ଭୁବନେଶ୍ୱର,୧୧।୧୦(ବ୍ୟୁରୋ): ନିୟମ ଉଲ୍ଲଂଘନ ପାଇଁ ଗାଡ଼ି ଚାଲାଣ କାଟିବାବେଳେ ବିଭିନ୍ନ ସମୟରେ ଟ୍ରାଫିକ ପୋଲିସ ଓ ଆର୍ଟିଓଙ୍କ ଭୁଲ ପଦାକୁ ଆସୁଛି। କେତେବେଳେ କାର ଓ ଟ୍ରକ୍ ଚାଳକଙ୍କୁ ହେଲମେଟ୍ ନ ପିନ୍ଧିବା ପାଇଁ ଜରିମାନା କରୁଛନ୍ତି ତ ଆଉ କେତେବେଳେ ବାଇକ ଚାଳକଙ୍କ ନାଁରେ ଭାରିଯାନ ନିୟମ ଉଲ୍ଲଂଘନ ନେଇ ଚାଲାଣ କଟାଯାଉଛି। ଘଟଣାକ୍ରମରେ ଭୁବନେଶ୍ୱର ବମିଖାଲରେ ରହୁଥିବା ପ୍ରସନ୍ନ ମାନସିଂଙ୍କ ପାଖକୁ ସୁନ୍ଦରଗଡ଼ ଟ୍ରାଫିକ ପୋଲିସ ପକ୍ଷରୁ ଏକ ଚାଲାଣ ଆସିଛି। ସେ ବିନା ହେଲ୍ମେଟ୍ରେ ସ୍କୁଟିରେ ଯାଉଥିବାରୁ ଗତ ସେପ୍ଟେମ୍ବର ୧୭ ରାତି ୯ଟା ୧୧ରେ ୧ ହଜାର ଟଙ୍କାର ଜରିମାନା କରାଯାଇଥିବା ଉକ୍ତ ଚାଲାଣରେ ଦର୍ଶାଯାଇଛି। କିନ୍ତୁ ଚାଲାଣଟି କେଉଁ ସ୍ଥାନରେ କଟାଯାଇଛି କିଛି ବି ଉଲ୍ଲେଖ ନାହିଁ। ଗତ ୫ ତାରିଖ ସୋମବାର ଦିନ ମୋବାଇଲ୍ ଫୋନ୍କୁ ଉକ୍ତ ଚାଲାଣ ଆସିଥିବା ଦେଖି ପ୍ରସନ୍ନ ଆଶ୍ଚର୍ଯ୍ୟ ହୋଇଯାଇଛନ୍ତି। ସେ ସ୍କୁଟି ନେଇ ସୁନ୍ଦରଗଡ଼ ଯାଇ ନ ଥିବା ଓ ଅନ୍ୟକେହି ମଧ୍ୟ ତାଙ୍କୁ ଗାଡ଼ିକୁ ନେଇ ନ ଥିବାବେଳେ ସେଠାରୁ ଚାଲାଣ କିପରି ଆସିଲା ସେନେଇ ପ୍ରଶ୍ନ ଉଠାଇଛନ୍ତି।
ବମିଖାଲରେ ପରିବାର ସହ ରହୁଥିବା ପ୍ରସନ୍ନଙ୍କ ସ୍କୁଟି (ନଂ.ଓଡି୦୨ଏକ୍ସ ୫୯୨୨) ଭୁବନେଶ୍ୱର ଆର୍ଟିଓରେ ପଞ୍ଜୀକୃତ ରହିଛି। ପ୍ରସନ୍ନଙ୍କ ବୟସ ୭୦ ପାଖାପାଖି ହୋଇଥିବାବେଳେ ସେ ଏହି ଗାଡିକୁ ଆଖପାଖ ଅଞ୍ଚଳରେ ହିଁ ବ୍ୟବହାର କରନ୍ତି। ଅନେକ ସମୟରେ ଗାଡିଟି ତାଙ୍କ ଘରେ ରୁହେ। ବେଳେବେଳେ ବିମିଖାଲରେ ଦୋକାନ କରିଥିବା ତାଙ୍କ ପୁଅ ଉକ୍ତ ଗାଡ଼ିରେ ଦୋକାନକୁ ଯାଇଥାନ୍ତି। ପ୍ରସନ୍ନଙ୍କର ସୁନ୍ଦରଗଡ଼ରେ କେହି ସମ୍ପକୀୟ କି ବନ୍ଧୁ ନାହାନ୍ତି। ଏପରି ସ୍ଥଳେ ସୁନ୍ଦରଗଡ଼ ଟ୍ରାଫିକ ପୋଲିସର ଏଭଳି ଚାଲାଣ ପଠାଇବା ଘଟଣାକୁ ନେଇ ପ୍ରସନ୍ନ ପୋଲିସର ଖାମଖିଆଲ କାର୍ଯ୍ୟଧାରାକୁ ଦାୟୀ କରିଛନ୍ତି। ଚାଲାଣ କାଟିଥିବା ଥାନା ଅଧିକାରୀ ଗୋକୁଳ ନନ୍ଦ ସାହୁ କହିଛନ୍ତି, ମୋବାଇଲ ଫୋନ୍ରେ ରଙ୍ଗ ନମ୍ବର ଲାଗିବା ଭଳି ଚାଲାଣବେଳେ ଏଭଳି ତ୍ରୁଟି ହୋଇଯାଏ। ଚାଲାଣ କଟାଯିବା ସମୟରେ ଗୋଟିଏ ସଂଖ୍ୟା ଭୁଲ ହୋଇଗଲେ ତାହା ଅନ୍ୟ ଜଣଙ୍କ ନିକଟକୁ ଚାଲିଯାଇଥାଏ। ତେଣୁ ଏହି କ୍ଷେତ୍ରରେ ସେଭଳି ଭୁଲ୍ ହୋଇଛି। ଉକ୍ତ ବ୍ୟକ୍ତି ଅନ୍ଲାଇନ୍ରେ ଅଭିଯୋଗ କଲେ ଆମେ ଭୁଲ୍ ସୁଧାରିଦେବୁ ବୋଲି ସେ କହିଛନ୍ତି।
ଖାମଖିଆଲ ଭାବେ ଜରିମାନା ଆଦାୟ
ପୁରୀ ଅଫିସ: ସମ୍ପ୍ରତି କୋଭିଡ୍ କଟକଣାକୁ ଦୃଷ୍ଟିରେ ରଖି ପୁରୀ ସହରରେ କଡ଼ାକଡ଼ି ମାସ୍କ ଯାଞ୍ଚ ଚାଲିଛି। ମାସ୍କ ପିନ୍ଧି ନ ଥିବା ବ୍ୟକ୍ତିଙ୍କଠାରୁ ପୋଲିସ କିମ୍ବା ପ୍ରଶାସନ ପକ୍ଷରୁ ଜରିମାନା ଆଦାୟ କରାଯାଉଛି। ଶନିବାର ଜଣେ ମୋବାଇଲ ବ୍ୟବସାୟୀ ବିନା ମାସ୍କରେ ଯାଉଥିବାବେଳେ ପୁରୀ ଦରଜି ପୋଖରୀ ଛକଠାରେ ମ୍ୟୁନିସିପାଲିଟିର ଏନ୍ଫୋର୍ସମେଣ୍ଟ ସ୍କ୍ବାଡ୍ ତାଙ୍କୁ ଅଟକାଇ ଜରିମାନା ଆଦାୟ କରିଥିଲେ। ତାଙ୍କଠାରୁ ୨୦୦ ଟଙ୍କା ଜରିମାନା ନେଇ ଏକ ରସିଦ୍ ଦେଇଥିଲେ। ସେଥିରେ ୧୦. ୧୦. ୨୦ ତାରିଖ ସ୍ଥାନରେ ୧୦. ୯.୧୦ ବୋଲି ଉଲ୍ଲେଖ ରହିଛି। ଏହି ଘଟଣାରୁ ଏନ୍ଫୋର୍ସମେଣ୍ଟ ସ୍କ୍ବାଡ୍ର ଖାମଖିଆଲ ମନୋଭାବ ପଦାରେ ପଡ଼ିଛି। ତେବେ ଏ ନେଇ ବିଭାଗୀୟ ଅଧିକାରୀଙ୍କ ପ୍ରତିକ୍ରିୟା ମିଳିପାରି ନାହିଁ।
