ଲଣ୍ଡନ, ୧୨ା୭ (ଏପି)-କରୋନା ଭାଇରସ୍ ଯୋଗୁ ମହିଳା ଓ ପୁରୁଷ ଟେନିସ୍ ଟୁର୍ ସ୍ଥଗିତ ରଖାଯାଇଥିଲା। ଏହି ସମୟ ମଧ୍ୟରେ ଅନୁଷ୍ଠିତ ୨୪ଟି ପ୍ରଦର୍ଶନୀ ମ୍ୟାଚକୁ ଟେନିସ ଇଣ୍ଟିଗ୍ରିଟି ୟୁନିଟ୍ (ଟିଆଇୟୁ) ସନ୍ଦେହ ଚକ୍ଷୁରେ ଦେଖୁଛି। ଟିଆଇୟୁ ଖେଳରେ ମ୍ୟାଚ୍ ଫିକ୍ସିଂ ଅଭିଯୋଗର ତଦନ୍ତ କରିଥାଏ। ଏପ୍ରିଲ ଓ ଜୁନ୍ ମଧ୍ୟରେ ଅନୁଷ୍ଠିତ ଘରୋଇ ଟୁର୍ନାମେଣ୍ଟଗୁଡ଼ିକ ନେଇ ଏହାକୁ ରିପୋର୍ଟ ମିଳିଛି। ଲକ୍ଡାଉନ୍ ସମୟରେ ଖେଳାଯାଇଥିବା ମ୍ୟାଚରେ ବେଟିଂ ଅବା ଫିକ୍ସିଂ ହୋଇଥିବା ଯାହା ସନ୍ଦେହ କରାଯାଉଛି ଯଦି ସତ୍ୟ ବୋଲି ଜଣାପଡ଼େ ଖେଳ ପାଇଁ ଶୁଭଙ୍କର ନୁହେଁ। ଅଗଷ୍ଟରେ ଯେତେବେଳେ ପ୍ରଫେଶନାଲ ଟେନିସ ଆରମ୍ଭ ହେବ ଦୁର୍ନୀତିଖୋରମାନଙ୍କ ଖରାପ ନଜର ପଡ଼ିପାରେ। ମାର୍ଚ୍ଚରେ ଏଟିପି ଓ ଡବ୍ଲ୍ୟୁଟିଏ ଟୁର୍ ବନ୍ଦ ହୋଇଯିବା ପରେ ବିଭିନ୍ନ ସ୍ଥାନରେ ଘରୋଇ ପ୍ରଦର୍ଶନୀ ମ୍ୟାଚ ଆୟୋଜିତ ହୋଇଥିଲା। ଏଥିରେ ବହୁ ନିମ୍ନ ର଼୍ୟାଙ୍କିଙ୍ଗପ୍ରାପ୍ତ ଖେଳାଳି ଅଂଶଗ୍ରହଣ କରିଥିଲେ। ତେବେ ଗୋଟିଏ ଟେନିସ ଇଭେଣ୍ଟରେ ନାମୀ ଖେଳାଳିମାନେ ଭାଗ ନେଇଥିଲେ।
