ନୂଆ କାର୍ ତୁଳନାରେ କମ ଦାମ୍ରେ ଗାଡ଼ି ବା ସେକେଣ୍ଡ ହ୍ୟାଣ୍ଡ କାର୍ (Used Car) କିଣିବାକୁ ପସନ୍ଦ କରୁଛନ୍ତି। ତେବେ ବ୍ୟବହୃତ କାର୍ କିଣିବା ସମୟରେ କେବଳ ଗାଡ଼ିର କଣ୍ଡିଶନ ଏବଂ ଦାମ ଦେଖିବା ଯଥେଷ୍ଟ ନୁହେଁ। ଗାଡ଼ି ସହିତ ଜଡ଼ିତ ସମସ୍ତ ଜରୁରୀ କାଗଜପତ୍ରର ଯାଞ୍ଚ କରିବା ମଧ୍ୟ ସେତିକି ଆବଶ୍ୟକ। କାଗଜପତ୍ର କ୍ଷେତ୍ରରେ ସାମାନ୍ୟ ଅବହେଳା ଆପଣଙ୍କୁ ଭବିଷ୍ୟତରେ ଆଇନଗତ, ଆର୍ଥିକ ଏବଂ ମାଲିକାନା ସମ୍ବନ୍ଧୀୟ ବଡ଼ ସମସ୍ୟାରେ ପକାଇପାରେ।
ପୁରୁଣା କାର୍ କିଣିବା ସମୟରେ କେଉଁ ସବୁ ଡକ୍ୟୁମେଣ୍ଟ ଯାଞ୍ଚ କରିବା ଜରୁରୀ, ଆସନ୍ତୁ ଜାଣିବା:
୧. ସେଫ୍ଟି ଏବଂ ବୈଧତା ପାଇଁ ରେଜିଷ୍ଟ୍ରେସନ ସାର୍ଟିଫିକେଟ (RC):
ପୁରୁଣା କାର୍ କିଣିବା ବେଳେ ସବୁଠାରୁ ପ୍ରଥମେ ଗାଡ଼ିର ଆରସି (RC) ଯାଞ୍ଚ କରନ୍ତୁ। ଆରସିରେ ଗାଡ଼ିର ରେଜିଷ୍ଟ୍ରେଶନ ନମ୍ବର, ଚେସିସ ନମ୍ବର, ଇଞ୍ଜିନ ନମ୍ବର, ମାଲିକଙ୍କ ନାମ ଏବଂ ଗାଡ଼ିର ବୈଧତା ଅବଧି ଭଳି ଗୁରୁତ୍ୱପୂର୍ଣ୍ଣ ସୂଚନା ଥାଏ। କାର୍ରେ ଥିବା ଚେସିସ ଓ ଇଞ୍ଜିନ ନମ୍ବର ସହିତ ଆରସିର ନମ୍ବରକୁ ଭଲଭାବେ ମିଳାଇ ଦେଖନ୍ତୁ, ଯାହାଦ୍ୱାରା ଗାଡ଼ିଟି ଅସଲି ବୋଲି ପ୍ରମାଣିତ ହେବ।
୨. ମୂଳ କ୍ରୟ ବିଲ (Purchase Invoice):
ଯଦି ସମ୍ଭବ ହୁଏ, ଗାଡ଼ିର ମୂଳ କ୍ରୟ ବିଲ ମଧ୍ୟ ମାଗି ଦେଖନ୍ତୁ। ଏହାଦ୍ୱାରା ଜଣାପଡ଼ିବ ଯେ ଗାଡ଼ିଟି ଆଇନଗତ ଭାବେ କିଣାଯାଇଥିଲା। ଏହାସହ ଗାଡ଼ିଟି ପୂର୍ବରୁ ଲୋନ୍ରେ କିଣାଯାଇଥିଲା କି ନାହିଁ, ତାହାର ସୂଚନା ମଧ୍ୟ ଏଥିରୁ ମିଳିପାରିବ।
୩. ବୈଧ ବୀମା ବା ଇନସୁରାନ୍ସ (Insurance):
କାର୍ର ବୈଧ ଇନସୁରାନ୍ସ ପେପର ରହିବା ଅତ୍ୟନ୍ତ ଜରୁରୀ। ବୀମା କେବଳ ଆଇନଗତ ନିୟମ ପାଇଁ ନୁହେଁ, ବରଂ ଦୁର୍ଘଟଣା କିମ୍ବା ଗାଡ଼ିର କ୍ଷତିକ୍ଷତି ସମୟରେ ଆର୍ଥିକ ସୁରକ୍ଷା ପ୍ରଦାନ କରିଥାଏ। ବୀମାର ସ୍ଥିତି ଏବଂ ଏହାର ଶେଷ ତାରିଖ ନିଶ୍ଚିତ ଯାଞ୍ଚ କରନ୍ତୁ।
୪. ସର୍ଭିସ ରେକର୍ଡ (Service History):
