ଆନନ୍ଦପୁର,୨୧ା୮(ସ୍ବ.ପ୍ର.): ବଙ୍ଗୋପସାଗରରେ ଲଘୁଚାପକୁ ଆଧର କରି କେନ୍ଦୁଝର ଜିଲାକୁ ରେଡ ଓ୍ବାର୍ନିଂ ତାଲିକା ଭୁକ୍ତ କରାଯାଇଥିଲା। ଆନନ୍ଦପୁର ଠାରେ ବର୍ଷାର ପ୍ରଭାବ କମ୍ ରହିଥିଲେ ସୁଦ୍ଧା ଉପରମୁଣ୍ଡ ଚମ୍ପୁଆ ଠାରେ ୨୦ ତାରିଖରେ ୧୦୨ ମିଲିମିଟର ବର୍ଷା ଓ ଅନ୍ୟ ସ୍ଥାନରେ ବର୍ଷା ପ୍ରଭାବ ଲାଗିରହିଥିବାରୁ ଆନନ୍ଦପୁର ଠାରେ ବୈତରଣୀର ଜଳସ୍ତର ଅପେକ୍ଷାକୃତ ଭାବେ ବୃଦ୍ଧି ପାଇଥିଲା। ଆନନ୍ଦପୁରଠାରେ ବୈତରଣୀର ଜଳସ୍ତର ସତର୍କ ସୂଚନା ୩୭.୪୪୯ମି. ଓ ବିପଦ ସଙ୍କେତ ୩୮.୩୮୦ ମି. ରହିଥିବାବେଳେ ୨୦ ତାରିଖ ସନ୍ଧ୍ୟା ୬ରେ ଆନନ୍ଦପୁରଠାରେ ବୈତରଣୀ ଜଳସ୍ତର ବିପଦ ସଙ୍କେତ ଅତିକ୍ରମ କରି ୩୭.୭୨୦ମି.ରେ ରହିଥିଲା। କ୍ରମାଗତ ଭାବେ ଜଳସ୍ତର ବୃଦ୍ଧି ପାଇ ରାତି ୯ ଟାରେ ୩୮.୬୧୦ମି.ରେ ପହଞ୍ଚିଥିଲା। ପରବର୍ତ୍ତୀ ସମୟରେ ଜଳସ୍ତର ୩୯.୧୨୦ ମି. ରେ ପ୍ରବାହିତ ହୋଇ ୨୧ ତାରିଖ ଭୋର ୫ଟା ଯାଏ ବଳବତ୍ତର ରହିଥିଲା। ପରବର୍ତ୍ତୀ ସମୟରେ ଜଳସ୍ତର ଧିରେ ଧିରେ କମିବାରେ ଲାଗିଥିଲା। ୨୧ ତାରିଖ ଅର୍ଥାତ୍ ରବିବାର ଅପରାହ୍ନ ୪ଟାରେ ଜଳସ୍ତର ବିପଦ ସଙ୍କେତ ଊର୍ଦ୍ଧ୍ୱରେ ତଥା ୩୭.୫୧ମି. ରେ ପ୍ରବାହିତ ହେଉଥିବା ସୂଚନା ମିଳିଛି। ଏପରିକି କ୍ରମାଗତ ବ୍ୟବଧାନରେ ଜଳସ୍ତର ହ୍ରାସ ପାଉଥିବାରୁ ବିପଦର ମାତ୍ରା କମିବାରେ ଲାଗିଛି। ବୈତରଣୀ ଜଳସ୍ତର ବୃଦ୍ଧି ପାଇ ଘସିପୁରା ବ୍ଲକ ଶାଳଦେଇ ପଞ୍ଚାୟତର ନପଙ୍ଗା ଓ ବେଲଦା ଗ୍ରାମ ଜଳଘେରରେ ରହିଥିଲା। ସେହିଭଳି ଆନନ୍ଦପୁର ବ୍ଲକ ପଞ୍ଚୁପଲୀଠାରେ ବନ୍ୟାଜଳ ପ୍ରବେଶ କରି ଅନେକ ଚାଷଜମି ଜଳମଗ୍ନ ହୋଇ କ୍ଷତିଗ୍ରସ୍ତ ହୋଇଥିବା ସୂଚନା ମିଳିଛି। ଅନ୍ୟପକ୍ଷରେ ଅପେକ୍ଷାକୃତ ତଳି ଅଞ୍ଚଳ ଭାବେ ଜଣାଶୁଣା ହାଟଡିହୀ ବ୍ଲକର ଆଇତିପୁର, ଅମୃତପୁର, ରାଘବପୁର ଗ୍ରାମ ଜଳଘେରରେ ଥିବାବେଳେ ରାସ୍ତା ଉପରେ ୨ ଫୁଟରୁ ଊର୍ଦ୍ଧ୍ୱ ବନ୍ୟାଜଳ ପ୍ରବାହିତ ହୋଇଥିଲା। ଆମ୍ବୋ – ବରାଙ୍ଗ ରାସ୍ତାର କରଗୋଳାଠାରେ ରାସ୍ତା ଉପରେ ୩ ଫୁଟର ପାଣି ପ୍ରବାହିତ ହୋଇଥିବାବେଳେ ଅନେକ ଗାଁକୁ ଯୋଗାଯୋଗ ବିଚ୍ଛିନ୍ନ ରହିଥିଲା। ତେବେ ଆନନ୍ଦପୁର ଅଞ୍ଚଳରେ ବର୍ଷା ଓ ପବନର ପ୍ରଭାବ ନ ଥିବାରୁ ଆଗକୁ ବିପଦର ଆଶଙ୍କା ହ୍ରାସ ପାଉଥିବା ଉପଜିଲାପାଳ ଅନୀଲ କୁମାର ସେଠୀଙ୍କ ଠାରୁ ସୂଚନା ମିଳିଛି।
