ଭୁବନେଶ୍ୱର, (ବ୍ୟୁରୋ)/ ବଲାଙ୍ଗୀର ଅଫିସ,୯।୧୨: କଠୋର ଆଇନ ଓ ବାରମ୍ବାର ଚଢ଼ାଉ ସତ୍ତ୍ୱେ ବନ୍ୟଜନ୍ତୁ ଶିକାର ଏବଂ ଚୋରା ଚାଲାଣ ବନ୍ଦ ହୋଇପାରୁ ନାହିଁ। ନଭେମ୍ବର ୧୪ରେ ବରଗଡ ଜିଲା ପଦ୍ମପୁର ଉପଖଣ୍ଡ କେନ୍ଦୁଭଟାରେ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ୍ ଫୋର୍ସ (ଏସ୍ଟିଏଫ୍) ଚଢ଼ାଉ କରି ଜଣେ ଶିକାରୀଙ୍କୁ ଗିରଫ କରିବା ସହ ଏକ ହାତୀଦାନ୍ତ ଜବତ କରିଥିଲା। ମଙ୍ଗଳବାର ବଲାଙ୍ଗୀରରୁ ଆଉଏକ ହାତୀଦାନ୍ତ ର଼୍ୟାକେଟ ଧରାପଡିଛି। ବନ ବିଭାଗ ସହାୟତାରେ ଏସ୍ଟିଏଫ୍ ଟିମ୍ ବଲାଙ୍ଗୀର ଜିଲା ତୁଷୁରା ଥାନା ଗୁଡ୍ଭେଲା ଗ୍ରାମ ନିକଟରେ ଚଢ଼ାଉ କରି ହାତୀ ଦାନ୍ତ ଜବତ କରିବା ସହ ଦୁଇଦିନରେ ୨ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଦ୍ୱୟ ହେଲେ ଏହି ଥାନା ଅନ୍ତର୍ଗତ ନିମୁଡ୍ସିଂହା ଗ୍ରାମର ବିପୁଲ ବାଗ ଓ ମଧୁ ଭୂଇଁ। ବିପୁଲଙ୍କଠାରୁ ୩୬.୫ ଇଞ୍ଚ ଲମ୍ବ, ୧୨ ଇଞ୍ଚ ଗୋଲେଇ ଓ ୮.୯୦ କେ.ଜି. ଓଜନର ହାତୀଦାନ୍ତ ଜବତ କରାଯାଇଛି। ପରେ ଏସ୍ଟିଏଫ୍ ଅଭିଯୁକ୍ତ ଦ୍ୱୟଙ୍କୁ ବଲାଙ୍ଗୀର ବନ ବିଭାଗକୁ ହସ୍ତାନ୍ତର କରିଛି। ଏନେଇ ଦଓଗାଁ ରେଞ୍ଜରେ ମାମଲା (ନଂ.୨୧୩/୨୧-୨୨) ରୁଜୁ କରାଯାଇଛି। ଫେରାର ଶିକାରୀଙ୍କୁ ଧରିବାକୁ ଆଖପାଖ ଅଞ୍ଚଳରେ ଏସ୍ଟିଏଫ୍ ଛାନ୍ଭିନ୍ ଚଳାଇଛି। ତଦନ୍ତବେଳେ ଏକ ବଡ଼ ହାତୀଦାନ୍ତ ର଼୍ୟାକେଟ୍ ଚାଲିଥିବା ଜାଣିବାକୁ ପାଇଛି। ତେବେ ଜବତ ହାତୀଦାନ୍ତ ପ୍ରାୟ ଦୁଇମାସ ତଳେ ଟାଙ୍ଗିଆରେ କଟାଯାଇଥିବା ଅନୁମାନ କରାଯାଉଛି। ହାତୀଟି କିପରି ଓ କେଉଁଠି ମରିଥିଲା, ଦାନ୍ତକୁ ସେମାନେ ସିଧା କାଟି ଆଣିଥିଲେ ନା ଆଉ କାହାଠାରୁ ସଂଗ୍ରହ କରିଥିଲେ, ଏହାପୂର୍ବରୁ କେତୋଟି ହାତଦାନ୍ତକୁ ସେମାନେ କାହାକୁ ବିକ୍ରି କରିଛନ୍ତି, ଏଭଳି ବିଭିନ୍ନ ଦିଗକୁ ନେଇ ଏସ୍ଟିଏଫ୍ ତଦନ୍ତ ଜାରି ରଖିଛି।
