ମୁମ୍ବାଇ,୨।୭: ନିକଟରେ ଅମାଜନ ପ୍ରାଇମ୍ରେ ରିଲିଜ୍ ହୋଇଥିବା ଫିଲ୍ମ ‘ଶେରନୀ’କୁ ଦର୍ଶକ ବେଶ୍ ପସନ୍ଦ କରିଛନ୍ତି। ଏହି ଫିଲ୍ମରେ ବଲିଉଡ୍ ଡାର୍ଟି ଗର୍ଲ ବିଦ୍ୟା ବାଲାନଙ୍କ ଚରିତ୍ର ଓ ତାଙ୍କର ଅଭିନୟ ପ୍ରଶଂସକ ମନକୁ ବେଶ୍ ଛୁଇଁପାରିଛି। ଇତିମଧ୍ୟରେ ବିଦ୍ୟା ବାଲାନ, ପ୍ରଯୋଜକ ଏକତା କପୁର ଓ ତାଙ୍କ ମା’ ଶୋଭା କପୁରଙ୍କୁ ଓସ୍କାର ପକ୍ଷରୁ ନିମନ୍ତ୍ରଣ ମିଳିଛି। ଏହି ତିନି ଜଣ ଓସ୍କାର ଏକାଡେମୀ ଆଓ୍ବାର୍ଡର କ୍ଲାସ୍-୨୦୨୧ର ସଦସ୍ୟରେ ଏବେ ସାମିଲ ହୋଇଛନ୍ତି। ଓସ୍କାରର ଗଭର୍ନିଂ ବଡିର ମୋସନ ପିକଚର୍ସ ଆଣ୍ଡ ସାଇନ୍ସ ଦ୍ୱାରା ସାରା ବିଶ୍ୱରୁ ୩୯୫ଜଣଙ୍କୁ ଚୟନ କରାଯାଇଛି।
ଏହି ଚୟନରେ ବିଦ୍ୟା, ଏକତା ଓ ଶୋଭା କପୁର ସାମିଲ ଅଛନ୍ତି। ତେବେ ଏହି ଚୟନ ହୋଇଥିବା ସମସ୍ତ ସଦସ୍ୟ ଓସ୍କାରରେ ଭୋଟ ଦେଇପାରିବେ ବୋଲି ଜଣାପଡ଼ିଛି। ବିଦ୍ୟାଙ୍କ ଅଭିନୀତ ଫିଲ୍ମ ‘ତୁମହାରୀ ସୁଲୁ’ ଓ ‘କାହାଣୀ’ ପାଇଁ ତାଙ୍କୁ ପରିଚୟ ମିଳିଥିବା ବେଳେ ‘ଡ୍ରିମ୍ ଗର୍ଲ’ ଓ ‘ଓ୍ବାନ୍ସ ଅପନ୍ ଏ ଟାଇମ୍ ଇନ୍ ମୁମ୍ବାଇ’ ପାଇଁ ଏକତାଙ୍କୁ ଓ ଶୋଭା କପୁରଙ୍କୁ ‘ଉଡ୍ତା ପଞ୍ଜାବ’ ଓ ‘ଡାର୍ଟି ପିକଚର ଲାଗି ଚୟନ କରାଯାଇଥିବା ଜଣାପଡ଼ିଛି। ସାରା ବିଶ୍ୱରୁ ଚୟନ କରାଯାଇଥିବା ୩୯୫ ସଦସ୍ୟଙ୍କ ମଧ୍ୟରେ କଳାକାର, ନିର୍ଦ୍ଦେଶକ, ପ୍ରଯୋଜକ ଓ ଫିଲ୍ମ ସହ ଜଡ଼ିତ ଥିବା ବିଭିନ୍ନ ଟେକ୍ନିସିଆନ ସାମିଲ ହୋଇଛନ୍ତି।
