ଆଣ୍ଟିଗୁଆ,୩।୭: ଏଠାରେ ଶୁକ୍ରାବର ପାକିସ୍ତାନ ବିପକ୍ଷରେ ଖେଳାଯାଇଥିବା ବର୍ଷା ବାଧାପ୍ରାପ୍ତ ମହିଳା ଟି୨୦ ମ୍ୟାଚ୍ରେ ହଠାତ୍ ଚେତାଶୂନ୍ୟ ହୋଇପଡ଼ି ଯାଇଥିଲେ ଓ୍ବେଷ୍ଟଇଣ୍ଡିଜର ଚିନେଲେ ହେନରୀ ଓ ଚେଦିନ ନେଶନ। ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ତେବେ ଉଭୟଙ୍କ ଚେତା ଫେରିଛି। ସେମାନଙ୍କ ଅବସ୍ଥା ସ୍ଥିର ଥିବା କ୍ରିକେଟ ଓ୍ବେଷ୍ଟଇଣ୍ଡିଜ ପକ୍ଷରୁ କୁହାଯାଇଛି।
ପାକିସ୍ତାନ ଦଳର ବିଜୟ ଲକ୍ଷ୍ୟର ପିଛା କରୁଥିବାବେଳେ ଉଭୟ ଘଟଣା ଘଟିଥିଲା। ଦୁହେଁ ଆହତ ହୋଇ ମ୍ୟାଚ୍ରୁ ବାଦ୍ ପଡ଼ିବାରୁ ଦୁଇ ବଦଳ (ସବଷ୍ଟିଚ୍ୟୁଟ) ଖେଳାଳିଙ୍କୁ ପଡ଼ିଆରେ ଓହ୍ଲାଇଥିଲା ଓ୍ବେଷ୍ଟଇଣ୍ଡିଜ ଦଳ। ଶେଷରେ ଡକଓ୍ବର୍ଥ ଲୁଇସ ମେଥଡ୍ରେ ଘରୋଇ ଦଳକୁ ବିଜୟୀ ଘୋଷିତ କରାଯାଇଥିଲା।
ଏଭଳି ପରିସ୍ଥିତିରେ ଖେଳିବା ସହଜ ନୁହେଁ। ଆହତ ସଦସ୍ୟାଙ୍କ ସମ୍ପର୍କରେ ଜାଣିବା ପାଇଁ ଆମେ ଅପେକ୍ଷା କରିଛୁ। ସେମାନଙ୍କ ପ୍ରତି ଆମର ସମ୍ପୂର୍ଣ୍ଣ ସମର୍ଥନ ରହିଛି ବୋଲି ଓ୍ବେଷ୍ଟଇଣ୍ଡିଜ ଦଳର କୋଚ୍ କର୍ଟନି ଓ୍ବାଲଶ କହିଛନ୍ତି।
