ଇମ୍ଫାଲ୍,୨୫ା୪: ମଣିପୁରର ଉଖ୍ରୁଲ୍ ଜିଲାରେ ଶୁକ୍ରବାର ନାଗା ଓ କୁକି ସମ୍ପ୍ରଦାୟ ୨ ସଶସ୍ତ୍ର ଗୋଷ୍ଠୀ ମଧ୍ୟରେ ସଂଘର୍ଷ ଘଟି ଅନୂ୍ୟନ ୩ ଜଣଙ୍କ ମୃତ୍ୟୁ ହେବା ସହ ଅନେକେ ଆହତ ହୋଇଛନ୍ତି। ହିଂସା ପ୍ରଭାବିତ ଉକ୍ତ ଜିଲାର ମୁଲ୍ଲାମ୍ ଗ୍ରାମ ନିକଟରେ ଏହି ହିଂସାକାଣ୍ଡ ଘଟିଥିବା ପୋଲିସ କହିଛି। ସୁରକ୍ଷା ବଳ ୨ଟି ମୃତଦେହ ଜବତ କରିଛି। ନାଗାଲାଣ୍ଡ ଏବଂ ମ୍ୟାନ୍ମାର ସୀମାକୁ ଲାଗିଥିବା ଉଖ୍ରୁଲ୍ ଜିଲାରେ ତାଙ୍ଗ୍ଖୁଲ୍ ନାଗା ସମ୍ପ୍ରଦାୟ ଅଧିକ ସଂଖ୍ୟାରେ ବସବାସ କରନ୍ତି। ସେମାନଙ୍କର କୁକି ସମ୍ପ୍ରଦାୟ ସହ ବିବାଦରୁ ହିଂସାକାଣ୍ଡ ଘଟିଛି। ମୃତକ ୨ ଜଣ ହେଲେ ଏଲ୍. ସିତ୍ଲୋଉ ଏବଂ ପି. ହାଇଲାଇ। ସେମାନଙ୍କୁ ଗୁଳିମାଡ଼ ହୋଇଛି। ଶୁକ୍ରବାର ସକାଳେ ମୁଲ୍ଲାମ ଗ୍ରାମ ନିକଟରେ ୨ ସଶସ୍ତ୍ର ଉଗ୍ରପନ୍ଥୀ ଗୋଷ୍ଠୀ ମଧ୍ୟରେ ଜୋର୍ଦାର ଗୁଳି ବିନିମୟ ହୋଇଥିଲା। ହିଂସାବେଳେ ଉକ୍ତ ପାର୍ବତ୍ୟାଞ୍ଚଳର ଅନେକ ଘରେ ନିଆଁ ଲଗାଇଦିଆଯାଇଛି।
ଶାନ୍ତିପୂର୍ଣ୍ଣ କୁକି ଗ୍ରାମଗୁଡ଼ିକ ଉପରେ ଏଭଳି ସଶସ୍ତ୍ର ଆକ୍ରମଣ ଭୀରୁତାର କାର୍ଯ୍ୟ ବୋଲି କୁକି ମାନବାଧିକାର ମହିଳା ସଂଗଠନ ପକ୍ଷରୁ କୁହାଯିବା ସହ ଘଟଣାକୁ ନିନ୍ଦା କରାଯାଇଛି। ନିରୀହ ଲୋକେ ଘରେ ଶୋଇଥିବାବେଳେ ଆକ୍ରମଣ ହୋଇଥିଲା ବୋଲି ଉକ୍ତ ସଂଗଠନ ଅଭିଯୋଗ କରିଛି। ଆକ୍ରମଣରେ ୨ ଜଣ କୁକି ଗ୍ରାମ ସ୍ବେଚ୍ଛାସେବୀ ନିହତ ହୋଇଛନ୍ତି, ଯେଉଁମାନେ ଉକ୍ତ ସମ୍ପ୍ରଦାୟର ସୁରକ୍ଷା ଦାୟିତ୍ୱରେ ଥିଲେ। ଘରେ ନିଆଁ ଲଗାଇଦେବାରୁ ମହିଳା ଓ ପିଲାମାନଙ୍କ ସହ ଅନେକେ ଆହତ ହୋଇଛନ୍ତି। ଗ୍ରାମବାସୀ ଆତ୍ମରକ୍ଷା ପାଇଁ ଲାଇସେନ୍ସପ୍ରାପ୍ତ ଶିକାର ବନ୍ଧୁକ ବ୍ୟବହାର କରୁଥିବାବେଳେ ଏଥିରେ ଜଣେ ଆକ୍ରମଣକାରୀ ନିହତ ହୋଇଛନ୍ତି।
ସୂଚନାଯୋଗ୍ୟ, ୨୦୨୩ ମେ’ରୁ ମଣିପୁରରେ ଜାତିଆଣ ହିଂସା ଦୀର୍ଘଦିନ ଲାଗି ରହିବା ସହ ୨୬୦ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଥିଲା। ତତ୍କାଳୀନ ମୁଖ୍ୟମନ୍ତ୍ରୀ ଏନ୍. ବୀରେନ୍ ସିଂ ଇସ୍ତଫା ଦେବା ପରେ ମଣିପୁରରେ ବର୍ଷେ ପର୍ଯ୍ୟନ୍ତ ରାଷ୍ଟ୍ରପତି ଶାସନ ଲାଗୁ ହୋଇଥିଲା। ରାଷ୍ଟ୍ରପତି ଶାସନ ପ୍ରତ୍ୟାହାର ପରେ ସେଠାରେ ନୂଆ ସରକାର ଗଢ଼ାହୋଇଥିବାବେଳେ ପୁଣିଥରେ ହିଂସା ମୁଣ୍ଡ ଟେକିଛି। ଗତ ୨ ସପ୍ତାହ ମଧ୍ୟରେ ସେଠାରେ ୩ଟି ହିଂସା ଘଟଣାରେ ୭ ଜଣଙ୍କ ଜୀବନ ଗଲାଣି। ଏହା ବିରୋଧରେ ମଣିପୁରର ୫ଟି ଜିଲାରେ ବିକ୍ଷୋଭ ଓ ବନ୍ଦ ପାଳନ ହୋଇଥିଲା।
