ଅନୁଗୋଳ ଅଫିସ, ୧୯ ।୧୧ ସୁନ୍ଦର ଦିଶିବ ଅନୁଗୋଳ ସହର। ବହୁ କୋଟି ଟଙ୍କା ବ୍ୟୟରେ ଏଥିପାଇଁ ପ୍ରସ୍ତୁତ କରାଯାଇଛି ଭିତ୍ତିଭୂମି। ମାସ ମାସ ଧରି ବିଭିନ୍ନ ସ୍ଥାନରେ ଚାଲିଛି ନିର୍ମାଣ କାର୍ଯ୍ୟ। ଆଉ ମାତ୍ର ଦିନକ ପରେ ଅର୍ଥାତ୍ ୨୦ ତାରିଖରେ ଏସବୁ ଆସିବ ଲୋକଲୋଚନକୁ। ଅନୁଗୋଳ ଗସ୍ତରେ ଆସୁଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜେ ଏହାକୁ ଲୋକାର୍ପଣ କରିବାର କାର୍ଯ୍ୟକ୍ରମ ରହିଛି। କେବଳ ଏହି ସୌନ୍ଦର୍ଯ୍ୟକରଣ ନୁହେଁ, ଶତାଧିକ କୋଟି ଟଙ୍କା ବ୍ୟୟରେ ହୋଇଥିବା ବିଭିନ୍ନ ପ୍ରକଳ୍ପର ଉଦ୍ଘାଟନ ହେବ। ୯୨୪ କୋଟି ଟଙ୍କାରେ ହେବାକୁ ଥିବା ବହୁ ଉନ୍ନୟନ କାର୍ଯ୍ୟର ଶିଳାନ୍ୟାସ କରାଯିବ। ପ୍ରାଥମିକ ପର୍ଯ୍ୟାୟରେ ଜିଲାର ୨ ଲକ୍ଷ ୭୭ ହଜାର ଗରିବଙ୍କୁ ସ୍ମାର୍ଟ ସ୍ବାସ୍ଥ୍ୟକାର୍ଡ ବଣ୍ଟନ କରାଯିବ।
ସହରର ଭିଆଇପି ରୋଡ୍ ହେଉ କି ବିଇଡି ଛକ, ଥାନା ଛକରୁ ଆରମ୍ଭ କରି ବୁଢ଼ୀ ଠାକୁରାଣୀ ଛକ, ସବୁଆଡ଼େ କରାଯାଇଛି ସୌନ୍ଦର୍ଯ୍ୟକରଣ କାର୍ଯ୍ୟ। କେଉଁଠି ଅକାମୀ ଗାଡ଼ିକୁ କାଟି ନୂଆ ରୂପରେ ସଜାଯାଇଛି ତ ଆଉ କେଉଁସ୍ଥାନରେ ଇଫିଲ୍ ଟାୱାର, ଗିତାର, ଫୁଟବଲ, ହକି, ସୂର୍ଯ୍ୟ ନମସ୍କାର, ବିମାନ, ଖୋଲାବହି, ରୋବଟ୍ ଆଦିର ପ୍ରତିକୃତି ରାସ୍ତା ପାର୍ଶ୍ୱରେ ନିର୍ମାଣ କରାଯାଇଛି। ଯୁବପିଢ଼ିଙ୍କ ପସନ୍ଦକୁ ଲକ୍ଷ୍ୟ ରଖି ବିଜୁ ମଇଦାନ ଓ ଜିଲା କଳାକେନ୍ଦ୍ର ଠାରେ ସେଲ୍ଫି ପଏଣ୍ଟ ‘ଆଇ ଲଭ୍ ଅନୁଗୋଳ’ ତିଆରି ହୋଇଛି। ସେହିପରି ବିଜୁ ମଇଦାନରେ କ୍ୟାପିଟ୍ ଏରିଆକୁ ଲାଗି ଏକ ମଞ୍ଚ ସହ ଗ୍ରୀନ୍ ରୁମ୍ କରାଯାଇଛି। ଏଠାରେ ଅନୁଗୋଳବାସୀ ଏକ ନିଆରା ଅନୁଭୂତି ପାଇବେ ବୋଲି କୁହାଯାଇଛି। ବିଇଡି ଛକରୁ ମା’ ବୁଢ଼ୀ ଠାକୁରାଣୀ ମନ୍ଦିର ଛକ ପର୍ଯ୍ୟନ୍ତ ଲମ୍ବିଥିବା ରାସ୍ତାରେ ଖାଓ ଗଳି ବ୍ୟବସ୍ଥା କରାଯାଇଛି। ପ୍ରାତଃ ଓ ସନ୍ଧ୍ୟା ଭ୍ରମଣ କରୁଥିବା ଲୋକଙ୍କ ପାଇଁ ସ୍ବତନ୍ତ୍ର ହେଲ୍ଥ କରିଡର ପ୍ରସ୍ତୁତ ହୋଇଛି। ଗତବର୍ଷଠାରୁ ଏସବୁ ନିର୍ମାଣ ନିମନ୍ତେ ପ୍ରଶାସନ ପକ୍ଷରୁ ଜୋର୍ ଦିଆଯାଇଥିଲେ ମଧ୍ୟ କରୋନା ସଂକ୍ରମଣ ପାଇଁ ଏହି ସୌନ୍ଦର୍ଯ୍ୟକରଣ କାର୍ଯ୍ୟ ଧିମେଇ ଯାଇଥିଲା। ଅନ୍ୟପକ୍ଷରେ ଜିଲାରେ ଥିବା ଗରିବ ଜନସାଧାରଣଙ୍କ ସ୍ବାସ୍ଥ୍ୟର ସୁରକ୍ଷା ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ସ୍ମାର୍ଟ ହେଲ୍ଥ କାର୍ଡ ପ୍ରଦାନ କରାଯିବ। ପ୍ରାଥମିକ ପର୍ଯ୍ୟାୟରେ ୨ଲକ୍ଷ ୭୭ ହଜାର ୮୫୦ ଜଣଙ୍କୁ ଏହି କାର୍ଡ ବଣ୍ଟନ ହେବ। ତେବେ ମଞ୍ଚରେ ୧୦ ଜଣଙ୍କୁ ନିଜେ ମୁଖ୍ୟମନ୍ତ୍ରୀ ଏହି କାର୍ଡ ପ୍ରଦାନ କରିବେ। ଅବଶିଷ୍ଟ କାର୍ଡଗୁଡ଼ିକୁ ପ୍ରଶାସନ ପକ୍ଷରୁ ବଣ୍ଟନ କରାଯିବ।
