ରାଞ୍ଚି, ୨୧।୮ : ଖଣି ଲିଜ ମାମଲାରେ ଝାଡଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ସମ୍ପୃକ୍ତି ସମ୍ପର୍କରେ ଆସନ୍ତା ୨ ସପ୍ତାହ ମଧ୍ୟରେ ନିର୍ବାଚନ ଆୟୋଗ(ଇସି) ଏହାର ରାୟ ପ୍ରଦାନ କରିବାର ସମ୍ଭାବନା ରହିଛି। ସୂଚନାନୁସାରେ, ଯଦି ହେମନ୍ତ ସୋରେନଙ୍କ ବିରୋଧରେ ଆସିଥିବା ଅଭିଯୋଗ ସତ୍ୟ ବୋଲି ପ୍ରମାଣିତ ହୁଏ, ତେବେ ତାଙ୍କୁ ମୁଖ୍ୟମନ୍ତ୍ରୀ ପଦ ହରାଇବାକୁ ପଡିପାରେ।
ଭାଜପା ନିର୍ବାଚନ ଆୟୋଗଙ୍କ ନିକଟରେ ଅଭିଯୋଗ କରିଛି ଯେ ହେମନ୍ତ ସୋରେନ ମୁଖ୍ୟମନ୍ତ୍ରୀ ପଦରେ ରହି ସରକାରୀ ଖଣି ଠିକା ଗ୍ରହଣ କରି ଅଯୋଗ୍ୟ ସାବ୍ୟସ୍ତ ହୋଇଛନ୍ତି। ଖଣି ଲିଜ ମାମଲାରେ ଏହି ଅଭିଯୋଗ ଉପରେ ନିର୍ବାଚନ ଆୟୋଗରେ ଶୁଣାଣି ଶେଷ ହୋଇଛି।
ଏହାପୂର୍ବରୁ ଅଗଷ୍ଟ ୧୨ ରେ ନିର୍ବାଚନ ଆୟୋଗ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ନିର୍ବାଚନକୁ ଚ୍ୟାଲେଞ୍ଜ କରୁଥିବା ଆବେଦନର ଶୁଣାଣି କରିଥିଲେ। ନିର୍ବାଚନ ଆୟୋଗଙ୍କ ପକ୍ଷରୁ ହେମନ୍ତ ସୋରେନଙ୍କ ଆଇନଜୀବୀଙ୍କଠାରୁ ଏକ ଲିଖିତ ଉତ୍ତର ଲୋଡ଼ା ଯାଇଥିଲା। ବରିଷ୍ଠ ଆଇନଜୀବୀ ମୀନାକ୍ଷୀ ଆରୋରା ହେମନ୍ତ ସୋରେନଙ୍କ ପକ୍ଷରୁ ନିର୍ବାଚନ ଆୟୋଗଙ୍କ ସହିତ ଦୁଇ ଘଣ୍ଟା ଯୁକ୍ତିତର୍କ କରିଥିଲେ। ସେ କହିଥିଲେ ଯେ ହେମନ୍ତ ସୋରେନଙ୍କ ନାମରେ ରାଞ୍ଚିର ଅନଗଡାରେ ଆବଣ୍ଟିତ ପଥର ଖଣି ମାମଲା ୧୯୫୧ର ଲୋକ ପ୍ରତିନିଧୀ ଅଧିନିୟମର ୯-ଏ ଅଧୀନରେ ଆସିବ ନାହିଁ।
ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଭାଇ ତଥା ଦୁମକାର ଜେଏମଏମ ବିଧାୟକ ବସନ୍ତ ସୋରେନଙ୍କ ସହ ଜଡିତ ମାମଲା ମଧ୍ୟ ନିର୍ବାଚନ ଆୟୋଗଙ୍କ ନିକଟରେ ଅଛି। ଝାଡଖଣ୍ଡ ଭାଜପା ନେତାମାନେ ହେମନ୍ତ ସୋରେନ ଏବଂ ତାଙ୍କ ଭାଇ ବସନ୍ତ ସୋରେନଙ୍କ ନାମରେ ପଥର ଖଣି ଲିଜ ନେଇ ନିର୍ବାଚନ ଆୟୋଗଙ୍କ ନିକଟରେ ଅଭିଯୋଗ କରିଥିଲେ। ମୁଖ୍ୟମନ୍ତ୍ରୀଙ୍କୁ ବିଧାନସଭାରୁ ଅଯୋଗ୍ୟ ଘୋଷଣା କରିବା ପାଇଁ ଲୋକ ପ୍ରତିନିଧିଙ୍କ ଅଧିନିୟମର ଧାରା ୯-ଏ ଅନ୍ତର୍ଗତ ରାଜ୍ୟପାଳଙ୍କ ନିକଟରେ ଏକ ସ୍ମାରକପତ୍ର ମଧ୍ୟ ଦାଖଲ କରାଯାଇଥିଲା। ବର୍ତ୍ତମାନ ଏସବୁ ମାମଲା ନିର୍ବାଚନ ଆୟୋଗଙ୍କ ନିକଟରେ ଅଛି।
