କୋରାପୁଟ,୨।୭(ଅମିତାଭ ବେହେରା): କୋରାପୁଟ ଜିଲା କିରଣ୍ଡଳ ଲାଇନର ଜରତି ଗ୍ରାମ ନିକଟରେ ଥିବା ପାହାଡରୁ ମାଟି ଅତଡା ଖସିବା ଯୋଗୁ ରେଳ ଚଳାଚଳ ବାଧାପ୍ରାପ୍ତ ହୋଇଛି। ଏହାକୁ ଦୃଷ୍ଟିରେ ରଖି ଏହି ରୁଟରେ ସମସ୍ତ ଟ୍ରେନ ଚଳାଚଳ ଠପ ହୋଇଛି। ୩ ଏକ୍ସପ୍ରେସ ଟ୍ରେନ ଚଳାଚଳକୁ ବୁଧବାର ପାଇଁ ବାତିଲ କରାଯାଇଥିବା ନେଇ ବରିଷ୍ଠ ଡିଭିଜିନାଲ କମର୍ସିଆଲ ମ୍ୟାନେଜର କେ. ସନ୍ଦିପ ସୁଚନା ଦେଇଛନ୍ତି।
ସୂଚନା ମୁତାବକ, ବୁଧବାର ଅପରାହ୍ନ ପ୍ରାୟ ୩ଟା ୧୫ ମିନିଟରେ କୋରାପୁଟ ବ୍ଲକର ଜରତି ଷ୍ଟେଶନ ନିକଟରେ ଥିବା ପାହାଡରୁ ମାଟି ଅତଡା ଖସି ରେଳଧାରଣାରେ ପଡିବାରୁ ଏହି ଲାଇନରେ ଟ୍ରେନ ଚଳାଚଳ ବନ୍ଦ ହୋଇଛି। ଏହି ସମୟରେ ଜଗଦଲପୁରରୁ ରାଉଲକେଲା ଆସିଥିବା ରାଉଲକେଲା ଏକ୍ସପ୍ରେସ ଟ୍ରେନ ଅଳ୍ପକେ ବର୍ତ୍ତି ଯାଇଛି। ଏହି ଘଟଣା ଯୋଗୁ ମାଳିଗୁଡା ଷ୍ଟେଶନରେ ଜଗଦଲପୁର – ରାଉଲକେଲା ଏକ୍ସପ୍ରେସ ଟ୍ରେନ ଅଟକି ରହିଥିବାବେଳେ ଜୟପୁର ଷ୍ଟେଶନଠାରେ ଜଗଦଲପୁରଠାରୁ ଭୁବେନେଶ୍ୱର ଯାଉଥିବା ୧୮୪୪୮ ହୀରାଖଣ୍ଡ ଏକ୍ସପ୍ରେସ ଟ୍ରେନ ଅଟକି ରହିଛି। ସେହିପରି ବୁଧବାର ଯିବାକୁ ଥିବା କିରଣ୍ଡଲ ଓ ବିଶାଖାପାଟଣା ଏକ୍ସପ୍ରେସ ଟ୍ରେନ(୧୯୫୧୬) ସମେତ ୩ ଟ୍ରେନକୁ ବାତିଲ କରାଯାଇଛିା ବର୍ତ୍ତମାନ କୋରାପୁଟରୁ ଏକ ଉଦ୍ଧାରକାରୀ ଟିମ ଘଟଣାସ୍ଥଳକୁ ଯାଇଥିବା ଜଣାଯାଇଛି । ଜରତି ଓ ମାଳିଗୁଡା ରେଳ ଲାଇନର ୨୦୮ କିମି ଦୂରରେ ଏହି ମାଟି ଅତଡା ଖସିଛି।
ସୁଚନାଯୋଗ୍ୟ, ଗତ କିଛି ଦିନ ହେଲା କୋରାପୁଟ ଜିଲାରେ ପ୍ରବଳ ବର୍ଷା ହେଉଥିବାରୁ ପାହାଡରୁ ମାଟି ଅତଡା ଖସିଛି। ଏହା ରେଳ ଧାରଣାରେ ପଡିବାରୁ ଟ୍ରେନ ଚଳାଚଳ ବନ୍ଦ ରହିଛି ା ପୁର୍ବରୁ ମଧ୍ୟ ଏହି ସ୍ଥାନରେ ବହୁବାର ମାଟି ଅତଡା ଖସି ଟ୍ରେନ ଚଳାଚଳ ଏପରିକି ମାସାଧିକ ସମୟ ପର୍ଯ୍ୟନ୍ତ ବନ୍ଦ ରହିଥିବା ନଜିର ରହିଛିା
