କଲମ୍ବୋ,୨୪।୭: ଚଳିତ ଶ୍ରୀଲଙ୍କା ବିପକ୍ଷ ଦିନିକିଆ ସିରିଜ୍ରେ ଭାରତୀୟ ଦଳ ପାଇଁ ୬ ଜଣ ଖେଳାଳି ପଦାର୍ପଣ କରିଥିଲେ। ହେଲେ ମିଷ୍ଟ୍ରି ସ୍ପିନର ବରୁଣ ଚକ୍ରବର୍ତ୍ତୀ, ଓପନର ରୁତୁରାଜ ଗାଏକ୍ୱାଡ ଓ ଦେବଦତ୍ତ ପାଡିକଲଙ୍କୁ ମିଳି ନ ଥିଲା ସୁଯୋଗ। ଏମାନଙ୍କୁ ଟି୨୦ ସିରିଜ୍ର ପ୍ରଥମ ମ୍ୟାଚ୍ରେ ସୁଯୋଗ ମିଳିପାରେ।
ଦିନିକିଆ ସିରିଜ୍ର ଅନ୍ତିମ ମ୍ୟାଚ୍ରେ ପରାଜୟ ବରଣ କରିବା ପରେ ଟି୨୦ ସିରିଜ୍ ଆରମ୍ଭରୁ ଟିମ୍ ଇଣ୍ଡିଆ ପ୍ରତ୍ୟେକ ବିଭାଗରେ ପରିବର୍ତ୍ତନ କରିପାରେ। ତେବେ କୋଚ୍ ରାହୁଲ ଡ୍ରାଭିଡ୍ ମଧ୍ୟ ଚକ୍ରବର୍ତ୍ତୀଙ୍କୁ ଚେକ୍ କରିପାରନ୍ତି। କାରଣ ଏହି ଅଫ୍ସ୍ପିନରଙ୍କ ପାଖରେ କ୍ୟାରମ ବଲ ସାଙ୍ଗକୁ ଦୁସରା ଭଳି ଭେରାଇଟି ଅଛି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରେ ସେ ନିଜକୁ ପ୍ରମାଣ କରିସାରିଛନ୍ତି। ସେହି ପ୍ରଦର୍ଶନ ବଳରେ ତାଙ୍କୁ ଅଷ୍ଟ୍ରେଲିଆ ଓ ଇଂଲଣ୍ଡ ବିପକ୍ଷ ସିରିଜ୍ ଲାଗି ଟିମ୍ ଇଣ୍ଡିଆରେ ସାମିଲ କରାଯାଇଥିଲା। କିନ୍ତୁ ଖରାପ ଫିଟ୍ନେସ ଓ ପରେ ଆହତ ସମସ୍ୟା କାରଣରୁ ତାଙ୍କୁ ଏପର୍ଯ୍ୟନ୍ତ ପଦାର୍ପଣ ସୁଯୋଗ ମିଳିନାହିଁ।
ଅନ୍ୟପକ୍ଷରେ ପୃଥ୍ବୀ ଶ’ ଓ ସୂର୍ଯ୍ୟକୁମାର ଯାଦବଙ୍କୁ ଇଂଲଣ୍ଡ ଗସ୍ତ ପାଇଁ ଡାକରା ଆସି ସାରିଛି। ଏଣୁ ଦୁଇ ଖେଳାଳିଙ୍କୁ ଟି୨୦ ସିରିଜ୍ରେ ଖେଳାଇଲା ଭଳି ରିସ୍କ ନେବାକୁ ଚାହିଁବନି ଟିମ୍ ମ୍ୟାନେଜମେଣ୍ଟ। ଏଣୁ ପାଡିକଲ ଓ ରୁତୁରାଜଙ୍କ ମଧ୍ୟରୁ ଜଣଙ୍କୁ ସୁଯୋଗ ମିଳିପାରେ। ଆଶା କରାଯାଉଛି, ଇଶାନ କିଷନ ଓ ସଞ୍ଜୁ ସାମସନଙ୍କୁ ଦଳୀୟ ଏକାଦଶରେ ସ୍ଥାନ ମିଳିବ। କିନ୍ତୁ ମନୀଷ ପାଣ୍ଡେଙ୍କୁ ବାଦ୍ ଦିଆଯାଇପାରେ। ଏହି ଫର୍ମାଟରେ ପାଣ୍ଡ୍ୟା ବ୍ରଦର୍ସଙ୍କ ଖେଳିବା ପ୍ରାୟ ନିଶ୍ଚିତ। ଅନ୍ତିମ ଦିନିକିଆରେ ବିଶ୍ରାମ ଦିଆଯାଇଥିବା ଭୁବନେଶ୍ୱର କୁମାର, ଦୀପକ ଚହର ଓ ୟୁଜବେନ୍ଦ୍ର ଚହଲ ବୋଲିଂ ବିଭାଗ ସମ୍ଭାଳିବେ।