ବଲାଙ୍ଗୀର ଡିଏଫ୍ଓ ନୀତୀଶ କୁମାରଙ୍କ ସୂଚନାନୁସାରେ, ଗୁଡ୍ଭେଲା ଅଞ୍ଚଳର କେତେଜଣ ଲୋକଙ୍କ ପାଖରେ ଏକ ହାତୀଦାନ୍ତ ରହିଥିବା ଏସ୍ଟିଏଫ୍ ସୂଚନା ପାଇବା ପରେ ବନ ବିଭାଗକୁ ଜଣାଇଥିଲା। ଏହାପରେ ଏସ୍ଟିଏଫ୍ ଓ ବନ ବିଭାଗ ମିଳିତ ଟିମ୍ ଗଠନ କରି ର଼୍ୟାକେଟକୁ ଧରିବାକୁ ଯୋଜନା କରିଥିଲା। ଅଧିକାରୀମାନେ କ୍ରେତା ଭାବେ ହାତୀଦାନ୍ତ ରଖିଥିବା ଅଭିଯୁକ୍ତଙ୍କ ସହ ଯୋଗାଯୋଗ କରିଥିଲେ। ଦାନ୍ତ କିଣିବା ଉଦ୍ଦେଶ୍ୟରେ ମଙ୍ଗଳବାର ରାତିରେ ଗୁଡ୍ଭେଲା-ଘୁନା ରାସ୍ତାର ଏକ ଛକକୁ ଆସିବା ପାଇଁ ଅଭିଯୁକ୍ତଙ୍କୁ କୁହାଯାଇଥିଲା। ସେ ସେଠାରେ ପହଞ୍ଚତ୍ବା ପରେ ଟିମ୍ ସେମାନଙ୍କ ଉପରେ ଅତର୍କିତ ଚଢାଉ କରିଥିଲା। ଘନ ଅନ୍ଧାର ଥିବାରୁ ସେଠାରୁ ଜଣେ ଶିକାରୀ ଦୌଡି ପଳାଇବାକୁ ସକ୍ଷମ ହୋଇଥିବାବେଳେ ନିମୁଡ୍ସିଂହା ଗ୍ରାମର ବିପୁଲ ଧରାପଡି ଯାଇଥିଲେ। ତାଙ୍କୁ ପଚରାଉଚରା ପରେ ବୁଧବାର ଏହି ର଼୍ୟାକେଟରେ ସମ୍ପୃକ୍ତ ଅନ୍ୟତମ ଅଭିଯୁକ୍ତ ମଧୁ ନାମକ ବ୍ୟକ୍ତିଙ୍କୁ ଗିରଫ କରାଯାଇଥିଲା। ଗିରଫ ଅଭିଯୁକ୍ତଦ୍ୱୟଙ୍କୁ ଗୁରୁବାର କୋର୍ଟ ଚାଲାଣ କରାଯିବ ବୋଲି ସେ କହିଛନ୍ତି।
ଏସ୍ଟିଏଫ୍ର ରିପୋର୍ଟ ଅନୁଯାୟୀ, ଗତ ବର୍ଷକ ମଧ୍ୟରେ ୨୧ଟି ବାଘଛାଲ, ୧୨ଟି ହାତୀ ଦାନ୍ତ, ୨ଟି ହରିଣ ଚମଡ଼ା, ୮ ଜୀବନ୍ତ ବଜ୍ରକାପ୍ତା, ୧୫ କେଜି ବଜ୍ରକାପ୍ତା କାତି ଜବତ କରାଯିବା ସହ ଏଥିରେ ସମ୍ପୃକ୍ତ ୪୮ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି।
