ଲୋଇସିଂହା,୨୩।୧(ଡି.ଏନ.ଏ):ବଲାଙ୍ଗୀର ଜିଲା ଲୋଇସିଂହା ବ୍ଲକ ଯୋଗୀସର୍ଡା ପଞ୍ଚାୟତ ଅନ୍ତର୍ଗତ କେଉଁଟିପାଲିର ଫୁଲ ମୁଦୁଲି(୭୭)। ଏହି ବିଧବା ମହିଳାଙ୍କର କେହି ସାହାରା ନାହାନ୍ତି। ଝାଟିମାଟି ଘର ଭାଙ୍ଗି ମାଟିରେ ମିଶି ଯାଇଛି। କିଛି ବିକଳ୍ପ ନ ପାଇ ୨୦୨୧ ଜୁଲାଇ ମାସରୁ ସ୍ବଚ୍ଛ ଭାରତ ପାଇଖାନା ଘରେ ସେ ଆଶ୍ରୟ ନେଇଛନ୍ତି। ବ୍ଲକ ପ୍ରଶାସନ ପକ୍ଷରୁ ସଦ୍ୟ ପ୍ରକାଶିତ ଆବାସ ଯୋଜନା ହିତାଧିକାରୀ ତାଲିକାରେ ବି ତାଙ୍କ ନାମ ନାହିଁ। ଅସହାୟ ଜୀବନ ବିତାଉଥିବା ଫୁଲଙ୍କ ପ୍ରତି ପ୍ରଶାସନର ଉଦାସୀନତାକୁ ନେଇ ସାଧାରଣରେ ପ୍ରତିକ୍ରିୟା ପ୍ରକାଶ ପାଇଛି ା
ସ୍ବାମୀ ବୁଧୁ ,ଦୁଇପୁଅ ଏବଂ ଝିଅଙ୍କୁ ନେଇ ଥିଲା ଫୁଲଙ୍କ ପରିବାର। ସ୍ବାମୀ ଏବଂ ଦୁଇପୁଅଙ୍କର ଦୀର୍ଘଦିନ ହେଲାଣି ମୃତ୍ୟୁ ହୋଇଯାଇଛି। ବୋହୂ ଓ ନାତିନାତୁଣୀ ଅନ୍ୟତ୍ର ରହୁଛନ୍ତି। ଏକମାତ୍ର ଝିଅ ବାହା ହୋଇ ତା ଶାଶୁ ଘରେ ରହୁଛି। ଏପରିସ୍ଥଳେ ଫୁଲ ନିଃସଙ୍ଗ ଜୀବନ ବିତାଉଛନ୍ତି। ଓଳିଏ ଖାଇ ଆରଓଳି ଉପବାସ ରହୁଥିବା ଫୁଲଙ୍କ କ୍ଷେତ୍ରରେ ଭଙ୍ଗାଘର ସଜାଡିବା ସମ୍ଭବ ହେଉନି ା ଯେକୌଣସି ମୂର୍ତ୍ତରେ ଘର ଭାଙ୍ଗିପଡିବା ଭୟରେ ସେ ଜୁଲଇ ୨୦୨୧ରୁ ସ୍ବଚ୍ଛ ଭାରତ ଯୋଜାନରେ ପାଇଥିବା ପାଇଖାନରେ ଆଶ୍ରୟ ନେଇଥିଲେ। ଏହା ଲୋକଲୋଚନକୁ ଆସିବା ପରେ ୨୩ଜୁଲାଇ ୨୦୨୧ରେ ‘ଆବାସ ଯୋଜନା ସ୍ବପ୍ନ, ପାଇଖାନାରେ ଆଶ୍ରୟ ନେଇଛନ୍ତି ବୃଦ୍ଧା ଶୀର୍ଷକ ଏକ ଖବର ପ୍ରକାଶ ପାଇଥିଲା ା ଏହାପରେ ଜିଲା ପ୍ରଶାସନ ପକ୍ଷରୁ ତପତ୍ରତା ଦେଖାଇଥିଲେ। ଜିଲା ସାମାଜିକ ସୁରକ୍ଷା ଅଧିକାରୀଙ୍କ ନିର୍ଦ୍ଦେଶରେ ବିଭାଗୀୟ କର୍ମଚାରୀ କେଉଁଟିପାଲି ଯାଇ ତଦନ୍ତ କରିଥିଲେ ା ଏହାପରେ ସମ୍ପୃକ୍ତ ବୃଦ୍ଧାଙ୍କୁ ଉଦ୍ଧାର କରି ଏକ ଆଶ୍ରମରେ ରଖିବାକୁ ଜିଲା ପ୍ରଶାସନ ପକ୍ଷରୁ ଉଦ୍ୟାମ କରାଯାଇଥିଲା ା ହେଲେ ବୃଦ୍ଧା ଆଶ୍ରମକୁ ଯିବାକୁ ମନା କରି ଜଣେ ସମ୍ପର୍କୀୟଙ୍କ ଘରେ ରହିବାକୁ ଇଚ୍ଛା ପ୍ରକାଶ କରିଥିଲେ ା ପୂର୍ବରୁ ଖାଦ୍ୟ ସୁରକ୍ଷା ଯୋଜନାରେ ୫ କେଜି ପଡିଏସ୍ ବଦଳରେ ଏବେ ଅନ୍ତଦ୍ୟୋୟ ଯୋଜନାରେ ୩୫କେଜି ଚାଉଳ ଦିଆଯାଉଛି ା ବିଧବା ଭତ୍ତା ବାବଦକୁ ୫ଶହ ଟଙ୍କା ମିଳୁଛି। ସେତେବେଳର ଏହି ଘଟଣାକୁ ଆଧାର କରି ରାଜ୍ୟ ଆଇନସେବା ପ୍ରାଧିକରଣ ସହସମ୍ପାଦକ ରୁଦ୍ରପ୍ରକାଶ ନାୟକ ବଲାଙ୍ଗୀର ଜିଲା ସମ୍ପାଦକଙ୍କୁ ପତ୍ର ଲେଖଥିଲେ। ଜିଲା ପ୍ରଶାସନ ସହ ସମନ୍ବୟ ରକ୍ଷା କରି ସମ୍ପୃକ୍ତ ବୃଦ୍ଧାଙ୍କୁ ଆବାସ ଯୋଜନରେ ଘର ଖଣ୍ଡିଏ ଯୋଗାଇଦେବାକୁ ଅନୁରୋଧ କରିଥିଲୋ। ଲୋଇସିଂହା ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟଙ୍କ କାର୍ଯ୍ୟାଳୟ ପକ୍ଷରୁ ଫୁଲଙ୍କ ସହ ଯୋଗାଯୋଗ କରାଯାଇଥିଲା। ନ୍ୟାୟାଳୟର ହସ୍ତକ୍ଷେପ ପରେ ସେ ଘର ପାଇବା ନିଶ୍ଚିତ ବୋଲି ଗ୍ରାମବାସୀ ଆଶା ରଖିଥିଲେ। ଇତିମଧ୍ୟରେ ୧୬ ମାସ ବିତି ଯାଇଥିଲେ ବି ସ୍ଥିତିରେ ସୁଧାର ଆସିନାହିଁ। ପଞ୍ଚାୟତର ୨୨ ହିତାଧିକାରୀଙ୍କ ନାମ ତାଲିକାରେ ରହିଥିବାବେଳେ କେଉଁଟିପାଲିର ଜଣେ ହିତାଧିକାରୀ ଅଛନ୍ତି। ନିକଟରେ ଆବାସ ଯୋଜନାର ହିତାଧିକାରୀ ଚୟନ ତାଲିକା ପ୍ରକାଶ ପାଇଥିବା ବେଳେ ଫୁଲଙ୍କ ନାମ ଏଥିରେ ନ ରହିବା ସାଧାରଣରେ ବିସ୍ମୟ ପ୍ରକାଶ ପାଇଛି।
