ଢେଙ୍କାନାଳ ଅଫିସ, ୧୧।୧୧: ପରିବେଶ ପର୍ଯ୍ୟଟନକୁ ନେଇ ଦେଶ ତଥା ଦେଶ ବାହାରେ ସୁନାମ ଅର୍ଜିଛି ଢେଙ୍କାନାଳ ଜିଲା। ସବୁଜିମା ବଳୟ ଘେରା କପିଳାସ ହେଉ କି ସପ୍ତଶଯ୍ୟା ସର୍ବଦା ପର୍ଯ୍ୟଟକଙ୍କୁ ଆକର୍ଷିତ କରିଆସିଛି। ଏହାକୁ ରୁରାଲ ଟୁରିଜମ୍ରେ ଅନ୍ତର୍ଭୁକ୍ତ କରି ଜିଲାର ପର୍ଯ୍ୟଟନକୁ ସଶକ୍ତ କରିବାକୁ ରାଜ୍ୟ ସରକାର ପ୍ରସ୍ତୁତ କରିଛନ୍ତି ନୀଳ ନକ୍ସା। ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ସପ୍ତଶଯ୍ୟା ପଞ୍ଚାୟତର ଡୋକ୍ରା ଶିଳ୍ପକଳାର ଗ୍ରାମ ସଦେଇବେରେଣୀ ନବଜୀବନପୁରରେ ବିକାଶ କରାଯାଇଛି କଳାକୃତି ଗ୍ରାମ। ଏଥିରେ ଖର୍ଚ୍ଚ ହୋଇଛି ପ୍ରାୟ ୫ କୋଟି ଟଙ୍କା। ତେବେ ୨୦୧୯ ଅଗଷ୍ଟରେ ଏହାର ନିର୍ମାଣ କାର୍ଯ୍ୟ ଶେଷ ହୋଇସାରିଥିଲେ ମଧ୍ୟ ଅଦ୍ୟାବଧି କାର୍ଯ୍ୟକ୍ଷମ ହୋଇପାରିନାହିଁ। ପରିଚାଳନା ଅଭାବରୁ କଳାକୃତି ଗ୍ରାମ ଲଟାବୁଦାରେ ପରିପୂର୍ଣ୍ଣ ହୋଇ ସରୀସୃପଙ୍କ ଆବାସସ୍ଥଳୀ ପାଲଟିଛି। ଏହାକୁ କାର୍ଯ୍ୟକ୍ଷମ କରିବାକୁ ନେଇ ପର୍ଯ୍ୟଟନ ବିଭାଗ ଏବଂ ଓର୍ମାସ ପରସ୍ପର ଉପରେ ଦୋଷ ଲଦାଲଦି ହେଉଥିବାବେଳେ ଅନିଶ୍ଚିତତା ମଧ୍ୟକୁ ଠେଲି ହୋଇଯାଇଛି ପ୍ରକଳ୍ପର ଭବିଷ୍ୟତ।
ଡୋକ୍ରା ହସ୍ତଶିଳ୍ପ ପାଇଁ ରାଜ୍ୟ, ଜାତୀୟ ତଥା ବିଦେଶରେ ସୁନାମ ଅର୍ଜିଛି ସଦେଇବେରେଣୀ ନବଜୀବନପୁର। ଗ୍ରାମର ୧୨୦ରୁ ଊର୍ଦ୍ଧ୍ୱ ଶିଳ୍ପୀ ଏହି ବିଲୁପ୍ତ ପ୍ରାୟ କଳା ସହିତ ଜଡ଼ିତ। ପର୍ଯ୍ୟଟନ ଋତୁରେ ସପ୍ତଶଯ୍ୟାକୁ ହଜାର ହଜାର ସଂଖ୍ୟାରେ ପର୍ଯ୍ୟଟକଙ୍କ ସମାଗମ ହେଉଥିବାବେଳେ ଡୋକ୍ରା ଗ୍ରାମର ବିକାଶ କରି ପର୍ଯ୍ୟଟନ ଶିଳ୍ପକୁ ବଢ଼ାଇବା ଲାଗି କରାଯାଇଥିଲା ଯୋଜନା। ତତ୍କାଳୀନ ଜିଲାପାଳ ରୁପାରୋଶନ ସାହୁଙ୍କ ପ୍ରସ୍ତାବକ୍ରମେ ୨୦୧୬-୧୭ରେ ସଦେଇବେରେଣୀ ନବଜୀବନପୁରରେ ଗ୍ରାମୀଣ ପର୍ଯ୍ୟଟନର ବିକାଶ କରିବାକୁ ନିଷ୍ପତ୍ତି ନେଇଥିଲେ ରାଜ୍ୟ ସରକାର। ପର୍ଯ୍ୟାୟକ୍ରମେ ୫କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଥିଲା କଳାକୃତି ଗ୍ରାମ। ଡୋକ୍ରା କାରିଗରଙ୍କ ସାମଗ୍ରୀ ନିର୍ମାଣ ନିମନ୍ତେ ହଲ୍, ସାମଗ୍ରୀ ବିକ୍ରୟ ଓ ପ୍ରଦର୍ଶନ କେନ୍ଦ୍ର, ମୁଖଶାଳା, ବୈଠକ ସ୍ଥଳୀ, ପର୍ଯ୍ୟଟକଙ୍କ ପାଇଁ ବିଶ୍ରାମସ୍ଥଳ ଏଥିରେ ଅନ୍ତର୍ଭୁକ୍ତ। ୨୦୧୯ ଅଗଷ୍ଟରେ ନିର୍ମାଣ ଶେଷ ହେବା ପରେ ରକ୍ଷଣାବେକ୍ଷଣ ଲାଗି ଏହାକୁ ପଞ୍ଚାୟତକୁ ହସ୍ତାନ୍ତର କରାଯାଇଥିଲା। ହେଲେ ପଞ୍ଚାୟତ ଅରାଜି ହେବା ପରେ ଏହାକୁ ପର୍ଯ୍ୟଟନ ବିଭାଗ ଏବଂ ଜିଲା ପ୍ରଶାସନର ନିଷ୍ପତ୍ତି କ୍ରମେ ଏବେ ଓରମାସ୍କୁ ଏହାର ଦାୟିତ୍ୱ ଦିଆଯାଇଛି। ହେଲେ ଅର୍ଥାଭାବରୁ ପ୍ରକଳ୍ପ ପରିସରରେ ଆବଶ୍ୟକ ଆନୁଷଙ୍ଗିକ କାର୍ଯ୍ୟ କରିପାରୁନି ଓର୍ମାସ। ଅନ୍ୟପଟେ ରକ୍ଷଣାବେକ୍ଷଣ ପାଇଁ କର୍ମଚାରୀ ନିଯୁକ୍ତି ଦିଆଯିବାର ଆବଶ୍ୟକତା ରହିଥିବାବେଳେ ଅର୍ଥ ସଙ୍କଟ ଏଥିରେ ଅନ୍ତରାୟ ସାଜିଛି। ଫଳରେ ପର୍ଯ୍ୟଟକଙ୍କୁ ଆକୃଷ୍ଟ କରିବା ଏବଂ ଗ୍ରାମୀଣ ପର୍ଯ୍ୟଟନକୁ ପ୍ରୋତ୍ସାହନ ଦେବା ପାଇଁ ନିର୍ମିତ ଏହି ପ୍ରକଳ୍ପର କାର୍ଯ୍ୟକାରିତାକୁ ନେଇ ଅନିଶ୍ଚିତତା ଦେଖାଦେଇଛି। କରୋନା ମହାମାରୀ ସମୟରେ ଡୋକ୍ରା ଶିଳ୍ପୀଙ୍କ ଜୀବିକା ପ୍ରଭାବିତ ହୋଇଥିବାବେଳେ ପ୍ରକଳ୍ପ କାର୍ଯ୍ୟକ୍ଷମ ହେଲେ ସେମାନେ ଏହାକୁ ପୁଞ୍ଜି କରି ଆର୍ଥିକ ଅବସ୍ଥା ସୁଧାରିପାରନ୍ତେ ବୋଲି ବୁଦ୍ଧିଜୀବୀମାନେ କହିଛନ୍ତି।
ଏ ସଂକ୍ରାନ୍ତରେ ସରପଞ୍ଚ ଜେଶସ ସାହୁ କୁହନ୍ତି, ରକ୍ଷଣାବେକ୍ଷଣରେ ସମସ୍ୟା ଉପୁଜିବାରୁ ଏହାର ଦାୟିତ୍ୱ ନେଲୁ ନାହିଁ। ପ୍ରକଳ୍ପ ଶେଷ ପର୍ଯ୍ୟାୟରେ ପହଞ୍ଚତ୍ଥିଲେ ବି କାର୍ଯ୍ୟକ୍ଷମ ହୋଇପାରୁନାହିଁ। ଜିଲା ପର୍ଯ୍ୟଟନ ଅଧିକାରୀ ଜଗଦୀଶ ରାୟ କୁହନ୍ତି, ପ୍ରକଳ୍ପ କାର୍ଯ୍ୟ ଶେଷ ହେବା ପରେ ଏହାକୁ ଓର୍ମାସକୁ ହସ୍ତାନ୍ତର କରାଯାଇଛି। ତେଣୁ ଜିଲା ପର୍ଯ୍ୟଟନ ବିଭାଗର କୌଣସି ଭୂମିକା ନାହିଁ। ଜିଲା ଓର୍ମାସ ଡେପୁଟି ସିଇଓ ନିରୋଜ ଜେନା କୁହନ୍ତି, ପର୍ଯ୍ୟଟନ ବିଭାଗ ପ୍ରକଳ୍ପ ହସ୍ତା ନ୍ତର କରି ଦାୟିତ୍ୱ ସାରିଦେଇଛି। ଏଠାରେ କିଛି କାମ ବାକି ରହିଛି। ଅର୍ଥାଭାବରୁ ଏହା କରାଯାଇପାରୁନାହିଁ। ରକ୍ଷଣାବେକ୍ଷଣ ପାଇଁ କର୍ମଚାରୀ ମଧ୍ୟ ଆବଶ୍ୟକ। ଏସବୁ ବିଷୟରେ ଜିଲାପାଳଙ୍କୁ ଲିଖିତ ଭାବେ ଅବଗତ କରାଯାଇଛି।
