ନୂଆଦିଲ୍ଲୀ,୧୫।୯: ଡିଜିଟାଲ କାରବାର ଉପରେ ଶୁଳ୍କ ଲାଗୁ ନେଇ ବିରୋଧ ମଧ୍ୟରେ ସରକାର UPI ଉପରେ ମର୍ଚାଣ୍ଟ ଡିସକାଉଣ୍ଟ ରେଟ (MDR)କୁ ନେଇ ଏକ ନୂଆ ନିଷ୍ପତ୍ତି ନେଇଛନ୍ତି। ସରକାରଙ୍କ ଅନୁଯାୟୀ, ୨,୦୦୦ ଟଙ୍କାରୁ ଅଧିକ UPI ପେମେଣ୍ଟ ଉପରେ ବ୍ୟବସାୟୀମାନଙ୍କୁ ୦.୪ ପ୍ରତିଶତ ଶୁଳ୍କ ଦେବାକୁ ପଡ଼ିବ।
NPCI ମଙ୍ଗଳବାର ଦିନ ସୂଚନା ଦେଇଛି ଯେ ଅକ୍ଟୋବର ୧୫ରୁ UPI ମାଧ୍ୟମରେ ୨ ହଜାର ଟଙ୍କାରୁ ଊର୍ଦ୍ଧ୍ୱ କାରବାର ଉପରେ ବ୍ୟବସାୟୀମାନଙ୍କୁ ୦.୪ ପ୍ରତିଶତ ଫି’ ଦେବାକୁ ହେବ। ସେପଟେ ସୋମବାର ହିଁ ସରକାର ସ୍ପଷ୍ଟ କରିଥିଲେ ଯେ ୨୦୦୦ ଟଙ୍କା ପର୍ଯ୍ୟନ୍ତ UPI କାରବାର ଉପରେ ବ୍ୟାଙ୍କ କିମ୍ୱା ପେମେଣ୍ଟ ସର୍ଭିସ ପ୍ରୋଭାଇଡର୍ କୌଣସି ପ୍ରତ୍ୟକ୍ଷ ବା ପରୋକ୍ଷ ଶୁଳ୍କ ଲଗାଇ ପାରିବେ ନାହିଁ।
ଏହି ଶୁଳ୍କକୁ ମର୍ଚାଣ୍ଟ ଡିସକାଉଣ୍ଟ ରେଟ (MDR) କୁହାଯାଏ। ଏହି ଶୁଳ୍କ ୦.୪% ହେବ, କିନ୍ତୁ ଏହାର ସର୍ୱାଧିକ ସୀମା ପ୍ରତି କାରବାର (ଟ୍ରାଞ୍ଜାକସନ) ପିଛା ୩୦୦ ଟଙ୍କା ଧାର୍ଯ୍ୟ କରାଯାଇଛି। ଏହାର ଅର୍ଥ ହେଉଛି, ଯଦି କୌଣସି ଗ୍ରାହକ ଜଣେ ବ୍ୟବସାୟୀଙ୍କୁ ୭୫,୦୦୦ ଟଙ୍କା କିମ୍ୱା ତା’ଠାରୁ ଅଧିକ ଟଙ୍କାର UPI ପେମେଣ୍ଟ କରନ୍ତି, ତେବେ ୦.୪% ହିସାବରେ ତାହା ୩୦୦ ଟଙ୍କାରୁ ଅଧିକ ହୋଇପାରେ, କିନ୍ତୁ ବ୍ୟବସାୟୀଙ୍କ ଠାରୁ ସର୍ୱାଧିକ ୩୦୦ ଟଙ୍କା ହିଁ MDR ଶୁଳ୍କ ନିଆଯିବ।
୧୫ ଅକ୍ଟୋବର ୨୦୨୬ରୁ ର୍ନିଦ୍ଦିଷ୍ଟ କିଛି ମର୍ଚାଣ୍ଟ (P2M) କାରବାର ପାଇଁ UPI ମର୍ଚାଣ୍ଟ ଡିସକାଉଣ୍ଟ ରେଟ (MDR)ର ନୂଆ ଫ୍ରେମୱାର୍କ ଲାଗୁ ହେବ। ଏହା ସହିତ, ଗ୍ରାହକମାନଙ୍କ ପାଇଁ ୨ ହଜାର ଟଙ୍କା ପର୍ଯ୍ୟନ୍ତ ସମସ୍ତ କାରବାର ସମ୍ପୂର୍ଣ୍ଣ ମାଗଣା ରହିବ। ନୂଆ ନିୟମ ଅନୁଯାୟୀ, QR କୋଡ ମାଧ୍ୟମରେ ପ୍ରତି ମାସରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ରୋଜଗାର କରୁଥିବା ଛୋଟ ବ୍ୟବସାୟୀଙ୍କୁ କୌଣସି MDR ଦେବାକୁ ପଡ଼ିବ ନାହିଁ।
କାରବାର ରାଶିଲାଗୁ ହେବାକୁ ଥିବା MDR ବ୍ୟବସାୟୀ ଦେବାକୁ ଥିବା MDR
୩,୦୦୦୦ ଟଙ୍କାକୁ ୦.୪% ମାନେ ୧୨ଟଙ୍କା ଚାର୍ଜ। ୫୦,୦୦୦୦ ଟଙ୍କାକୁ ୦.୪% ମାନେ ୨୦୦ଟଙ୍କା ଚାର୍ଜ। ୭୫,୦୦୦ ଟଙ୍କା ବା ତା’ଠାରୁ ଅଧିକକୁ ଫିକ୍ସଡ ୩୦୦ଟଙ୍କା ଚାର୍ଜ।
ଏହା ବ୍ୟତୀତ ରେଳବାଇ ଏବଂ ଇନ୍ଧନ (Fuel) ଭଳି ସୱତନ୍ତ୍ର ବର୍ଗଗୁଡ଼ିକରେ ୨୦୦୦ ଟଙ୍କାରୁ ଅଧିକ କାରବାର ଉପରେ ୫ ଟଙ୍କାର ଫ୍ଲାଟ ଫି’ ଲାଗିବ, ଏବଂ ଅନ୍ୟାନ୍ୟ ବଡ଼ ମୂଲ୍ୟର P2M କାରବାର ଉପରେ ୦.୪% ଶୁଳ୍କ ଲାଗିବ, ଯାହାର ସର୍ୱାଧିକ ସୀମା ୩୦୦ ଟଙ୍କା ରହିବ।
ସରକାରଙ୍କ ଏହି ପଦକ୍ଷେପ ଅଧୀନରେ ଛୋଟ ଭେଣ୍ଡର ଏବଂ ଟିୟର-୩ ବଜାର ପାଇଁ ଡିଜିଟାଲ ପେମେଣ୍ଟ ଭିତ୍ତିଭୂମିକୁ ଉନ୍ନତ କରିବା ପାଇଁ ଏକ ସୱତନ୍ତ୍ର ପାଣ୍ଠି (Fund) ମଧ୍ୟ ଗଠନ କରାଯିବ। ସମସ୍ତ ବ୍ୟବସାୟୀଙ୍କ ପାଇଁ ୨୦୦୦ ଟଙ୍କା ପର୍ଯ୍ୟନ୍ତ କମ ମୂଲ୍ୟର UPI କାରବାର ଉପରେ ଏହାର କୌଣସି ପ୍ରଭାବ ପଡ଼ିବ ନାହିଁ, ଯାହାକି ସମୁଦାୟ UPI P2M କାରବାରର ୯୫% ରୁ ଅଧିକ ଅଂଶ।
