ନୂଆଦିଲ୍ଲୀ,୧୩।୧୦: କୌଣସି ଖେଳାଳିଙ୍କ ପାଇଁ ପ୍ରଥମ ଥର ଟେଷ୍ଟ ଦଳର ଅଧିନାୟକ ହେବା ଏକ ବଡ଼ ଆହ୍ବାନ। କିନ୍ତୁ ଆଫଗାନିସ୍ତାନର ରହମତ ଶାହ ଏହି ଦାୟିତ୍ୱକୁ ସ୍ମରଣୀୟ କରିଛନ୍ତି। ବାଂଲାଦେଶ ବିପକ୍ଷ ନିଜର ପ୍ରଥମ ଟେଷ୍ଟ ଅଧିନାୟକତ୍ୱ ମ୍ୟାଚ୍ରେ ପ୍ରଥମ ପାଳିରେ ଶତକ ଏବଂ ଦ୍ୱିତୀୟ ପାଳିରେ ଅର୍ଦ୍ଧଶତକ ହାସଲ କରି ସେ ଏକ ବିରଳ ରେକର୍ଡର ଅଧିକାରୀ ହୋଇଛନ୍ତି। ଏହି ସଫଳତା ହାସଲ କରିବାରେ ସେ ବିଶ୍ୱର ଷଷ୍ଠ ଖେଳାଳି ହୋଇଛନ୍ତି। ଏହା ପୂର୍ବରୁ ଭାରତର ବିରାଟ କୋହଲି ମଧ୍ୟ ଏଭଳି କାରନାମା କରିଥିଲେ।
ଆବୁଧାବିର ଶେଖ ଜାଏଦ ଷ୍ଟାଡିୟମ୍ରେ ଆଫଗାନିସ୍ତାନ ଓ ବାଂଲାଦେଶ ମଧ୍ୟରେ ଖେଳାଯାଉଥିବା ଏକମାତ୍ର ଟେଷ୍ଟ ମ୍ୟାଚ୍ରେ ରହମତ ଶାହଙ୍କ ବ୍ୟାଟ୍ରୁ ବଡ଼ ଇନିଂସ ଦେଖିବାକୁ ମିଳିଥିଲା। ପ୍ରଥମ ପାଳିରେ ସେ ୨୧୬ଟି ବଲ୍ ସମ୍ମୁଖୀନ ହୋଇ ଅପରାଜିତ ୧୦୫ ରନ କରିଥିଲେ।
ଏହା ପରେ ଦ୍ୱିତୀୟ ପାଳିରେ ଚତୁର୍ଥ ସ୍ଥାନରେ ବ୍ୟାଟିଂ କରି ସେ ୧୨୪ଟି ବଲ୍ରେ ୫୧ ରନ ସଂଗ୍ରହ କରିଥିଲେ। ତେବେ ଦ୍ୱିତୀୟ ପାଳିରେ ଇବାଦତ ହୁସେନଙ୍କ ବଲ୍ରେ ଉଇକେଟକିପର ଲିଟନ ଦାସଙ୍କ ହାତରେ କ୍ୟାଚ ଦେଇ ସେ ଆଉଟ ହୋଇଥିଲେ। ହଶମତୁଲ୍ଲା ଶାହିଦିଙ୍କ ସ୍ଥାନରେ ଆଫଗାନିସ୍ତାନର ଟେଷ୍ଟ ଓ ଦିନିକିଆ ଦଳର ନୂଆ ଅଧିନାୟକ ହୋଇଥିବା ରହମତ ଶାହ ପ୍ରଥମ ମ୍ୟାଚ୍ରେ ହିଁ ନିଜ ବ୍ୟାଟିଂ ଦକ୍ଷତାର ପରିଚୟ ଦେଇଛନ୍ତି। ଟେଷ୍ଟ ଅଧିନାୟକ ଭାବେ ପ୍ରଥମ ମ୍ୟାଚ୍ର ଦୁଇ ପାଳିରେ ଶତକ ଏବଂ ଅର୍ଦ୍ଧଶତକ କିମ୍ବା ତା’ଠାରୁ ଅଧିକ ରନ କରିବାର ରେକର୍ଡ ତାଲିକାରେ ରହମତଙ୍କ ପୂର୍ବରୁ ପାଞ୍ଚ ଜଣ ଖେଳାଳି ରହିଥିଲେ।
