ଭୋଗରାଇ,୧୩ା୭(ପ୍ରଦୀପ ଦାସ): ପଶ୍ଚିମବଙ୍ଗ ପୂର୍ବମେଦିନୀପୁର ଜିଲା ଶଙ୍କରପୁର ମତ୍ସ୍ୟ ଅବତରଣ କେନ୍ଦ୍ର(ଜେଟିରୁ )ରୁ ଗତ ୨ ତାରିଖରୁ ସମୁଦ୍ରକୁ ଯାଇ ନିଖୋଜ ଥିବା ମା’ କାଳୀ ନାମକ ଟ୍ରଲର ରବିବାର ଦକ୍ଷିଣ ୨୪ ପ୍ରଗଣା ଜିଲା ବକଖାଲିଠାରୁ ୩୫ କିମି ଦୂର ଚୁଲକାଟି ଜଙ୍ଗଲ ବାଘେର ଛକଠାରୁ ଟ୍ରଲରକୁ ଠାବ କରାଯାଇଥିବାର ସୂଚନା ମିଳିଛି। ଏହି ଟ୍ରଲରରେ ୯ ଜଣ ମତ୍ସ୍ୟଜୀବୀଙ୍କୁ ମୃତାବସ୍ଥାରେ ସେଠାକାର ମତ୍ସ୍ୟଜୀବୀ ଉଦ୍ଧାର କରିଛନ୍ତି। ଟ୍ରଲର ଭିତରେ ଅନ୍ୟ ୬ ମତ୍ସ୍ୟଜୀବୀ ମୃତାବସ୍ଥାରେ ଥାଇପାରନ୍ତି ବୋଲି ଉଦ୍ଧାରକାରୀ ଦଳ ଅନୁମାନ କରିଥିବାର କହିଛନ୍ତି।
ସୂଚନାନୁଯାୟୀ,ଉକ୍ତ ଟ୍ରଲରେ ୧ ୫ ଜଣ ମତ୍ସ୍ୟଜୀବୀ ଥିବାବେଳେ ଏଥି ମଧ୍ୟରୁ ଓଡିଶାର ବାଲେଶ୍ୱରଜିଲା ଭୋଗରାଇ ବ୍ଲକ ଉଲୁଡ଼ା ଗ୍ରାମର ରବୀନ୍ଦ୍ର ମାଝୀ, ଜଗନ୍ନାଥ ମାଝୀ ଓ ଜୟରାମ ମାଝୀ ଗୋଟିଏ ପରିବାରର ୩ ଭାଇ ଅଛନ୍ତି। ସମୁଦ୍ର ଅଶାନ୍ତ ଥିବାବେଳେ ଏହି ମାଛ ଧରା ଟ୍ରଲର ଗଭୀର ସାମୁଦ୍ରିକ ଝଡ଼ରେ ଭାରସାମ୍ୟ ହରାଇ ଓଲଟି ପଡ଼ିଥିବାର ଅନୁମାନ କରାଯାଉଛି। ଦୁର୍ଘଟଣାଗ୍ରସ୍ତ ଟ୍ରଲରଟିକୁ ସୁନ୍ଦରବନ ଗୋବର୍ଦ୍ଧନପୁର ସାମୁଦ୍ରିକ ଥାନା ଅଧୀନକୁ ଅଣାଯାଇଛି। ଭାରତୀୟ ତଟରକ୍ଷୀ ବାହିନୀ, ବନଦପ୍ତର ଓ ମତ୍ସ୍ୟଜୀବୀ ସଂଘ ମିଳିତ ଉଦ୍ୟମରେ ତଲାସୀ ଅଭିଯାନ ଜାରିରହିଥିଲା। ଟ୍ରଲର ମାଲିକ ସେଠାରେ ପହଞ୍ଚିଥିବାର ସୂଚନା ମିଳିଛି। ଅପରପକ୍ଷରେ ଟ୍ରଲର ମୃତଦେହ ଉଦ୍ଧାର ଖବର ପ୍ରଚାର ପରେ ନିଖୋଜ ଥିବା ମତ୍ସ୍ୟଜୀବୀଙ୍କ ଆତ୍ମୀୟସ୍ବଜନ ଶଙ୍କରପୁର ଜେଟିରେ ବୁକୁଫଟା କ୍ରନ୍ଦନରେ ହୃଦୟ ବିଦାରକ ଦୃଶ୍ୟ ନଜରକୁ ଆସିଛି।
