ବାସୁଦେବପୁର,୨୮।୯(ଡି.ଏନ.ଏ.)-ଭଦ୍ରକ ଜିଲାର ବାସୁଦେବପୁର ହେଉଛି ସଂଗ୍ରାମର ମାଟି। ୧୯୪୨ ଭାରତଛାଡ଼ ଆନ୍ଦୋଳନ ସମୟରେ ବାସୁଦେବପୁର, ଇରମ ଓ ନଦୀଘେରଦ ଅଞ୍ଚଳର ସଂଗ୍ରାମୀମାନେ ନେତୃତ୍ୱ ନେଇଥିଲେ। ଇଂରେଜ ସରକାରଙ୍କ ବିରୋଧରେ ଏହି ଅଞ୍ଚଳରେ ଜନଜାଗରଣ ସୃଷ୍ଟି ହୋଇସାରିଥିବା ବେଳେ ୧୯୪୨ ସେପ୍ଟେମ୍ବର ୨୮ରେ ଇରମଠାରେ ନଅଣ ପୋଖରୀ ନିକଟସ୍ଥ ମେଳନ ପଡ଼ିଆରେ ଇଂରେଜମାନଙ୍କ ଗୁଳିରେ ଶହୀଦ ହୋଇଥିଲେ ୨୯ଜଣ ସଂଗ୍ରାମୀ। ୬୪ରୁ ଊର୍ଦ୍ଧ୍ୱ ସଂଗ୍ରାମୀ କ୍ଷତବିକ୍ଷତ ହୋଇଥିଲେ। ଯାହାକି ଏକ ଲୋମହର୍ଷଣକାରୀ ଇତିହାସ ହୋଇରହିଛି। ପ୍ରତିବର୍ଷ ସେପ୍ଟେମ୍ବର ୨୮କୁ ଶହୀଦ ସ୍ମୃତି ଦିବସ ଭାବେ ପାଳନ କରାଯାଇ ଆସୁଛି। ହେଲେ ରକ୍ତତୀର୍ଥ ଇରମ ତଥା ଶହୀଦ ସ୍ମୃତିପୀଠ ଦୀର୍ଘ ୭୯ବର୍ଷ ଧରି ଅବହେଳିତ ହୋଇ ରହିଥିଲା। ଏବେ ପୀଠର ଭିତ୍ତିଭୂମି ବଦଳିବା ଆରମ୍ଭ କରିଛି। ଏହାର ବିକାଶ ପାଇଁ ରାଜ୍ୟ ସଂସ୍କୃତି ଓ ପର୍ଯ୍ୟଟନ ବିଭାଗ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଉଛି। ବିଭାଗ ପକ୍ଷରୁ ୨୦୧୭-୧୮ ଆର୍ଥିକ ବର୍ଷରେ ଏହି ପୀଠର ଉନ୍ନତିକରଣ ଓ ଭିତ୍ତିଭୂମି ବିକାଶ ନିମନ୍ତେ ୪୫ ଲକ୍ଷ ଟଙ୍କା ପ୍ରଦାନ କରାଯାଇଛି। ଏହି ଅର୍ଥରାଶିରେ ଶହୀଦ ପୀଠର ପାଚେରି ଓ ସଂଯୋଗକାରୀ ରାସ୍ତା ନିର୍ମାଣ ସରିଥିବା ବେଳେ ଗେଷ୍ଟହାଉସ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ପୀଠର ଭିତ୍ତିଭୂମିର ଅଧିକ ବିକାଶ ପାଇଁ ସ୍ଥାନୀୟ ବିଧାୟକ ବିଷ୍ଣୁବ୍ରତ ରାଉତରାୟଙ୍କ ଉଦ୍ୟମକ୍ରମେ ବିଭାଗ ପକ୍ଷରୁ ପୁର୍ନବାର ୨୦୨୧ ଆର୍ଥିକ ବର୍ଷରେ ୫୦ଲକ୍ଷ ଟଙ୍କାର ଅନୁଦାନ ମଞ୍ଜୁର ହୋଇଥିବା ବେଳେ ଏହାର ଟେଣ୍ଡର ପ୍ରକ୍ରିୟା ମଧ୍ୟ ସରିଛି।
ତେବେ ପୀଠର ଚଳିତବର୍ଷ ମଞ୍ଜୁର ହୋଇଥିବା ଅନୁଦାନ ଅର୍ଥରେ ଶହୀଦ ସ୍ମୃତିପୀଠର ଉନ୍ନତିକରଣ ସହ ନଅଣ ପୋଖରୀ ସୌନ୍ଦର୍ଯ୍ୟକରଣ କାର୍ଯ୍ୟ କରାଯିବ ବୋଲି ଇରମ ସରପଞ୍ଚ ତଥା ସ୍ଥାନୀୟ ପର୍ଯ୍ୟଟନ ଉନ୍ନୟନ ପରିଷଦ ସଦସ୍ୟ ପ୍ରଫୁଲ୍ଲ ବିଶ୍ୱାଳ କହିଛନ୍ତି। ମଙ୍ଗଳବାର ୭୯ତମ ଶହୀଦ ସ୍ମୃତି ଦିବସ ପାଳନ ସମ୍ପର୍କରେ ସ୍ଥାନୀୟ ପର୍ଯ୍ୟଟନ ଉନ୍ନୟନ ପରିଷଦର ସଭାପତି ତଥା ବିଡିଓ ପ୍ରଣବ କୁମାର ବେହେରାଙ୍କୁ ପଚାରିବାରୁ ସମ୍ପୂର୍ଣ୍ଣ ବିଧିପୂର୍ବକ ଓ କୋଭିଡ୍ ଗାଇଡ୍ଲାଇନ ଅନୁଯାୟୀ ଏହି ଦିବସ ପାଳନ କରାଯାଇ ଶହୀଦଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯିବ ବୋଲି କହିଛନ୍ତି।
