରଧାନ, ପ୍ରଭାକର ବେହେରା, ରଘୁନାଥ ବେହେରା ଓ ବିଶ୍ୱନାଥ ପ୍ରଧାନଙ୍କ ସମେତ ବହୁ ନେତା ଓ କର୍ମୀ ବନ୍ଦରେ ଉପସ୍ଥିତ ଥିଲେ। ଅନ୍ୟପକ୍ଷରେ, ହୁମା ଅଞ୍ଚଳରେ ମଧ୍ୟ ଓଡ଼ିଶା ବନ୍ଦର ପ୍ରଭାବ ଦେଖାଯାଇଥିଲା। ସିପିଆଇ(ଏମ) ନେତା ଯୋଗେଶ ଚନ୍ଦ୍ର ସାହୁଙ୍କ ନେତୃତ୍ୱରେ ଅଞ୍ଚଳର ବିଭିନ୍ନ ବ୍ୟାଙ୍କ, ଡାକଘର ଓ ଲବଣ ବିଭାଗ ସମେତ ଅନ୍ୟାନ୍ୟ ପ୍ରତିଷ୍ଠାନ ବନ୍ଦ ରହିଥିଲା। ବନ୍ଦ ପାଳନକୁ ନେଇ ରମ୍ଭା ଓ ହୁମା ଅଞ୍ଚଳରେ ଇଣ୍ଡିଆ ବ୍ଲକର କର୍ମୀମାନଙ୍କ ମଧ୍ୟରେ ଉତ୍ସାହ ପରିଲକ୍ଷିତ ହୋଇଥିଲା।
