ପାରାଦୀପ,୨୦।୧୧(ସ୍ବ.ପ୍ର.): ପାରାଦୀପ ବନ୍ଦର ପ୍ରଶାସନ ପକ୍ଷରୁ ଶୁକ୍ରବାର ବନ୍ଦର ଦିବସ ଓ ବୋଇତ ବନ୍ଦାଣ ଉତ୍ସବ ଅନୁଷ୍ଠିତ ହୋଇଯାଇଛି। ବନ୍ଦର ନିଷିଦ୍ଧାଞ୍ଚଳର ଓ୍ବେଟବେସିନ୍ଠାରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ ଅଧ୍ୟକ୍ଷ ପି.ଏଲ ହାରାନ୍ଧ ଯୋଗ ଦେଇଥିଲେ। ପାରମ୍ପରିକ ରୀତିନୀତି ଅନୁଯାୟୀ ବୋଇତ ବନ୍ଦାଣ କରାଯାଇଥିଲା। ଏଥିରେ ସାଧବ ପୁଅ ଓ ବୋହୂ ବେଶରେ ଛାତ୍ରଛାତ୍ରମାନେ ସଜ୍ଜିତ ହୋଇ ବୋଇତକୁ ପୋତାଶ୍ରୟରେ ଛାଡ଼ିଥିଲେ। ଉତ୍ସବରେ ବନ୍ଦର ଉପସଂରକ୍ଷକ ଅଲେଖ ଚନ୍ଦ୍ର ସାହୁ ସ୍ବାଗତ ଭାଷଣ ଦେଇଥିଲେ। ଅଧ୍ୟକ୍ଷ ହାରାନ୍ଧ ବନ୍ଦରର କାରବାର ଓ ବର୍ଦ୍ଧିତ ପ୍ରକଳ୍ପ ସମ୍ପର୍କରେ ମତ ରଖିଥିଲେ। ଗତ ୬ ବର୍ଷ ହେଲା ବନ୍ଦର ରେକର୍ଡ ୧୦୦ ମିଲିୟନ ମେଟ୍ରିକ ଟନ୍ରୁ ଅଧିକ ପଣ୍ୟ କାରବାର କରୁଛି। ଚଳିତ ଆର୍ଥିକ ବର୍ଷର ନଭେମ୍ବର ସୁଦ୍ଧା ୬୫.୨୮ମିଲିୟନ ମେଟ୍ରିକ ଟନ୍ କାରବାର କରିସାରିଲାଣି, ଯାହା ଗତବର୍ଷ ଠାରୁ ୫.୩୩ ପ୍ରତିଶତ ଅଧିକ। ଏବେ ବନ୍ଦରରେ ନୂତନ ଇକ୍ୟୁ ୩ ବର୍ଥ ନିର୍ମାଣ ଚାଲିଛି। ଏଥିପାଇଁ ୨୦୦୦ କୋଟି ଟଙ୍କା ପୁଞ୍ଜି ଖର୍ଚ୍ଚ ହୋଇଛି। ଏହାବାଦ୍ ୩୦୦୫ କୋଟି ଟଙ୍କା ବ୍ୟୟରେ ନୂତନ ଓ୍ବେଷ୍ଟର୍ନ ଡକ୍ କାମ ଚାଲିଛି। ଡିସେମ୍ବରରେ କାର୍ଯ୍ୟକ୍ଷମ ହେବ। ଏହି ନୂତନ ପ୍ରକଳ୍ପ ଜରିଆରେ ବାର୍ଷିକ ୨୫ ମିଲିୟନ ମେଟ୍ରିକ ଟନ୍ ପଣ୍ୟ କାରବାର ହୋଇପାରିବ। ସେହିପରି ଆସନ୍ତା ବର୍ଷ ନୁମାଲି ଗଡ ରିଫାଇନେରି(ଏନ ଆର ଏଲ୍)ପ୍ରକଳ୍ପ ହେବାକୁ ଯାଉଛି ବୋଲି ହାରାନ୍ଧ କହିଥିଲେ। ଶେଷରେ ବନ୍ଦର ସଚିବ ପି.ଏନ୍. ବାହେକର ଧନ୍ୟବାଦ ଦେଇଥିଲେ।