ଗାଡ଼ିର ସର୍ଭିସ ରେକର୍ଡ ଦେଖିଲେ କାର୍ରେ ପ୍ରକୃତ ସ୍ଥିତି ଜଣାପଡ଼ିଥାଏ। ଯେଉଁ ଗାଡ଼ିର ନିୟମିତ ସର୍ଭିସିଂ ହୋଇଥାଏ, ତାହା ସାଧାରଣତଃ ଭଲ ଚାଲିଥାଏ। ଏହାସହ ଗାଡ଼ିରେ କୌଣସି ବଡ଼ ଧରଣର ମରାମତି ହୋଇଛି କିମ୍ବା କୌଣସି ପାର୍ଟସ ବଦଳାଯାଇଛି କି ନାହିଁ, ତାହା ସର୍ଭିସ ହିଷ୍ଟ୍ରିରୁ ଜଣାପଡ଼ିଯାଏ। ଆଜିକାଲି ଅନେକ କମ୍ପାନୀର ସର୍ଭିସ ରେକର୍ଡ ଅନଲାଇନ୍ରେ ମଧ୍ୟ ଉପଲବ୍ଧ ହେଉଛି।
୫. ଆରଟିଓ ଫର୍ମ ୨୮, ୨୯ ଏବଂ ୩୦ (RTO Forms):
ଗାଡ଼ିର ମାଲିକାନା ନିଜ ନାମକୁ ବଦଳାଇବା (Ownership Transfer) ପାଇଁ ଆର୍ଟିଓ ଫର୍ମ ୨୮ (NOC), ଫର୍ମ ୨ ଏବଂ ଫର୍ମ ୩୦ ଆବଶ୍ୟକ ହୋଇଥାଏ। ଏହି ଦସ୍ତାବେଜଗୁଡ଼ିକ ଗାଡ଼ିକୁ ପୁରୁଣା ମାଲିକଙ୍କ ନାମରୁ ନୂଆ ମାଲିକଙ୍କ ନାମକୁ ସରକାରୀ ଭାବେ ଟ୍ରାନ୍ସଫର କରିବାରେ ସାହାଯ୍ୟ କରେ। ଯଦି ଗାଡ଼ି ଉପରେ ପୂର୍ବରୁ କୌଣସି ଲୋନ୍ ଥିଲା, ତେବେ ବ୍ୟାଙ୍କରୁ ମିଳିଥିବା ଏନଓସି ସହିତ ଫର୍ମ ୩୨ ଏବଂ ୩୫ ଯାଞ୍ଚ କରିବା ଉଚିତ, ଯାହା ପ୍ରମାଣ କରେ ଯେ ଗାଡ଼ି ଉପରେ କୌଣସି ବକେୟା ଋଣ ନାହିଁ।
୬. ରୋଡ ଟ୍ୟାକ୍ସ ସ୍ଥିତି (Road Tax):
କାର୍ର ରୋଡ୍ ଟ୍ୟାକ୍ସ ସମ୍ପୂର୍ଣ୍ଣ ଭାବେ ପୈଠ କରାଯାଇଛି କି ନାହିଁ ତାହା ଦେଖିବା ଦରକାର। ବିଶେଷ କରି ଯଦି ଆପଣ ଅନ୍ୟ କୌଣସି ରାଜ୍ୟରୁ ଗାଡ଼ି କିଣୁଛନ୍ତି, ତେବେ ରୋଡ ଟ୍ୟାକ୍ସ ସମ୍ପର୍କିତ ନିୟମକୁ ଭଲଭାବେ ବୁଝିନେବା ଉଚିତ।
୭. PUC ସାର୍ଟିଫିକେଟ:
ପଲ୍ୟୁସନ ଅଣ୍ଡର କଣ୍ଟ୍ରୋଲ (PUC) ବା ପ୍ରଦୂଷଣ ପ୍ରମାଣପତ୍ର ଗାଡ଼ିର ପ୍ରଦୂଷଣ ମାନକକୁ ଦର୍ଶାଇଥାଏ। ବୈଧ ପିୟୁସି ବିନା ଗାଡ଼ି ଚଲାଇବା ଆଇନଗତ ଅପରାଧ, ତେଣୁ ଏହାର ବୈଧତା ଯାଞ୍ଚ କରିବା ଜରୁରୀ।
୮.ପେଣ୍ଡିଂ ଚାଲାଣ ଯାଞ୍ଚ:
କାର୍ କିଣିବା ପୂର୍ବରୁ ଅନଲାଇନ୍ ପୋର୍ଟାଲ (ଉଦାହରଣ ସ୍ବରୂପ: ପରିବହନ ସେବା) ସାହାଯ୍ୟରେ ନିଶ୍ଚିତ ଯାଞ୍ଚ କରନ୍ତୁ ଯେ ସେହି ଗାଡ଼ି ନାମରେ କୌଣସି ପେଣ୍ଡିଂ ଟ୍ରାଫିକ୍ ଚାଲାଣ, ଜରିମାନା କିମ୍ବା ଆଇନଗତ ବିବାଦ ରହିଛି କି ନାହିଁ। ପୂର୍ବ ଗାଡ଼ି ମାଲିକଙ୍କ ଚାଲାଣ ଯେପରି ଆପଣଙ୍କୁ ଭରିବାକୁ ନ ପଡ଼େ, ସେଥିପ୍ରତି ସତର୍କ ରୁହନ୍ତୁ।
