କୋଲକାତା,୨୮।୮(ପି.ଟି.): ମନ ଚାହୁଁଥିବା କଥା ପୂରଣ ହୋଇ ନ ପାରିଲେ ଦୁଃଖ ଲାଗିଥାଏ। ହେଲେ ବେଳେ ବେଳେ ତାହା ପରବର୍ତ୍ତୀ ସମୟରେ ମଙ୍ଗଳ ଘଟାଇଥାଏ। ଏଭଳି ଏକ ଘଟଣା ଘଟିଛି ପଶ୍ଚିମବଙ୍ଗର ଜଣେ ମହିଳାଙ୍କ କ୍ଷେତ୍ରରେ, ଯିଏ କି ବୁଧବାର ନେପାଳରେ ଘଟିଥିବା ଆକସ୍ମିକ ବନ୍ୟାଜନିତ ବିପର୍ଯ୍ୟୟରୁ ନିଶ୍ଚିତ ମୃତ୍ୟୁ ମୁଖରୁ ବର୍ତ୍ତିଯାଇଛନ୍ତି। ସେ ହେଲେ ପଶ୍ଚିମବଙ୍ଗର ତପତୀ ସିଂହ (୬୧)। ତପତୀଙ୍କ ଭିଜାକୁ ଚାଇନା ସରକାର ନାମଞ୍ଜୁର କରିବା ତାଙ୍କ ପାଇଁ ଶୁଭଙ୍କର ସାବ୍ୟସ୍ତ ହୋଇଛି। ଯଦି ତାଙ୍କର ଚାଇନା ଭିଜା ମଞ୍ଜୁର ହୋଇଥାନ୍ତା, ତେବେ ସେ କୈଳାସ ମାନସରୋବର ତୀର୍ଥଯାତ୍ରା ପାଇଁ ପଶ୍ଚିମବଙ୍ଗରୁ ନେପାଳ ଯାଇଥିବା ୩୩ ଜଣିଆ ତୀର୍ଥଯାତ୍ରୀ ଦଳର ଅଂଶବିଶେଷ ହୋଇଥାନ୍ତେ। ଭିଜା ନାମଞ୍ଜୁର ହେବା ପରେ ମନଦୁଃଖରେ ସେ ଲଦାଖ ଭ୍ରମଣରେ ଚାଲିଯାଇଥିଲେ। ଗୁରୁବାର ସାରେ ଲଦାଖ ଗସ୍ତ କାଟଛାଣ୍ଟ କରି ଦିଲ୍ଲୀ ଦେଇ କୋଲକାତା ଫେରୁଥିବା ବେଳେ ପିଟିଆଇକୁ ସେ ନିଜର ଆଶ୍ଚର୍ଯ୍ୟଜନକ ଅନୁଭୂତି ବର୍ଣ୍ଣନା କରିଛନ୍ତି।
ତପତୀ କହିଛନ୍ତି, କୋଲକାତାସ୍ଥିତ ଏକ ଟ୍ରାଭେଲ ଏଜେନ୍ସି ଜରିଆରେ ଗତ ମେ ମାସରୁ ସେ ଏହି ୧୩ ଦିନିଆ କୈଳାସ ଯାତ୍ରା ପାଇଁ ପ୍ରସ୍ତୁତି ଚଳାଇଥିଲେ। ଦଳଗତ ବୈଠକ, କିଣାକିଣି ଏବଂ ଟ୍ରେକିଂ ତାଲିମ ସବୁଥିରେ ସେ ଭାଗ ନେଇଥିଲେ। ମାତ୍ର ଗସ୍ତର କିଛି ଦିନ ପୂର୍ବରୁ କୌଣସି ନିର୍ଦ୍ଦିଷ୍ଟ କାରଣ ନ ଦର୍ଶାଇ ତାଙ୍କ ଭିଜାକୁ ରଦ୍ଦ କରାଯାଇଥିବା ସୂଚନା ମିଳିଥିଲା। ସେହି ସମୟରେ ଏହି ଘଟଣା ତାଙ୍କୁ ଗଭୀର ଆଘାତ ଦେଇଥିଲେ ବି ଆଜି ସେ ନିଜକୁ ଭାଗ୍ୟବାନ ମନେକରୁଛନ୍ତି। ଅପରପକ୍ଷରେ, ତାଙ୍କ ସହ ଯାତ୍ରା କରିଥିବା ଅନ୍ୟ ୩୨ ଜଣ ପର୍ଯ୍ୟଟକଙ୍କ ସମ୍ପର୍କରେ ବର୍ତ୍ତମାନ ସୁଦ୍ଧା କୌଣସି ସୂଚନା ମିଳିପାରିନାହିଁ।
