କୋଲକାତା,୪।୬: ବଙ୍ଗାଳ ବିଧାନସଭା ନିର୍ୱାଚନରେ ପରାଜୟ ପରେ ଟିଏମସି (TMC) ଏବେ ତା’ର ସବୁଠାରୁ ବଡ଼ ଆଭ୍ୟନ୍ତରୀଣ ସଙ୍କଟ ଦେଇ ଗତି କରୁଛି। ପ୍ରଥମ ଥର ପାଇଁ ବିଧାୟକ ହୋଇଥିବା ଋତବ୍ରତ ବାନାର୍ଜୀଙ୍କ ନେତୃତ୍ୱରେ ବିଦ୍ରୋହୀ ଗୋଷ୍ଠୀ ନିଜକୁ ଅସଲ ଟିଏମସି ବୋଲି ଦାବି କରୁଛନ୍ତି। କେବଳ ସେତିକି ନୁହେଁ, ବିଧାନସଭା ବାଚସ୍ପତି ମଧ୍ୟ ବିଦ୍ରୋହୀ ବିଧାୟକ ଋତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବେ ମାନ୍ୟତା ଦେଇଛନ୍ତି। ବାନାର୍ଜୀ ଦାବି କରିଛନ୍ତି ଯେ ତାଙ୍କ ପାଖରେ ୬୦ ଜଣ ବିଧାୟକଙ୍କ ସମର୍ଥନ ରହିଛି। ଟିଏମସିରୁ ବହିଷ୍କୃତ ନେତା ସନ୍ଦୀପନ ସାହା କହିଛନ୍ତି ଯେ ବିରୋଧୀ ଦଳ ନେତା (LoP)ଙ୍କ ପାଇଁ ଉଦ୍ଦିଷ୍ଟ କୋଠରୀକୁ ଆଧିକାରିକ ଭାବେ ଆଲଟ କରିଦିଆଯାଇଛି।
ଏଭଳି ସ୍ଥିତିରେ ଏକ ବଡ଼ ପ୍ରଶ୍ନ ଉଠୁଛି ଯେ, ଟିଏମସିରୁ ପ୍ରଥମ ଥର ବିଧାୟକ ହୋଇଥିବା ଋତବ୍ରତ; ମମତା ବାନାର୍ଜୀଙ୍କ ବିରୋଧରେ ୬୦ ଜଣ ବିଧାୟକଙ୍କୁ କେମିତି ଏକଜୁଟ କଲେ? ତାହା ପୁଣି ନିର୍ୱାଚନରେ ମିଳିଥିବା ଶୋଚନୀୟ ପରାଜୟର ମାତ୍ର କିଛି ସପ୍ତାହ ମଧ୍ୟରେ। ଟିଏମସି ପାଇଁ ପରିସ୍ଥିତି ଏତେ ଶୀଘ୍ର କେମିତି ବିଗିଡ଼ିଗଲା, ତାହା ବୁଝିବା ମଧ୍ୟ ଜରୁରୀ। ମମତା ବାନାର୍ଜୀଙ୍କ ନେତୃତ୍ୱାଧୀନ ଏହି ଦଳ କେବଳ ଗୋଟିଏ କିମ୍ୱା ଦୁଇଟି ନିର୍ୱାଚନ ଜିତିନାହିଁ, ବରଂ ବଙ୍ଗାଳରେ କ୍ରମାଗତ ଭାବେ ତିନୋଟି କାର୍ଯ୍ୟକାଳ ଶାସନ କରିଛି।
