ନୂଆଦିଲ୍ଲୀ,୭।୧୨: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ବୁଧବାର ଭାଜପା ସରକାରଙ୍କ ଉପରେ ବର୍ଷିଛନ୍ତି। ସେ ସଂସଦୀୟ ଗଣତନ୍ତ୍ରର ଭବିଷ୍ୟତ ବିଷୟରେ ଚିନ୍ତା ପ୍ରକଟ କରିଛନ୍ତି। ସେ ଅଭିଯୋଗ କରି କହିଛନ୍ତି, ପାର୍ଲାମେଣ୍ଟରେ ଭାଜପା ବହୁମତ ଉପଯୋଗ କରି ବହୁ ସଂଖ୍ୟାରେ ବିଲ ପାରିତ କରିଛି। ଏନେଇ ଯଦି ବିରୋଧୀ ସ୍ବର ଉତ୍ତୋଳନ କରିବା ସତ୍ତ୍ୱେ ମଧ୍ୟ ସଂଖ୍ୟାଗରିଷ୍ଠତା ହେତୁ ଶାସକ ଦଳ କୌଣସି ଭୋଟ ବିନା ବିଲ ପାରିତ କରିଦେଉଛି। ସେମାନେ ସ୍ଥାୟୀ କମିଟି କିମ୍ବା ଚୟନ କମିଟିର ରିପୋର୍ଟ ମଧ୍ୟ ଗ୍ରହଣ କରନ୍ତି ନାହିଁ। ଏଭଳି ହେଲେ ଆମର ସଂସଦୀୟ ଗଣତନ୍ତ୍ର ଏହାର ସମ୍ମାନ ବଜାୟ ରଖିବାରେ ସକ୍ଷମ ହେବ କି। ମନରେ ଏଭଳି ଭୟ ଆସୁଛି।
ଗଣତନ୍ତ୍ରରେ ବିଭିନ୍ନ ରାଜନୈତିକ ଦଳର ଅନେକ ଆଦର୍ଶ ଅଛି, କିନ୍ତୁ ସଂସଦୀୟ ସଂଖ୍ୟାଗରିଷ୍ଠତା ସର୍ବଦା ଜିତେ। କିନ୍ତୁ ଏହାର ଅର୍ଥ ନୁହେଁ ଯେ ଆପଣ ବିରୋଧୀ, ରାଜ୍ୟ ତଥା ଗଣମାଧ୍ୟମର ସ୍ବରକୁ ଦମନ କରିବେ। ଆମ ଦଳ ସେମାନଙ୍କୁ ପୂର୍ଣ୍ଣ ଶକ୍ତି ସହିତ ସାମ୍ନା କରିବ ଏବଂ ଅତ୍ୟାଚାର ବିରୋଧରେ ଲଢିବା ପାଇଁ ଅନ୍ୟ ବିରୋଧୀ ଦଳ ସହିତ ସହଯୋଗ କରିବ ବୋଲି ମମତା କହିଛନ୍ତି।
