ଭୁବନେଶ୍ୱର,୨୭।୬(ବ୍ୟୁରୋ): ରାଜଧାନୀରେ କରୋନା ସଂକ୍ରମଣ ହାର କମିଥିଲେ ମଧ୍ୟ ସ୍ଥିତି ସୁଧୁରି ନ ଥିବାରୁ ଲକ୍ଡାଉନ ଓ ସପ୍ତାହାନ୍ତ ଶଟ୍ଡାଉନ୍ କଟକଣା ଜାରି ରହିଛି। କମିଶନରେଟ ପୋଲିସ ଓ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ଚଢ଼ାଉ, ଯାଞ୍ଚ ସହ ପଦକ୍ଷେପ ଗ୍ରହଣ କରାଯାଉଛି। ଏହାସତ୍ତ୍ୱେ ଦିନକୁ ଦିନ ସହର ରାସ୍ତାରେ ଗାଡ଼ିମୋଟର ଚଳାଚଳ ବୃଦ୍ଧି ପାଇବା ସହ ଟ୍ରାଫିକ ଜାମ୍ ପରିସ୍ଥିତି ସୃଷ୍ଟି ହେଉଛି। ସେହିପରି ହାଟବଜାରରେ ମଧ୍ୟ ପ୍ରବଳ ଗହଳି ସଂକ୍ରମଣ ବୃଦ୍ଧି ଆଶଙ୍କାକୁ ଦୃଢ଼ୀଭୂତ କରୁଛି। ଅମାନିଆଙ୍କ ପାଇଁ ସହରର ସ୍ଥିତି ପୁଣି ବିଗିଡିଯିବ ବୋଲି ଆଶଙ୍କା ପ୍ରକାଶ ପାଇଲାଣି। ପୋଲିସ ବିଭିନ୍ନ ଛକ ଓ ସମ୍ବେଦନଶୀଳ ସ୍ଥାନରେ ବ୍ଲକିଂ କରି ଯାଞ୍ଚ କରି ଜରିମାନା କାଟୁଛନ୍ତି। ହେଲେ ଚତୁର ଅମାନିଆ ଗଳାବାଟ ଦେଇ ଖସି ପଳାଉଥିବା ଦେଖିବାକୁ ମିଳୁଛି। ଯେଉଁଠି ପୋଲିସ ଯାଞ୍ଚ ନାହିଁ ସେ ଅଞ୍ଚଳରେ ଭିଡ଼ ଜମାଉଛନ୍ତି। ସେମାନଙ୍କ ପାଇଁ କିଛି ଦୋକାନୀ ମଧ୍ୟ ଲୁଚାଛପାରେ ଶଟର୍ ଟେକି ବ୍ୟବସାୟ କରୁଛନ୍ତି। ରାଜ୍ୟରେ ଡେଲ୍ଟା ପ୍ଲସ୍ ଭାରିଆଣ୍ଟ ଭୂତାଣୁ ଠାବ ହୋଇଥିବାବେଳେ ରାଜଧାନୀରେ ଅମାନିଆଙ୍କ ଭିଡ଼ ଏବେ ପ୍ରଶାସନ ଓ ପୋଲିସର ମୁଣ୍ଡବ୍ୟଥା ସାଜିଛି। ତେଣୁ ଯାଞ୍ଚକୁ କଡାକଡି କରିଛି କମିଶନରେଟ ପୋଲିସ।
ଶଟ୍ଡାଉନରେ ପୋଲିସ ପକ୍ଷରୁ ସହରର ବିଭିନ୍ନ ଗଳିକନ୍ଦିରେ ଚଢାଉ କରାଯିବା ସହ ନାକା ପଏଣ୍ଟରେ ଚେକିଂ କରାଯାଇ ଅମାନିଆଙ୍କ ନିକଟରୁ ଜରିମାନା ଆଦାୟ କରାଯାଇଛି। ଏଥିସହିତ ଚିନ୍ତାମଣିଶ୍ୱର ମନ୍ଦିରରେ ଶ୍ରଦ୍ଧାଳୁଙ୍କ ଭିଡ଼ ହୋଇଥିବା ଜାଣି ପୋଲିସ ସେଠାରେ ଚଢାଉ କରି ଜରିମାନା ଆଦାୟ କରିଛି। ସେହିଭଳି ଅଯଥାରେ ବୁଲାବୁଲି କରୁଥିବା ଅମାନିଆ ମଧ୍ୟ ତଣ୍ଡ ଗଣିଛନ୍ତି। ସହରର ପ୍ରମୁଖ ସ୍ଥାନ ମାଷ୍ଟରକ୍ୟାଣ୍ଟିନ୍, ରାଜମହଲ ଛକ, ବାଣୀବିହାର, ଖଣ୍ଡଗିରି ଛକ, ନୟାପଲ୍ଲୀ, କଳ୍ପନା ଛକ ଆଦି ବିଭିନ୍ନ ସ୍ଥାନରେ ପୋଲିସ ପକ୍ଷରୁ ଯାଞ୍ଚ କରାଯାଇ ଅମାନିଆଙ୍କ ଗାଡ଼ି ଜବତ କରିବା ସହ ଜରିମାନା ଆଦାୟ କରିଛି। ସହରର ବିଭିନ୍ନ ଅଞ୍ଚଳରେ ପିସିଆର ଭ୍ୟାନ୍ ବୁଲି ଲୁଚାଛପାରେ ଖୋଲୁଥିବା ଦୋକାନଗୁଡ଼ିକୁ ବନ୍ଦ କରିଥିବା ସୂଚନା ମିଳିଛି।