ତୃଣମୂଳ କଂଗ୍ରେସରେ ଚାଲିଥିବା ଏହି ସଙ୍କଟର ମୂଳ କାରଣ ହେଉଛି ଏକ ସାଙ୍ଘାତିକ ଅଭିଯୋଗ। ଦଳ ନିଜ ବିଧାୟକମାନଙ୍କ ଜାଲ ଦସ୍ତଖତ କରି ଶୋଭନଦେବ ଚଟ୍ଟୋପାଧ୍ୟାୟଙ୍କୁ ବିରୋଧୀ ଦଳ ନେତା (LoP) ଘୋଷଣା କରିବା ପାଇଁ ଚିଠି ଲେଖିଥିବା ଅଭିଯୋଗ ହୋଇଛି। ବିଧାୟକ ସନ୍ଦୀପନ ସାହା ଏବେଂ ଋତବ୍ରତ ବିଧାନସଭା ସଚିବାଳୟରେ ଏନେଇ ଅଭିଯୋଗ କରିବା ପରେ ଏହି ବିବାଦ ସାମ୍ନାକୁ ଆସିଛି।
ଏହି ଘଟଣାର ମାତ୍ର କିଛି ଘଣ୍ଟା ମଧ୍ୟରେ ଟିଏମସି ଦଳବିରୋଧୀ କାର୍ଯ୍ୟକଳାପ ଅଭିଯୋଗରେ ଉଭୟ ବିଧାୟକଙ୍କୁ ଦଳରୁ ବହିଷ୍କାର କରିଥିଲା। ଏହି ଘଟଣା ଏପରି ସମୟରେ ଘଟିଛି, ଯେତେବେଳେ ଋତବ୍ରତ ଦଳ ବଦଳ କରିବାକୁ ଚେଷ୍ଟା କରୁଛନ୍ତି ଏବଂ ନିଜକୁ ଅସଲି ଟିଏମସି ଭାବେ ଘୋଷଣା କରିପାରନ୍ତି ବୋଲି ଚର୍ଚ୍ଚା ଜୋର ଧରିଥିଲା। ଗତ ସପ୍ତାହରେ ମମତାଙ୍କ ବାସଭବନରେ ଅନୁଷ୍ଠିତ ବୈଠକରେ ଟିଏମସିର ୮୦ ଜଣ ବିଧାୟକଙ୍କ ମଧ୍ୟରୁ ୬୦ ଜଣ ଅନୁପସ୍ଥିତ ଥିଲେ। ମଙ୍ଗଳବାର ଦିନ ମଧ୍ୟ ନିର୍ୱାଚନରେ ପରାଜୟ ପରେ ମମତାଙ୍କ ପ୍ରଥମ ଗଣ ବିକ୍ଷୋଭ ପ୍ରଦର୍ଶନରେ ମାତ୍ର ୮ ଜଣ ବିଧାୟକ ଏବଂ ୬ ଜଣ ଏମପି ସାମିଲ ହୋଇଥିଲେ।
ତୃଣମୂଳ ମଧ୍ୟରେ ସୃଷ୍ଟି ହୋଇଥିବା ଅସନ୍ତୋଷ ଦିନକୁ ଦିନ ଗଭୀର ହେବାରେ ଲାଗିଛି। ଏହି କାରଣରୁ ବିଦ୍ରୋହୀ ଗୋଷ୍ଠୀ ବୁଧବାର ଦିନ ଋତବ୍ରତଙ୍କୁ ବିରୋଧୀ ଦଳ ନେତା ଘୋଷଣା କରି ୬୦ ଜଣ ବିଧାୟକଙ୍କ ଦସ୍ତଖତ ଥିବା ଏକ ଚିଠି ଉପସ୍ଥାପନ କରିଛନ୍ତି। ଯଦିଓ ବିଦ୍ରୋହୀ ଗୋଷ୍ଠୀ ମମତାଙ୍କୁ ହିଁ ଦଳର ସର୍ୱୋଚ୍ଚ ନେତା ଭାବେ ମାନ୍ୟତା ଦେଇଛନ୍ତି। ଟିଏମସିର ଜଣେ ବିଦ୍ରୋହୀ ବିଧାୟକ ଗଣମାଧ୍ୟମକୁ କହିଛନ୍ତି।
