ନୂଆଦିଲ୍ଲୀ,୨୩।୬: ତୃଣମୂଳ କଂଗ୍ରେସ (TMC)ରେ ବିଦ୍ରୋହ ପରେ ଏବେ ଦଳ ଉପରେ କାହାର ନିୟନ୍ତ୍ରଣ ରହିବ, ସେ ନେଇ ଲଢ଼େଇ ଆରମ୍ଭ ହୋଇଯାଇଛି। ଟିଏମସିର କମାଣ କାହା ହାତରେ ରହିବ ମମତା ବାନାର୍ଜୀ ନା ଋତବ୍ରତ ବାନାର୍ଜୀ? ଏହାକୁ ନେଇ ରାଜନୀତି ସରଗରମ ହୋଇଛି। ଋତବ୍ରତ ବାନାର୍ଜୀ ସୋମବାର ଏକ ନୂଆ ‘ନ୍ୟାସନାଲ ୱର୍କିଂ କମିଟି’ (ରାଷ୍ଟ୍ରୀୟ କାର୍ଯ୍ୟକାରିଣୀ କମିଟି) ଗଠନ କରିଛନ୍ତି। ତେବେ ଏଥିରେ ମମତା ବାନାର୍ଜୀଙ୍କ ନାମ ନାହିଁ। ତାଙ୍କ ସ୍ଥାନରେ ଅରୂପ ରାୟଙ୍କୁ ଚେୟାରମ୍ୟାନ କରାଯାଇଛି ଏବଂ ଅଭିଷେକ ବାନାର୍ଜୀଙ୍କୁ ଦଳରୁ ବାହାର କରିଦିଆଯାଇଛି।
ସୂତ୍ର ଅନୁସାରେ, ଋତବ୍ରତ ବାନାର୍ଜୀଙ୍କୁ ଆଜି ଏହି ନୂଆ କମିଟି ସହ ଜଡ଼ିତ ସମସ୍ତ ଦସ୍ତାବିଜ ନିର୍ୱାଚନ କମିଶନଙ୍କ ନିକଟରେ ଦାଖଲ କରିବାର ଥିଲା, ମାତ୍ର ସେ ଏହା କରିବା ପୂର୍ୱରୁ ହିଁ ପୂର୍ୱତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିର୍ୱାଚନ କମିଶନଙ୍କୁ ଏକ ଚିଠି ପଠାଇଛନ୍ତି।
ମମତା ବାନାର୍ଜୀ ଦଳର ନିଜ ସମର୍ଥିତ ‘ନ୍ୟାସନାଲ ୱର୍କିଂ କମିଟି’ର ତାଲିକା ସହ ଏହି ଚିଠି ପଠାଇଛନ୍ତି। ଅର୍ଥାତ ମମତାଙ୍କ ସମର୍ଥନରେ ଥିବା ତୃଣମୂଳ ୱର୍କିଂ କମିଟିରେ କେଉଁମାନେ ଅଛନ୍ତି, ସେମାନଙ୍କ ତାଲିକା ଦିଆଯାଇଛି। ସୂଚନା ଅନୁଯାୟୀ, ଏହି ତାଲିକାରେ ୨୪ଟି ନାମ ରହିଛି। ଏଥିରେ ଚେୟାରପର୍ସନ ଭାବେ ମମତା ବାନାର୍ଜୀଙ୍କ ନାମ ଥିବା ବେଳେ ସର୍ୱଭାରତୀୟ ସାଧାରଣ ସମ୍ପାଦକ (ଅଲ ଇଣ୍ଡିଆ ଜେନେରାଲ ସେକ୍ରେଟାରୀ) ଭାବେ ଅଭିଷେକ ବାନାର୍ଜୀଙ୍କ ନାମ ରହିଛି। ଉଲ୍ଲେଖଯୋଗ୍ୟ ଯେ, ସୋମବାର ଦିନ ଋତବ୍ରତ, ଅଭିଷେକ ବାନାର୍ଜୀଙ୍କୁ ତୃଣମୂଳ କଂଗ୍ରେସରୁ ବହିଷ୍କାର କରିଥିଲେ।
ଏହା ବ୍ୟତୀତ, ମମତା ବାନାର୍ଜୀଙ୍କ ଦ୍ୱାରା ପଠାଯାଇଥିବା ଚିଠିରେ ଡୋଲା ସେନ ଏବଂ ଡେରେକ ଓ’ବ୍ରାଏନଙ୍କ ନାମ ଯୁଗ୍ମ ସମ୍ପାଦକ (ଜଏଣ୍ଟ ସେକ୍ରେଟାରୀ) ଭାବେ, ସୁବ୍ରତ ବକ୍ସିଙ୍କ ନାମ ଉପାଧ୍ୟକ୍ଷ ଏବଂ ସୁଭାଷିଷଙ୍କ ନାମ କୋଷାଧ୍ୟକ୍ଷ ଭାବେ ପଠାଯାଇଛି। ଏଥିରେ ଶୋଭନଦେବ ଚାଟାର୍ଜୀଙ୍କ ନାମ ମଧ୍ୟ ରହିଛି ଏବଂ ତାଙ୍କ ନାମ ଆଗରେ ବିଧାନସଭା ନେତା ବୋଲି ଲେଖାଯାଇଛି। ଏଥିରେ ବିରୋଧୀ ଦଳ ନେତାଙ୍କର କୌଣସି ଉଲ୍ଲେଖ ନାହିଁ।