ଇଂଲଣ୍ଡର ଆର୍ଚି ମ୍ୟାକଲାରେନ ଏହି ସଫଳତା ହାସଲ କରିଥିବା ପ୍ରଥମ ଖେଳାଳି ଥିଲେ। ୧୮୯୭ରେ ଅଷ୍ଟ୍ରେଲିଆ ବିପକ୍ଷରେ ସେ ପ୍ରଥମ ପାଳିରେ ୧୦୯ ରନ ଏବଂ ଦ୍ୱିତୀୟ ପାଳିରେ ଅପରାଜିତ ୫୦ ରନ କରିଥିଲେ। ଏହା ପରେ ନ୍ୟୁଜିଲାଣ୍ଡର ଜ୍ୟୋଫ ରାବୋନ, ଅଷ୍ଟ୍ରେଲିଆର ଗ୍ରେଗ ଚାପେଲ ଏବଂ ଜିମ୍ବାୱେର ବ୍ରେଣ୍ଡନ ଟେଲର ଏହି ତାଲିକାରେ ସାମିଲ ହୋଇଥିଲେ।
ଭାରତର ବିରାଟ କୋହଲି ୨୦୧୪ ଡିସେମ୍ବରରେ ଅଷ୍ଟ୍ରେଲିଆର ଆଡିଲେଡ୍ରେ ପ୍ରଥମ ଥର ଟେଷ୍ଟ ଅଧିନାୟକତ୍ୱ କରିଥିଲେ। ସେହି ମ୍ୟାଚ୍ର ପ୍ରଥମ ପାଳିରେ ୧୧୫ ରନ ଏବଂ ଦ୍ୱିତୀୟ ପାଳିରେ ୧୪୧ ରନ କରିଥିଲେ। କୋହଲି ଓ ଗ୍ରେଗ ଚାପେଲ ଏହି ତାଲିକାର ଦୁଇ ଜଣ ଖେଳାଳି, ଯେଉଁମାନେ ନିଜ ଟେଷ୍ଟ ଅଧିନାୟକତ୍ୱ ଡେବ୍ୟୁ ମ୍ୟାଚ୍ର ଉଭୟ ପାଳିରେ ଶତକ ହାସଲ କରିଥିଲେ।
ବ୍ୟକ୍ତିଗତ ଭାବେ ରେକର୍ଡ ସୃଷ୍ଟି କରିଥିଲେ ମଧ୍ୟ ଆଫଗାନିସ୍ତାନ ସମ୍ମୁଖରେ ମ୍ୟାଚ ଜିତିବାର ବଡ଼ ଆହୱାନ ରହିଛି। ଚତୁର୍ଥ ଦିନର ଖେଳ ଶେଷ ସୁଦ୍ଧା ଦ୍ୱିତୀୟ ପାଳିରେ ଆଫଗାନିସ୍ତାନ ୫୦ ଓଭରରେ ୩ ଉଇକେଟ ହରାଇ ୧୩୨ ରନ କରିଥିଲା। ମ୍ୟାଚ ଜିତିବା ପାଇଁ ଦଳକୁ ପଞ୍ଚମ ଦିନରେ ଆଉ ୩୪୭ ରନ କରିବାର ଆବଶ୍ୟକତା ଥିଲା।
ଟେଷ୍ଟ କ୍ରିକେଟ ଇତିହାସରେ ସର୍ବାଧିକ ସଫଳ ରନ ଚେଜ୍ର ରେକର୍ଡ ୱେଷ୍ଟଇଣ୍ଡିଜ ନାମରେ ରହିଛି। ୨୦୦୩ରେ ଅଷ୍ଟ୍ରେଲିଆ ବିପକ୍ଷରେ ୱେଷ୍ଟଇଣ୍ଡିଜ ୪୧୮ ରନ୍ର ଲକ୍ଷ୍ୟକୁ ସଫଳତାର ସହ ପୂରଣ କରିଥିଲା।
Dharitri – Odisha’s No.1 Odia Daily
