ଲଣ୍ଡନ,୩।୮(ପି.ଟି.): ଆସନ୍ତା ବୁଧବାରଠାରୁ ଆରମ୍ଭ ହେବାକୁ ଯାଉଥିବା ପାକିସ୍ତାନ ବିପକ୍ଷ ଟେଷ୍ଟ ସିରିଜ ପାଇଁ ଇଂଲଣ୍ଡ ନୂଆ ବ୍ୟାଟିଂ କୋଚ୍ ନିଯୁକ୍ତ କରିଛି। ଏହି ୩ ମ୍ୟାଚ୍ ବିଶିଷ୍ଟ ସିରିଜରେ ପୂର୍ବତନ ବ୍ୟାଟ୍ସମ୍ୟାନ ଜୋନାଥନ ଟ୍ରଟ୍ ଇଂଲଣ୍ଡର ବ୍ୟାଟିଂ କୋଚ୍ ଭାବେ ଦାୟିତ୍ୱ ନେବେ। ୩୯ ବର୍ଷୀୟ ଟ୍ରଟ୍ ୨୦୦୯ରୁ ୨୦୧୫ ମଧ୍ୟରେ ୫୨ଟି ଟେଷ୍ଟ ଖେଳି ୩୮୩୫ ରନ ସଂଗ୍ରହ କରିଛନ୍ତି। ପୂର୍ବତନ ନ୍ୟୁଜିଲାଣ୍ଡ ସ୍ପିନର ଜିତେନ ପଟେଲ ଓ ଓ୍ବାରଓ୍ବିକ୍ସସାୟର ପୂର୍ବତନ ଦ୍ରୁତ ବୋଲର ଗ୍ରେମ୍ ଓ୍ବେଲଚ୍ ଟ୍ରଟ୍ଙ୍କୁ କୋଚିଂରେ ସହାୟତା ପ୍ରଦାନ କରିବେ। ଟ୍ରଟ୍ ମଧ୍ୟ ୬୮ଟି ଦିନିକିଆ ଓ ୭ଟି ଟି୨୦ ମ୍ୟାଚ୍ ଖେଳିଛନ୍ତି। ଘରୋଇ କ୍ରିକେଟରେ ଟ୍ରଟ୍ ୧୮, ୬୬୨ ରନ ସଂଗ୍ରହ କରିଛନ୍ତି।
ମାଞ୍ଚେଷ୍ଟରର ଓଲ୍ଡ ଟ୍ରାଫୋର୍ଡ ଗ୍ରାଉଣ୍ଡରେ ବୁଧବାର ପ୍ରଥମ ଟେଷ୍ଟରେ ଇଂଲଣ୍ଡ ଓ ପାକିସ୍ତାନ ପରସ୍ପରକୁ ଭେଟିବେ। ଏହାପରେ ପରବର୍ତ୍ତୀ ଦୁଇଟି ମ୍ୟାଚ୍ ସାଉଥାମ୍ପଟନର ରୋଜ ବାଉଲ ଗ୍ରାଉଣ୍ଡରେ ଖେଳାଯିବ। ଗତ ଓ୍ବେଷ୍ଟଇଣ୍ଡିଜ ବିପକ୍ଷ ଟେଷ୍ଟ ସିରିଜରେ ଇଂଲଣ୍ଡ ୨-୧ରେ ବିଜୟୀ ହୋଇଥିଲା। କୋଭିଡ୍-୧୯ ମହାମାରୀର ପ୍ରକୋପ ଜାରି ରହିଥିବା ବେଳେ ଦୀର୍ଘ ୪ ମାସ ପରେ ଏହି ସିରିଜ ଦ୍ୱାରା ଅନ୍ତର୍ଜାତୀୟ କ୍ରିକେଟର ପ୍ରତ୍ୟାବର୍ତ୍ତନ ହୋଇଥିଲା।