ଅନ୍ୟପଟେ ଡେରେକ ଓ’ବ୍ରାଏନ, ମଦନ ମିତ୍ରା ଏବଂ ଅନ୍ୟାନ୍ୟ ନେତାଙ୍କ ନାମ ମଧ୍ୟ ଏହି ତାଲିକାରେ ରହିଛି। ରାଜନୈତିକ ସମୀକ୍ଷକଙ୍କ କହିବା ଅନୁସାରେ, ମମତାଙ୍କ ସମର୍ଥିତ ତୃଣମୂଳ ଗୋଷ୍ଠୀ ଅତି ଶୀଘ୍ର କମିଶନଙ୍କୁ ଚିଠି ପଠାଇ ଋତବ୍ରତଙ୍କ ଦଳଠାରୁ ଆଗେଇ ଯାଇଛନ୍ତି।
ରାଜନୈତିକ ସମୀକ୍ଷକ ଶୁଭମୟ ମୈତ୍ର କହିଛନ୍ତି ଯେ, ଏହା ଭବିଷ୍ୟତର କଥା। ସମ୍ୱିଧାନ ଅଛି, ଆଇନ ଅଛି। ତେବେ ଏମିତି କିଛି ଜିନିଷ ମଧ୍ୟ ଅଛି ଯାହା ଆଇନରେ ପ୍ରାୟତଃ ଉଲ୍ଲେଖ ନଥାଏ। ତୃଣମୂଳ କଂଗ୍ରେସ ମାମଲାରେ, ବର୍ତ୍ତମାନ ପୂରା ବିବାଦ କ୍ଷମତା ଯୁଦ୍ଧ (ପାୱାର ଷ୍ଟ୍ରଗଲ)କୁ ନେଇ ଚାଲିଛି। କୌଣସି ରାଜନୈତିକ ଦଳ ଭିତରେ ସେମାନେ କେମିତି କ୍ଷମତା ହାସଲ କରନ୍ତି, ସେହି କ୍ଷମତାର କିଛି ଅଂଶ ସେମାନଙ୍କର ହିଁ ହୋଇଥାଏ। ଯେମିତି କି, ସାଧାରଣ ତୃଣମୂଳ ଭୋଟର କେଉଁ ଆଡ଼କୁ ଯିବେ, ତାହା ସହ ଦଳର ନାମ କିମ୍ୱା ସଙ୍କେତ (ସିମ୍ୱଲ)ର କୌଣସି ସମ୍ପର୍କ ନାହିଁ।
ଯେଉଁ ପ୍ରସଙ୍ଗଗୁଡ଼ିକ ସାଧାରଣ ଲୋକଙ୍କ ସହ ଜଡ଼ିତ ନୁହେଁ, ସେଥିରେ କୋର୍ଟ ନିଷ୍ପତ୍ତି ନେବେ। ଆଉ ଏକ କଥା ହେଉଛି, ତୃଣମୂଳର ଭୋଟରମାନେ ମମତାଙ୍କୁ ସମର୍ଥନ କରିବେ ନା ଋତବ୍ରତଙ୍କୁ, ତାହା ମଧ୍ୟ ଦେଖିବାକୁ ବାକି ରହିଲା। ଏଭଳି ସ୍ଥିତିରେ, ର୍ନିବାଚନ ନହେବା ପର୍ଯ୍ୟନ୍ତ ଜନତାଙ୍କ ମତ କେଉଁ ଆଡ଼କୁ ଯାଉଛି, ତାହା ସ୍ପଷ୍ଟ ହେବନାହିଁ।
ସଂସଦୀୟ ରାଜନୀତି (ପାର୍ଲାମେଣ୍ଟ୍ରି ପଲିଟିକ୍ସ)ରେ ମଧ୍ୟ ଠିକ ଏହିଭଳି ଚିତ୍ର ଦେଖିବାକୁ ମିଳିଛି। ବିଦ୍ରୋହୀ ସାଂସଦମାନେ ବାଚସ୍ପତି (ସ୍ପିକର)ଙ୍କ ପାଖରେ ପହଞ୍ଚିବା ପୂର୍ୱରୁ ହିଁ ତୃଣମୂଳର ଦୁଇ ସାଂସଦ କୀର୍ତ୍ତି ଆଜାଦ ଏବଂ ସାଗରିକା ଘୋଷ ବାଚସ୍ପତିଙ୍କ ପାଖରେ ଚିଠି ପହଞ୍ଚାଇ ସାରିଥିଲେ। ଏହାର ଅର୍ଥ ହେଉଛି, ମମତାଙ୍କ ସମର୍ଥିତ ତୃଣମୂଳ ସମସ୍ତ ମାମଲାରେ ‘ଆଇନଗତ’ ଭାବେ ଆଗରେ ରହିବାକୁ ଚେଷ୍ଟା କରୁଛି।
