ହାଇଦ୍ରାବାଦ,୧୫।୧୦: ୱେଷ୍ଟଇଣ୍ଡିଜ୍ର ଦ୍ରୁତ ବୋଲର କିମୋ ପଲଙ୍କ ଘାତକ ବୋଲିଂ ଆଗରେ ଫିକା ପଡ଼ିଲା ଟିମ ଇଣ୍ଡିଆର ବ୍ୟାଟିଂ। ଚତୁର୍ଥ ଟି-୨୦ ଅନ୍ତର୍ଜାତୀୟ ମ୍ୟାଚ୍ରେ ଭାରତକୁ ୨୪ ରନ୍ରେ ପରାସ୍ତ କରିଛି ୱେଷ୍ଟଇଣ୍ଡିଜ। ଏହି ବିଜୟ ସହ ପାଞ୍ଚ ମ୍ୟାଚ ବିଶିଷ୍ଟ ଟି-୨୦ ସିରିଜ ୨-୨ରେ ବରାବର ହୋଇଛି। ମ୍ୟାଚ୍ରେ ୪୧ ରନ ଦେଇ ୫ଟି ଉଇକେଟ ନେଇଥିବା କିମୋ ପଲ ନିଜ ନାମରେ ଏକାଧିକ ରେକର୍ଡ କରିଛନ୍ତି।
ଅକ୍ଟୋବର ୧୪ରେ ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମ୍ରେ ଖେଳାଯାଇଥିବା ଏହି ମ୍ୟାଚ୍ରେ କିମୋ ପଲ ୪୧ ରନ ବିନିମୟରେ ୫ଟି ଉଇକେଟ ହାସଲ କରିଥିଲେ। ସେ ସଞ୍ଜୁ ସାମସନ, ଈଶାନ କିଶନ, ନୀତୀଶ କୁମାର ରେଡ୍ଡୀ, ପ୍ରିନ୍ସ ଯାଦବ ଏବଂ ଅକ୍ଷର ପଟେଲଙ୍କୁ ପାଭିଲିୟନ ଫେରାଇଥିଲେ।
ଅନ୍ତର୍ଜାତୀୟ ଟି-୨୦ କ୍ରିକେଟ୍ରେ ଏହା କିମୋ ପଲଙ୍କ ଦ୍ୱିତୀୟ ୫ ଉଇକେଟ ସଫଳତା। ଏହା ପୂର୍ବରୁ ୨୦୨୨ରେ ବାଂଲାଦେଶ ବିପକ୍ଷରେ ମୀରପୁରରେ ସେ ଏହି କାରନାମା କରିଥିଲେ। ଟେଷ୍ଟ ଖେଳୁଥିବା ଦେଶଗୁଡ଼ିକର ଦ୍ରୁତ ବୋଲରଙ୍କ ମଧ୍ୟରେ ଟି-୨୦ ଅନ୍ତର୍ଜାତୀୟରେ ଏକାଧିକ ଥର ୫ ଉଇକେଟ ନେବାରେ ସେ ଅନ୍ୟତମ ହୋଇଛନ୍ତି।
କିମୋ ପଲଙ୍କୁ ସବୁଠାରୁ ବଡ଼ ଉପଲବ୍ଧି ହେଉଛି, ଭାରତୀୟ ମାଟିରେ ଟିମ ଇଣ୍ଡିଆ ବିପକ୍ଷରେ ପୁରୁଷ ଅନ୍ତର୍ଜାତୀୟ ଟି-୨୦ରେ ୫ ଉଇକେଟ ନେବାରେ ସେ ପ୍ରଥମ ବୋଲର ହୋଇଛନ୍ତି। ଏହା ପୂର୍ବରୁ ଏହି ରେକର୍ଡ ନ୍ୟୁଜିଲାଣ୍ଡର ମିଚେଲ ସାଣ୍ଟନରଙ୍କ ନାମରେ ଥିଲା। ୨୦୧୬ ଟି-୨୦ ବିଶ୍ୱକପ୍ରେ ନାଗପୁରଠାରେ ସେ ୧୧ ରନ ଦେଇ ୪ଟି ଉଇକେଟ ନେଇଥିଲେ। କିନ୍ତୁ ହାଇଦ୍ରାବାଦରେ ୫ ଉଇକେଟ ନେଇ କିମୋ ପଲ ଏହି ରେକର୍ଡକୁ ପଛରେ ପକାଇଛନ୍ତି।
ଏହି ତାଲିକାରେ ନାମ୍ବିଆର ଗେରହାର୍ଡ ଇରାସମସ, ଅଷ୍ଟ୍ରେଲିଆର ଜାସନ ବେହରେନଡର୍ଫ ଏବଂ ଦକ୍ଷିଣ ଆଫ୍ରିକାର ମାର୍କୋ ୟାନସେନଙ୍କୁ ନାମ ମଧ୍ୟ ରହିଛି। ଏମାନେ ଭାରତ ବିପକ୍ଷରେ ଭାରତୀୟ ମାଟିରେ ୪ଟି ଲେଖାଏ ଉଇକେଟ ନେଇଥିଲେ।
ଭାରତ ବିପକ୍ଷରେ ଅନ୍ତର୍ଜାତୀୟ ଟି-୨୦ରେ ୫ ଉଇକେଟ ନେବାରେ କିମୋ ପଲ ହେଉଛନ୍ତି ୱେଷ୍ଟଇଣ୍ଡିଜ୍ର ଦ୍ୱିତୀୟ ବୋଲର। ଏହା ପୂର୍ବରୁ ଓବେଡ ମ୍ୟାକୟ ୨୦୨୨ରେ ବାସେଟେରେ ଭାରତ ବିପକ୍ଷରେ ମାତ୍ର ୧୭ ରନ ଦେଇ ୬ଟି ଉଇକେଟ ନେଇଥିଲେ।
କିମୋ ପଲଙ୍କ ଏହି ଦମ୍ଦାର ପ୍ରଦର୍ଶନ କେବଳ ଭାରତର ବ୍ୟାଟିଂ ଲାଇନଅପ୍ ଝଟ୍କା ଦେଇନାହିଁ, ବରଂ ସିରିଜକୁ ମଧ୍ୟ ରୋମାଞ୍ଚକର ସ୍ଥିତିକୁ ନେଇଯାଇଛି। ଏବେ ଶେଷ ମ୍ୟାଚ୍ରେ ସିରିଜ ବିଜୟ ପାଇଁ ଉଭୟ ଦଳ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିବ।
Dharitri – Odisha’s No.1 Odia Daily
