ଲଣ୍ଡନ/କ୍ୱିଭ୍, ୬।୬ : ବ୍ରିଟେନ ଅତ୍ୟାଧୁନିକ ଏମ୍-୨୭୦ ମଲ୍ଟିପୁଲ ରକେଟ ଲଞ୍ଚର ୟୁକ୍ରେନକୁ ଯୋଗାଇବାକୁ ଘୋଷଣା କରିଛି। ଏହି ରକେଟ ଲଞ୍ଚରର ପ୍ରଭାବଶାଳୀ ଫାୟାରିଂ ପରିସର ୮୦ କିଲୋମିଟର ବୋଲି କୁହାଯାଉଛି। ରୁଷିଆ ସହିତ ଯୁଦ୍ଧ ଆରମ୍ଭରୁ ବ୍ରିଟେନ ୟୁକ୍ରେନକୁ ବିଭିନ୍ନ ସାହାଯ୍ୟ ଯୋଗାଇ ଦେଇଛି। ଚଳିତ ବର୍ଷ ମାର୍ଚ୍ଚରେ ବ୍ରିଟେନ ୟୁକ୍ରେନକୁ ଆଣ୍ଟି-ଏୟାରକ୍ରାଫ୍ଟ କ୍ଷେପଣାସ୍ତ୍ର ପଠାଇଥିଲା।
ବ୍ରିଟେନର ପ୍ରତିରକ୍ଷା ସଚିବ ବେନ ୱାଲେସ କହିଛନ୍ତି ଯେ ୟୁକ୍ରେନ ପାଇଁ ବ୍ରିଟେନର ସମର୍ଥନ ଜାରି ରହିବ। କିଛି ଦିନ ପୂର୍ବରୁ ଆମେରିକା ମଧ୍ୟ ୟୁକ୍ରେନକୁ ହରପୁନ ଆଣ୍ଟି-ଶିପ ମିସାଇଲ ଏବଂ ଏମ୍-୧୪୨ ହାଇ ମୋବିଲିଟି ଆର୍ଟିଲିରି ରକେଟ ସିଷ୍ଟମ ଦେବାକୁ ଘୋଷଣା କରିଥିଲା।
ବ୍ରିଟେନ କହିଛି ଏହା ୟୁକ୍ରେନର ପ୍ରତିରକ୍ଷା ପାଇଁ ଉପଯୋଗୀ ହେବ। ବ୍ରିଟେନର ପ୍ରତିରକ୍ଷା ସଚିବ ବେନ ୱାଲେସ କହିଛନ୍ତି ଯେ ଏହି ଉଚ୍ଚ କ୍ଷମତା ସମ୍ପନ୍ନ ରକେଟ ଲଞ୍ଚର ୟୁକ୍ରେନର ଦୀର୍ଘ ଦୂରଗାମୀ ଆର୍ଟିଲିରି ବ୍ୟବସ୍ଥାକୁ ସୁଦୃଢ଼ କରାଇବ। ବ୍ରିଟେନ କହିଛି ଯେ ନୂତନ ଲଞ୍ଚ ର କିପରି ବ୍ୟବହାର କରାଯିବ ସେନେଇ ୟୁକ୍ରେନ ସୈ ନ୍ୟମାନଙ୍କୁ ତାଲିମ ଦିଆଯିବ। ସମ୍ପ୍ରତି ବ୍ରିଟିଶ ସେନା ୟୁକ୍ରେନ ସୈନିକମାନଙ୍କୁ ସଶସ୍ତ୍ର ଯାନ ବ୍ୟବହାର ପାଇଁ ତାଲିମ ଦେଉଛି ।
