ଧର୍ମଶାଳା,୧୨ା୩(ଶିବ ପ୍ରସାଦ ମହାନ୍ତି): ପରିବହନ ବିଭାଗ ପକ୍ଷରୁ ନିୟମ ଅନେକ ରହିଥିଲେ ସୁଦ୍ଧା ତାହା ଟ୍ରାକ୍ଟରଗୁଡ଼ିକ ପାଇଁ ସଠିକ୍ ଭାବରେ ପାଳନ କରାଯାଉନାହିଁ। ଯାଜପୁର ଜିଲା ଧର୍ମଶାଳା ଅଞ୍ଚଳରେ ଏହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳୁଛି । ଟ୍ରାକ୍ଟରଗୁଡ଼ିକ ବିନା ଫିଟନେସ୍,ଇନ୍ସ୍ୟୁରାନସ୍ ଓ ପରମିଟ୍ରେ ରାସ୍ତାରେ ଚାଲୁଛି। ସରକାରୀ ନିୟମକୁ ଉଲଘଂନ କରି ଚଳାଇ ଆସୁଛନ୍ତି ଶହଶହ ଟ୍ରାକ୍ଟର। କେବଳ ଏତିକି ନୁହେଁ ବରଂ
ଛୋଟ ଛୋଟ ପିଲା ଯାହାଙ୍କ ବୟସ ୧୮ବର୍ଷରୁ କମ୍ ସେମାନେ ଲୋଡ ଟ୍ରାକ୍ଟର ଧରି ଦ୍ରୁତଗତିରେ ଗାଡ଼ି ଚାଳନା କରୁଥିଲେ ବି ପ୍ରଶାସନ ଏ ସବୁକୁ ନଜର ଅନ୍ଦାଜ କରି ଆସୁଛି । ଯଦି ବି କେବେ କେମିତି ପ୍ରଶାସନ ଦୃଷ୍ଟିରେ ଆସି ଯାଉଛି କଡ଼ା କାର୍ଯ୍ୟାନୁଷ୍ଠାନ ବଦଳରେ ଲାଞ୍ଚ କାରବାରରେ ଛଡ଼ା ଯାଉଥିବା ଅଭିଯୋଗ ହୋଇଛି। ଯାହା ଫଳରେ ପିଲାଙ୍କ ହାତରେ ମାଲିକ ଗାଡ଼ି ଧରେଇ କମ୍ ଟଙ୍କା ଦରମା ଦେଇ ରାସ୍ତାରେ ଯାଉଥିବା ପଥିକ ଏବଂ ସାଧାରଣ ଲୋକଙ୍କ ଜୀବନ ସହ ଖେଳ ଖେଳୁଛି। ଧର୍ମଶାଳା ନିର୍ବାଚନ ମଣ୍ଡଳୀରେ ଖଣି ଖାଦାନ ଓ ବାଲି ପାଇଁ ସବୁ ସମୟରେ ମାଲ ପରିବହନ ଗାଡ଼ିଗୁଡ଼ିକ ଉପରେ ବିଶେଷ ଭାବେ ନିର୍ଭର କରିବାକୁ ପଡ଼ିଥାଏ। କିନ୍ତୁ ଛୋଟଛୋଟ ପିଲାଙ୍କ ହାତରେ ଗାଡ଼ି ଏକ ବଡ ଚିନ୍ତାର ବିଷୟ ପାଲଟିଛି।
ଅନ୍ୟପକ୍ଷରେ ଟ୍ରାକ୍ଟର ଗାଡ଼ି ଚଳାଉଥିବା ଚାଳକଙ୍କ ପାଖେ ଲାଇସେନ୍ସ ନ ଥିବା ଏବଂ ମଦ୍ୟପାନ କରି ଚଲାଉଥିବା ସତ୍ତ୍ୱେ ପ୍ରଶାସନର କୌଣସି ନିଘା ନ ଥିବା ଦେଖିବାକୁ ମିଳୁଛି। ସ୍କୁଲ, କଲେଜ, ଟ୍ୟୁଶନ ପାଇଁ ଛୋଟ ବଡ଼ ପିଲାମାନେ ମଧ୍ୟ ଯାଇଥାନ୍ତି। ମାତ୍ର ମନମୁଖୀ ଭାବେ କିଛି ଟ୍ରାକ୍ଟର ଯାତାୟାତ କରୁଥିବାରୁ ସମସ୍ତଙ୍କ ଜୀବନ ପ୍ରତି ବିପଦ ସୃଷ୍ଟି କରୁଥିବା ଆଲୋଚନା ହେଉଛି।
ସେହିପରି ଯାହାର ଏକାଧିକ ଟ୍ରାକ୍ଟର ଅଛି ସେମାନଙ୍କ ମଧ୍ୟରୁ କିଛି ଗାଡ଼ି ମାଲିକ ଚତୁରତା କରି ଗୋଟିଏ ରେଜିଷ୍ଟେଶନ ନମ୍ବରରେ ଏକାଧିକ ଟ୍ରାକ୍ଟର ଚଳାଉଥିବା ମଧ୍ୟ ଖବର ମିଳିଛି। ଏକାଧିକ ଗାଡ଼ିର ଟ୍ୟାକ୍ସ, ଫିଟନେସ୍ ଓ ଇନ୍ସ୍ୟୁରାନ୍ସ କରାଯାଉନାହିଁ। ଯାହା ଫଳରେ ସରକାରୀ ନିୟମର ଖୁଲମଖୁଲା ଉଲ୍ଲଘଂନ କରାଯାଉଛି। ଏହା ଉପରେ ପରିବହନ ମନ୍ତ୍ରୀ ଦୃଷ୍ଟି ଦେବା ସହ ଅମାନିଆଙ୍କୁ ସାବାଡ଼ କରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି।
